O Virginia o se tasi o Molimau a Ieova o loo maua o ia i le maʻi o le locked-in syndrome, ma e pē atoa lona tino. E mafai ona ia vaai ma faalogo, e pupula ma moeiini ona mata ma faagaoioi laʻitiiti lona ulu. Ae e lē mafai ona tautala pe ʻai. Na iai se taimi na malosi ai ma lelei lona soifua mālōlōina. Ae i se tasi taeao i le 1997 na ia lagona ai le tigā matuitui i lona muli ulu. Na ave o ia e lana tane i le falemaʻi, ae i le afiafi na ia lē toe iloa ai se mea. Na ala aʻe o ia i le lua vaiaso mulimuli ane ai i totonu o le ICU ua pē atoa lona tino, ma o loo faamānava i le okesene. Mo ni nai aso, e na te leʻi manatuaina se mea ma e na te leʻi iloa foʻi po o ai ia.

 Na faamatala mai e Virginia le mea na sosoo ai. “Na faasolosolo ona ou toe manatuaina mea. Na ou tatalo faatauanau. Ou te leʻi manaʻo ou te oti ma tuua si aʻu tama tama laʻitiiti e aunoa ma se tinā. Na ou taumafai e manatua le tele o mau o le Tusi Paia ina ia atiaʻe ai loʻu lototele.

 “Mulimuli ane na aveese aʻu e fomaʻi mai i le ICU. Ina ua mavae le ono masina o togafitia aʻu i falemaʻi eseese ma nofoaga e toe faaleleia ai soifua mālōlōina, na faataga ai loa ona ou alu i le fale. Na tumau pea ona pē atoa loʻu tino, ma ua ou manaʻomia le fesoasoani i mea uma lava. Na matuā ou lotovaivai ai! Na ou lagona ua leai soʻu aogā mo isi ma Ieova. Na ou popole foʻi po o ai o le a tausia si aʻu tama.

 “Na amata ona ou faitauina mea na tutupu i nisi o Molimau a Ieova na feagai ma tulaga e pei ona oo iā te aʻu, ma na ou matuā maofa i mea na mafai ona latou faia mo Ieova. O lea na ou taumafai ai e atiaʻe le vaaiga saʻo e ala i le taulaʻi atu i mea e mafai ona ou faia. Ae ou te leʻi maʻi e faatapulaa le taimi e mafai ai ona ou faia mea faaleagaga. A o le taimi lenei, ua mafai ona ou faia mea faaleagaga i le aso atoa ma aso uma. O lea nai lo le lotovaivai ona o faalogona o le leai o se faamoemoe, ae ua ou uaʻi atu nei i le tuutoina atu i le auaunaga iā Ieova.

 “Na ou aʻoaʻoina le auala e faaaogā ai le komepiuta. Na ou faaaogāina se polokalame faakomepiuta e tāina ai mea, lea e faaaogā ai le lueina o loʻu ulu. E faigatā ae o lenā polokalame, ua mafai ai ona ou suʻesuʻeina le Tusi Paia ma faailoa atu ai loʻu faamoemoe i isi e ala i le tāina o tusi ma imeli. Ina ia mafai ona matou talanoa ma isi e iai se laupapa o loo iai mataʻitusi o le alafapeta. E faasolosolo ona tusi le lima o le tagata o loo uuina lenā laupapa i mataʻitusi o loo i ai. Pe a sesē le mataʻitusi e faasino i ai, ona pupula tele lea o oʻu mata ae pe a saʻo le mataʻitusi e faasino ona ou moeiini lea. E faaauau pea ona matou faia lenā mea, ina ia maua ai upu ma fuaiupu. O nisi o tuafāfine e masani ona latou faaaluina le tele o le taimi ma aʻu, ua matuā popoto lava i le mateina o mea ou te taʻuina atu. O nisi taimi e sesē ai upu e latou te mateina ma matou taliē ai.

 “E ese loʻu fiafia e auai i mea fai a le faapotopotoga. Ou te auai e lē aunoa i sauniga lea ua faaaogā ai polokalame i le initaneti. Ou te tāina i lalo aʻu tali i vaega o fesili ma tali ona faitau lea e se isi. Ou te auai foʻi i se vaega toʻaitiiti o Molimau e matamata faatasi polokalame o le TV i le Initaneti a Molimau a Ieova. a

 “Ua 23 nei tausaga o oʻu maua i lenei maʻi. E iai taimi ou te matuā faanoanoa ai lava. Peitaʻi ua mafai ona ou fesagaʻia na taimi faigatā e ala i le tatalo, faifaimea faatasi ma uso ma tuafāfine, ma pisi pea faaleagaga. O le mea moni, o le fesoasoani a le faapotopotoga ua mafai ai ona ou paeonia lagolago i le silia ma le ono tausaga. Ou te taumafai malosi e avea aʻu ma faaaʻoaʻoga lelei i si aʻu tama o Alessandro, lea ua faaipoipo nei ma ua avea o se toeaina. O loo la galulue nei ma lana avā o ni paeonia sauatoa.

 “E masani ona ou manatunatu loloto i mea o le a mafai ona ou faia i le parataiso i le lumanaʻi. O le mea muamua lava ou te manaʻo e fai o le talanoa lea e faatatau iā Ieova e faaaogā ai loʻu lava leo. Ou te manaʻo ou te savalivali i tafatafa o se vaitafe i nuu mao tua ma olioli i le matagofie o lona laufanua. Talu ai ua silia nei ma le 20 tausaga o fafaga aʻu i meaʻai faasuāvaia e ala i se faagaʻau, o lea ou te matuā naunau lava e tau mai se apu ma ʻai. Talu ai ona o aʻu o se Italia, ou te matuā tulimataʻia la le kukaina ma le taumafaina o meaʻai Italia e sili ona ou fiafia i ai e aofia ai ma le pizza!

 “Ua puipuia loʻu mafaufau e “le faamoemoe i le faaolataga.” (1 Tesalonia 5:8) O le faaataina o loʻu iai i le lalolagi fou, ua ou maua ai le olioli e ui i loʻu maʻi ma ua ou mautinoa ua lata ona aveesea. Ioe ou te matuā naunau lava e olioli i “le ola moni,” lea na folafola mai e Ieova o le a ia aumaia iā i tatou e ala i lona Malo.”—1 Timoteo 6:19; Mataio 6:9, 10.