I se tasi aso na fesoasoani ai Yanmei o se teine Molimau a Ieova mai i Asia, iā Mingjie o se fafine e pō le vaai e kolosi le auala. a Na faapea atu Mingjie: “Faafetai lava. Ia faamanuia le Atua iā te oe.” Na fesili Yanmei iā Mingjie, pe e manaʻo e la te toe talanoa i se isi taimi e faatatau i le Tusi Paia. Mulimuli ane, na faamatala ai e Mingjie e masani ona tatalo i le Atua ina ia taʻitaʻia o ia i lana faapotopotoga moni. Aiseā na tatalo ai faapea Mingjie?

 Na faamatala e Mingjie i le 2008, na ia talia ai se valaaulia mai i se tasi o ana uō e pō foʻi le vaai ina ia auai i se sauniga lotu mo tagata e iai manaʻoga faapitoa. Ina ua uma le lauga, na fesili Mingjie i le faifeʻau po o le ā le tusi lea na ia siiina mai i lana lauga. Na taʻu atu e le faifeʻau o le Tusi Paia, le Afioga moni a le Atua. O lea, na matuā fia faitau ai lava Mingjie i le Tusi Paia. Na ia maua se Tusi Paia atoa i le gagana patupatu faa Saina e 32 tusi na tusia ai, ma e pe ā ma le ono masina na ia faitauina ai. A o faaauau pea ona faitau e Mingjie le Tusi Paia, na ia iloa ai e sesē le aʻoaʻoga o le tolutasi lea na aʻoaʻoina i le lotu na auai ai, ma e iai le suafa o le Atua, o Ieova.

 Na iai se taimi na lagona ai e Mingjie le lotovaivai ona o amioga a tagata o le lotu. Na iloa e Mingjie e latou te lē o ola e tusa ai ma mea na ia faitauina i le Tusi Paia. O se faataʻitaʻiga, na tufa i tagata tauaso toe meaʻai, ae ave meaʻai lelei i tagata e lē tauaso. Na matuā tigā lava faalogona o Mingjie i na faiga lē alofa, o lea na amata ai ona ia saʻiliʻili i isi lotu i lenā vaipanoa. O le māfuaaga lenā, na tatalo ai Mingjie ina ia ona mauaina le faapotopotoga Kerisiano moni.

 Na matuā pāʻia le loto o Mingjie i le agalelei na faaalia e Yanmei, o lea na ia talia ai se suʻesuʻega faale-Tusi Paia. Mulimuli ane, na auai ai Mingjie mo le taimi muamua i sauniga a Molimau a Ieova. Na faamatala mai e Mingjie: “E lē mafai ona galo iā te aʻu laʻu sauniga muamua. Na faafeiloaʻi ma le māfana aʻu e uso ma tuafāfine uma. Na matuā pāʻia ai loʻu loto. E ui o aʻu o se tagata e pō le vaai, ae na ou lagona i inā le alofa lē manatu faapito.”

 Na agaʻigaʻi i luma Mingjie ma na amata ai ona auai e lē aunoa i sauniga. Na matuā fiafia o ia e usu pese o le sauniga, ae na faigatā mo ia ona e leai se tusi pese i le gagana patupatu. O lea, na fesoasoani ai le faapotopotoga iā Mingjie e fai lana lava tusi pese. E pe ā ma le 22 itula na faaalu e Mingjie e tā ai pese e 151 i le gagana patupatu. Iā Aperila 2018, na amata ai ona auai Mingjie i le galuega talaʻi, ma mulimuli ane na ia faaalu le pe ā ma le 30 itula e talaʻi ai i masina taʻitasi.

 Na fesoasoani Yanmei iā Mingjie ina ia sauniuni mo le papatisoga. Na puʻe e Yanmei i se mea puʻeleo fesili ma mau mo le papatisoga o loo i le tusi Ua Faamaopoopo Ina ia Faia le Finagalo o Ieova. Iā Iulai 2018, na papatisoina ai Mingjie. Na faapea mai o ia: “Na pāʻia loʻu loto i le alofa na faaalia e uso ma tuafāfine i lenā tauaofiaga. Na maligi oʻu loimata ona o lea ua avea aʻu ma se vaega o le faapotopotoga moni a le Atua.” (Ioane 13:34, 35) Ua maumauaʻi nei Mingjie e faaalia le alofa lava lea e tasi na ia mauaina, e ala i lona auauna o se tagata talaʻi faataimi atoa.