O Daiane o se tasi o Molimau a Ieova ma e auauna faataimi atoa i Pasili. I se tasi aso a o ia talaʻi i le telefoni, na ia talanoa ai i se ulugalii talavou na faaalia le fiafia. Na la faailoa atu iā Daiane o le a la siitia atu i se nuu maotua, e leai se eletise ma e lē maua ai le Initaneti. E lē gata i lea, e leai se Molimau a Ieova e nofo ai i ina. Ina ia faaauau le latou talanoaga faale-Tusi Paia, na avatu ai e le ulugalii iā Daiane le numera o le telefoni faitele a le nuu. O lea, na latou fuafua ai loa se aso ma se taimi talafeagai e latou te talanoa ai.

 Ina ua vili e Daiane le telefoni faitele a le nuu i le taimi na latou fuafua e talanoa ai, na tali mai le ulugalii! I vaiaso e lua na sosoo ai, e faatolu ona fai a latou talanoaga faale-Tusi Paia i luga o le telefoni.

 Peitaʻi, na iʻu ina lē toe taliina mai e le ulugalii le telefoni. E ui i lea, e leʻi faavaivai ai Daiane, ae na faaauau ona ia viliina le telefoni faitele a le nuu. E faatolu ona ia viliina le telefoni i vaiaso taʻitasi, ma na ia talanoa i soo se tasi na tali mai e faatatau i le Tusi Paia. O le iʻuga, na ia amataina ai ni suʻesuʻega faale-Tusi Paia ma nisi o tagata o le nuu.

 I se tasi aso a o faia e Daiane ma lana tane se suʻesuʻega faale-Tusi Paia a se alii talavou i luga o le telefoni, na lagona atu ai e se faifeʻau a le nuu le latou talanoaga. Na ia faalatalata atu ma tū i tala ane o le tagata aʻoga ina ia lagona lelei ai le talanoaga. Na iʻu lava ina fesili atu pe e mafai ona ia talanoa iā Daiane ma lana tane. O lona fiafia i mea na ia faalogo i ai, na ia manaʻo ai foʻi e amata sana suʻesuʻega faale-Tusi Paia!

 I se taimi mulimuli ane, na faia ai e Daiane ma lana tane ni suʻesuʻega faale-Tusi Paia se ono i luga o le telefoni ma tagata o lenā nuu, e aofia ai ma le faifeʻau. O nisi o na tagata suʻesuʻe ua auai i sauniga faa-Kerisiano e faaaogā ai lenā lava telefoni. Na faia e se tasi o tagata aʻoga se nofoa e mafai ona saofafaʻi ai a o faia a latou suʻesuʻega.

 E lotofaafetai Daiane ma lana tane i le avanoa na la maua e faalauiloa atu ai le feʻau o le Malo i lenei nuu maotua. Ua faapea mai Daiane, “E mafai ona faamautinoa e Ieova e oo le tala lelei i soo se tasi, e tusa pe nofo i se nofoaga maotua.”