Na ou fanau i le aai o Calgary i Alberta i Kanata. Na teteʻa oʻu mātua a o oʻu pepe, o lea, na ma nonofo ai ma loʻu tinā i le fale o ona mātua. E ese le alolofa o mātua o loʻu tinā iā maʻua, ma na matuā ou fiafia lava a o oʻu laʻitiiti. Ou te manatua pea na taimi fiafia.

 I le fitu o oʻu tausaga, na suia ai loʻu olaga i se olaga leaga ina ua toe faaipoipo oʻu mātua ma matou siitia ai i St. Louis, Missouri, i le Iunaite Setete. E leʻi umi ae ou iloa le sauā o loʻu tamā. O se faaaʻoaʻoga, ina ua ou foʻi mai i le fale i loʻu aso muamua i laʻu aʻoga fou, na iloa ai e loʻu tamā na fasi aʻu e tamaiti i le aʻoga, ae e leai saʻu mea na faia i ai. Na matuā ita loʻu tamā ma fasi tigāina aʻu. O lenā mea na ou aʻoaʻoina mai ai se lesona, ina ua faatoʻā fitu oʻu tausaga na matou fufusu ai ma isi tamaiti.

 Na matuā lē fiafia loʻu tinā i uiga lotoa o loʻu tamā ma e masani ona la vevesi ma leoleoā. I le 11 o oʻu tausaga, na amata ai ona ou faaaogāina fualaau faasāina ma le ʻava malosi. Na faateteleina loʻu lotoa ma e masani ona matou fufusu ma isi tamaiti. I le taimi na ou faauu mai ai i le aʻoga maualuga, na matuā suia loʻu olaga i se olaga sauā.

 I le 18 o oʻu tausaga, na ou auai ai i le Maligi a Amerika. O i inā na toleni ai aʻu i tomai e fasioti ai tagata ma na atili faamalosia ai loʻu lotoa. I le lima tausaga mulimuli ane ai, na ou tuua ai le Maligi ae faaauau aʻu aʻoga i le Iunivesite ina ia avea ai aʻu ma leoleo nanā a le malo o Amerika e taʻua o le Federal Bureau of Investigation. Na amata aʻu aʻoga i le Iunivesite i Amerika ae na faaauau i Kanata ina ua ou toe siitia i ai.

 I le Iunivesite, na matuā ou lē toe talitonuina ai tagata ma a latou faalapotopotoga. Iā te aʻu, e manatu faapito tagata ma o mea uma i le lalolagi e foliga e leai se aogā, e leai foʻi se vaifofō o faafitauli o tagata. Na matuā leai soʻu faamoemoe e mafai e tagata ona toe faaleleia le lalolagi.

 Ona e leʻi iai se fuafuaga o loʻu olaga, e na o le onā, faaaogā sesē fualaau faasāina ma pupū i le saʻilia o tupe ma le faia o feusuaʻiga lē mamā mea na ou taulaʻi i ai. E na o le pau le mea na i loʻu mafaufau o le suʻe o se mea e patī ai, ma se fafine e ma te momoe. O toleniga na ou maua mai i le vaegaʻau, na faamalosia ai aʻu e faamisa. Na ou faia lava e aʻu mea ou te iloa e saʻo, o le māfuaaga lenā ou te leʻi faatalatū ai e fesoasoani i so o se tagata na ou vaai o faileagaina. Ae o le mea moni na atili ai ona avea aʻu ma pologa i faiga sauā.

 I se tasi o aso a o ma i ai i le potu pito i lalo o le matou fale ma saʻu uō, na ma felelei i fualaau faasāina, ma na ma sauni foʻi e auina atu ni mariuana i se isi atunuu. Na fesili mai laʻu uō po ou te talitonu i le Atua. Na ou fai i ai, “Pe afai o le Atua le māfuaaga o mafatiaga i le lalolagi, ou te lē fia iloa la o ia.” I le aso e sosoo ai, o le aso muamua lea i laʻu galuega fou, na fesili mai ai se Molimau a Ieova e ma te faigaluega faatasi, “O le ā sou manatu, pe e tuuaʻia le Atua i mafatiaga o loo tutupu i le lalolagi?” Na faateʻia aʻu i lenā fesili ma na ou fia iloaina le tali. I le ono masina na sosoo ai, e tele taimi na ma talanoa ai ma na ia faaali mai foʻi tali a le Tusi Paia i nisi o aʻu fesili e sili ona faigatā e faatatau i le olaga.

 O laʻu uō teine lea na ma nonofo i le taimi lenā, e leʻi fia faalogo i mea na ou aʻoaʻoina. I se tasi Aso Sa na ou fai i ai, na ou valaaulia Molimau a Ieova e ō mai i lo ma fale e matou te suʻesuʻeina le Tusi Paia. Ou te foʻi mai i le aso na sosoo ai mai i le galuega, ua alu ma ave uma mea nai le fale. Na ou alu i fafo ma ou tagi ai ma na ou tatalo faatauanau foʻi i le Atua mo lana fesoasoani. O le taimi muamua lenā na ou faaaogāina ai i laʻu tatalo le suafa o le Atua, o Ieova.—Salamo 83:18.

