O Elisa o se Molimau a Ieova. I se tasi aso a o la suʻesuʻeina le Tusi Paia i le fale o se fafine, na faateʻia le fafine i le asiasi atu o se faifeʻau ma lana avā. Na logotala Elisa e leʻi leva ona maliu le tama tama e toʻatasi a lenei ulugalii.

 Na faamāfanafanaina e Elisa le ulugalii ona o le maliu o le la tama, ma na matuā fetagisi le ulugalii. Mulimuli ane na ita le faifeʻau ma faapea mai: “Ou te lē malamalama pe aiseā ua faataga ai e le Atua lenei mea e tupu iā i maʻua! Aiseā ua aveesea ai e le Atua loʻu atalii e toʻatasi? Ua 28 tausaga o oʻu auauna i le Atua ma e tele mea lelei na ou faia, ae seʻi vaai i le auala ua tauia ai aʻu e le Atua. Aiseā ua fasioti ai e le Atua loʻu atalii?”

 Na faamatala e Elisa i le ulugalii e leʻi fasiotia e le Atua le la tama. Na ia talanoa foʻi i ai i mataupu e pei o le togiola, toetū ma māfuaaga ua faataga ai e le Atua mea leaga e tutupu. Na taʻu atu e le faifeʻau ma lana avā iā Elisa, ua la maua mai iā te ia tali o fesili na la tatalo ai.

 I le vaiaso na sosoo ai, na toe foʻi ane le faifeʻau ma lana avā ma auai i le suʻesuʻega a le fafine. Na latou talanoaina ai le mataupu “Le Faamoemoe mo Ē Pele ua Maliliu” i le tusi O ā Aʻoaʻoga Moni a le Tusi Paia? Na matuā fiafia le ulugalii e faaali o la manatu i le suʻesuʻega.

 Mulimuli ane na auai lenei ulugalii i se fonotaga faapitoa a Molimau a Ieova na fai i Tbilisi i Georgia. Na matuā pāʻia loto o lenei ulugalii i le mataʻina o le alofa ma le autasi na la molimauina i lenā fono. E umi se taimi na la taumafai ai e aʻoaʻo le la ʻaulotu ina ia faaalia na uiga, ae e leʻi taulau.