Na ou fanau i Uganda i le itumalo o Gomba. O le toʻatele o tagata e nonofo ai e matitiva. E leai se eletise i le taulaga na matou nonofo ai, ma i le pō e matou te faaaogāina ai molī fagu.

 O oʻu mātua o ni fai faatoʻaga, ma na siitia i Uganda mai i Rwanda. Na la totōina i le la faatoʻaga kofe ma faʻi, ma na la faia mai i faʻi se pia e taʻua o le waragi e lauiloa i Uganda. Na iai foʻi le la lafu moa, ʻoti, puaa ma povi. O la matou aganuu ma le auala na tausia aʻe ai aʻu, na ou talitonu ai e tatau i le avā ona usiusitaʻi i le tane i taimi uma, ma e lē tatau ona faaalia sona manatu.

 Ina ua 23 oʻu tausaga, na ou siitia ai i Rwanda ma auai ai i falesiva ma isi tamaiti e matou te tupulaga. E iai le falesiva e masani lava ona ou alu ai, o lea na aumai ai e le pulega se pepa e faataga ai ona ou ulu fua i so o se taimi. Na ou fiafia foʻi i ata tifaga tau ma ata e iai vaaiga e matuā sauā. O loʻu siʻomaga ma faafiafiaga na ou fiafia ai, na taaʻina ai aʻu e avea o se tagata sauā, ola i se olaga lē mamā ma onā.

 I le 2000, na ma nonofo ai ma se teine talavou e igoa iā Skolastique Kabagwira, ma e toʻatolu le ma fanau. E pei ona ou aʻoaʻoina i le taimi a o oʻu laʻitiiti, na ou faatalitalia laʻu avā e tootuli i oʻu luma i taimi uma e na te faafeiloaʻia ai aʻu, pe talosaga mai foʻi i se mea. Na ou manatu foʻi o meatotino uma a le matou aiga ou te pule ai. E masani ona ou alu ou te tafao i le pō ma toe foʻi i le fale i le tolu i le vaveao e tau i le ua. Ou te fasia Skolastique pe a ou oo i le fale ma tuʻituʻi le faitotoʻa ae tuai ona tatala mai.

 I lenā taimi, na ou vaavaaia ai se kamupani e puipuia meatotino a tagata ma na lelei loʻu totogi. Na taumafai Skolastique e faalaeiau aʻu e auai i lana lotu Penetekoso ma lona mafaufau e suia ai oʻu uiga. Ae ou te leʻi manaʻo ai. Nai lo lea, na ou faauō i se isi fafine. Talu ai o loʻu sauā ma le ola i se olaga lē mamā, na ō ese ai Skolastique ma le ma fanau e toʻatolu ma nonofo faatasi ma ona mātua.

 Na talanoa mai saʻu uō e matua atu iā te aʻu i le ituaiga olaga na ou ola ai. Na ia faalaeiauina aʻu ou te toe foʻi iā Skolastique. Na ia faapea mai e lē talafeagai ona ola eseese le ma fanau aulelei mai i lo latou tamā. O lea, i le 2005 na ou lē toe inu ai, ma tuua le isi fafine. Na ou toe foʻi loa iā Skolastique ma na ma faaipoipo i le 2006. Peitaʻi, na ou sauā pea i laʻu avā.

 I le 2008, na asiasi mai ai se tasi o Molimau a Ieova e igoa iā Joël i lo matou aiga, ma na ou faalogologo lelei i lana talaʻiga. Na asiasi mai e lē aunoa Joël ma se isi molimau e igoa iā Bonaventure mo ni masina. E tele mataupu faale-Tusi Paia na matou talanoa ai ma na ou finau i ai. E tele aʻu fesili na fai aemaise lava i le tusi o Faaaliga. Na ou taumafai e faamaonia atu le sesē o Molimau a Ieova. O se faataʻitaʻiga, na ou fesili i ai pe faapefea ona latou fai mai o le “motu o tagata e toʻatele” o loo taʻua i le Faaaliga 7:9 e ola i le lalolagi, a o lea e taʻua i le mau o loo “tutū i luma o le nofoālii [o le Atua] ma i luma o le Tamaʻi Mamoe,” o Iesu Keriso. Na onosaʻi pea Joël i le taliina o aʻu fesili. O se faataʻitaʻiga, na ia faailoa mai le Isaia 66:1 lea o loo taʻua ai o le lalolagi o le mea lea e ʻtū ai vae’ o le Atua. O le mea moni la, o loo tutū le motu o tagata e toʻatele i le lalolagi, i luma o le nofoālii o le Atua. Na ou faitau foʻi i le Salamo 37:29 lea o loo faapea mai, o le a ola e faavavau tagata amiotonu i le lalolagi.