 I le lua aso na sosoo ai, na faia ai laʻu suʻesuʻega faale-Tusi Paia mo le taimi muamua ma se ulugalii Molimau a Ieova. Ina ua la tuua aʻu, na faaauau pea ona ou faitauina le tusi E Mafai Ona E Ola e Faavavau i Parataiso i Le Lalolagi, ma na uma lelei ona ou faitauina i lenā pō. a Na pāʻia loʻu loto i mea na ou aʻoaʻoina e faatatau iā Ieova le Atua, ma lona Alo o Iesu Keriso. Na ou iloa ai e alofa mutimutivale Ieova, ma e tigā lona finagalo pe a tatou mafatia. (Isaia 63:9) Na matuā sili ona pāʻia loʻu loto i le alofa o le Atua iā te aʻu ma le taulaga togiola na faia e lona Alo mo aʻu. (1 Ioane 4:10) Na ou iloa sa onosaʻi pea Ieova iā te aʻu, “auā e lē finagalo o ia e faaumatia se tasi, ae e finagalo ia oo uma lava i le salamō.” (2 Peteru 3:9) Na ou lagona le tosina atu o aʻu e Ieova.—Ioane 6:44.

 Na amata ona ou auai i sauniga a le faapotopotoga i le vaiaso lava lenā. Sa uumi loʻu ulu i le taimi lenā, fai oʻu tautaliga ma oʻu foliga faafefe tagata, ae na faafeiloaʻi aʻu e Molimau a Ieova e pei o se tauaiga ua leva e leʻi toe feiloaʻi. Na latou faaalia uiga o Kerisiano moni. Na ou lagonaina e pei lava ua matou toe nonofo ma mātua o loʻu tinā i se siʻomaga e sili atu ona lelei.

 E leʻi umi ae amata ona suia loʻu olaga ona o mea na ou aʻoaʻoina mai i le Tusi Paia. Na ʻoti loʻu ulu, lē toe faia feusuaʻiga lē mamā ma na tuu foʻi loʻu onā ma lē toe faaaogāina fualaau faasāina. (1 Korinito 6:9, 10; 11:14) Na ou manaʻo e faafiafia le finagalo o Ieova. Ina ua ou aʻoaʻoina e lē fiafia Ieova i mea leaga na ou faia, ou te leʻi taumafai e fai ni faamolemolega. Ae na pei e tuia e se isi loʻu fatu. Na ou faapea ifo, ʻOu te lē toe faia na mea leaga.’ Ou te leʻi faatalatū e faia suiga i oʻu mafaufauga ma oʻu uiga. O le iʻuga, na ou lagona ai le aogā o le faia o mea i le auala a Ieova. Iā Iulai 29 i le 1989 na ou papatiso ai o se tasi o Molimau a Ieova, ina ua pe ā ma le ono masina talu ona fai laʻu suʻesuʻega faale-Tusi Paia.

 Ua fesoasoani le Tusi Paia e suia oʻu uiga. I le taimi ou te leʻi mauaina ai le upu moni, e masani ona ou faamisa pe a fia ulavale mai se isi. Ae i le taimi lenei, ua ou taumafai malosi e “nonofo filemu ma tagata uma.” (Roma 12:18) E lē o ni aʻu lava taumafaiga ua mafai ai ona ou faia nei suiga, ae ou te faafetaia Ieova ona o le malosi o loo i lana Afioga ma lona agaga paia ua mafai ai ona ou faia suiga.—Kalatia 5:22, 23; Eperu 4:12.

 Ua lē toe avea nei aʻu ma pologa i fualaau faasāina, faiga sauā ma amioga lē mamā, ae ua ou taumafai nei e faafiafia le finagalo o Ieova le Atua ma fai le mea sili e auauna ai iā te ia. O loo oʻu fesoasoani foʻi i isi e iloa Ieova. I ni nai tausaga talu ona ou papatiso, na ou siitia ai i se isi itu o le lalolagi i le mea o loo tele ai le manaʻoga mo tagata talaʻi. Na faafiafiaina aʻu i le aʻoaʻoina o le toʻatele o tagata i le Tusi Paia ma vaaia le suia e le Tusi Paia o o latou olaga. Ua matuā ou fiafia foʻi ona ua avea nei loʻu tinā ma se Molimau a Ieova ona o suiga lelei na ia mātauina i oʻu uiga ma aʻu amio.

 I le 1999 i El Salvador, na ou faauu mai ai i le aʻoga lea ua taʻua nei o le Aʻoga mo Tagata Talaʻi o le Malo. Na aʻoaʻoina aʻu i lenā aʻoga ina ia taulamua i le galuega talaʻi, aʻoaʻoina ma le tausia o le faapotopotoga. Mulimuli ane i lenā tausaga, na ou faaipoipo ai i laʻu avā pele o Eugenia. O loo ma auauna nei o ni tagata talaʻi faataimi atoa i Guatemala.

 I le taimi nei ua matuā faatumulia loʻu olaga i le fiafia. O le faatatauina o aʻoaʻoga a le Tusi Paia, ua ou saʻoloto mai ai i amioga lē mamā tau feusuaʻiga, ma le sauā, ae ua faatumulia ai loʻu olaga i le alofa moni ma le filemu.