A o alu le taavale a Bob i le saosaoa e 100 kilomita i le itula i se aso malūlū ma loulouā i Alberta i Kanata, na faafuase‘i ona pā le pa‘u pito i tua i le itu agavale o lana taavale. I le taimi muamua, e le‘i iloa e Bob le mea na tupu, ma na faaauau pea ona alu o ia mo le isi 5 kilomita aga‘i i lona fale.

 I se tusi a Bob na avatu i se Maota mo Sauniga a Molimau a Ieova i lona vaipanoa, na ia faamatala ai e faapea: “Na sau se taavale o loo iai ni talavou se to‘alima, i autafa o la‘u taavale ma vili i lalo latou faamalama ma valaau mai o la e pā le pa‘u o la‘u taavale. Na faatafa loa matou taavale i tua ma latou fai mai e tuu atu e latou te suia le pa‘u. Ou te le‘i manatua pe na iai se isi pa‘u po o se siaki i la‘u taavale. A o o‘u nofo i lo‘u nofoa faataavalevale i autafa o le auala tele, na latou maulu i lalo o le taavale ma aumai le isi pa‘u ma le siaki ma sui loa le pa‘u o le taavale. Na matuā malūlū le tau ma na to‘ulu le kiona. E ui sa fai o latou ofu lelei, ae na latou suia lava le pa‘u o la‘u taavale, lea na semanū e lē mafai ona ou faia na o a‘u.

 “Faafetai lava i nei talavou Molimau e to‘alima na fesoasoani iā te a‘u. Sa fai le latou galuega tala‘i i le taimi lea, ma o loo faatatau moni lava e nei talavou mea o loo latou tala‘ia. Pe ana latou lē fesoasoani mai, semanū e matuā faigatā ma umi se taimi o tau sui le pa‘u o la‘u taavale. Ou te matuā talisapaia lava la latou fesoasoani. O ai na iloa sa iai ni agelu i le auala tele i lenā aso?”