 Mulimuli ane, na ou malie loa e fai laʻu suʻesuʻega faale-Tusi Paia. O lea, na ma suʻesuʻeina ai ma Skolastique le Tusi Paia ma Bonaventure. A o ma suʻesuʻeina le Tusi Paia, na ou manaʻo ai e fai ni suiga i loʻu olaga. Na ou aʻoaʻoina le auala faaaloalo e feutagaʻi ai ma laʻu avā. Ou te leʻi toe manaʻo e tootuli laʻu avā i oʻu luma pe a ia faafeiloaʻia aʻu, pe talosaga mai i se mea. Na ou lē toe manatu ou te pule i meatotino uma a lo matou aiga. Ou te leʻi toe matamata foʻi i ni ata tifaga sauā. Na faigatā ona ou faia na suiga ma na manaʻomia ai le lotomaulalo ma le matuā pulea o aʻu lava ia.

 I tausaga muamua atu, na ou avea ai loʻu atalii o Christian le ma ulumatua e nonofo faatasi ma oʻu tauaiga i Uganda. Ae ina ua ou faitau i le Teuteronome 6:4-7, na ou iloa ai o le ma tiute tauave ma laʻu avā i luma o le Atua le tausia o le ma fanau. E aofia ai le aʻoaʻoina o i latou i mataupu silisili a le Atua. Maʻeu lo matou fiafia ma Christian ina ua ma toe aumaia o ia i lo matou aiga!

 Na ou aʻoaʻoina o Ieova o se Atua e alofa mutimutivale, ma na ou mautinoa ua faamagaloina aʻu e Ieova mai i agasala na ou faia i le taimi ua teʻa. Na ou fiafia tele ina ua auai Skolastique i le suʻesuʻeina o le Tusi Paia. Na tuuina atu o ma ola iā Ieova ma na ma papatiso ai loa iā Tesema 4, 2010. I le taimi nei, ua maufaatuatuaina e le tasi le isi ma olioli i le faatatauina o mataupu silisili a le Tusi Paia i lo matou aiga. Ua matuā fiafia laʻu avā i loʻu mānava ma sau saʻo i le fale. Ua ia talisapaia foʻi le auala agalelei ma faaaloalo ua ou faaalia iā te ia. Ua ou filifili e lē toe inu i se ʻava malosi ma ua lē toe avea aʻu o se tagata sauā. I le 2015, na tofia ai aʻu o se toeaina e fesoasoani i le leoleoina o mamoe a Ieova i le faapotopotoga. E toʻalima le ma fanau, ma e toʻatolu ua papatiso.

 Ina ua amata ona ou suʻesuʻeina le Tusi Paia ma Molimau a Ieova, ou te leʻi taliaina mea na latou aʻoaʻoina ai aʻu e aunoa ma ni faamaoniga. Ae na ou maofa i lo latou faaaogāina o le Tusi Paia e tali ai aʻu fesili. Ua matuā ma talisapaia ma Skolastique le iloaina, o ē e auauna i le Atua moni e tatau ona ola e tusa ma ana tapulaa, ae lē o le taumafai e faafetaui tapulaa a le Atua i le mea e manaʻo ai. Ou te matuā lotofaafetai foʻi ona ua tosina atu aʻu e Ieova iā te ia, ma avea ma vaega o lona aiga faaleagaga. Pe a toe mafaufau i le olaga na ou ola ai, ua ou mautinoa ai o le fesoasoani a le Atua e mafai ai e so o se tagata faamaoni ona faia suiga manaʻomia i lona olaga, ina ia faafiafiaina ai le Atua.