1 Samueri 25:1-44
25 Kwapera nguva yakati, Samueri+ akafa; vaIsraeri vose vakaungana, vakamuchema,+ vakamuviga pamba pake muRama.+ Dhavhidhi akabva asimuka, akaenda kurenje reParani.+
2 Zvino muMaoni+ maiva nomumwe murume, uye aishandira muKameri.+ Murume wacho akanga ari mukuru kwazvo, akanga aine makwai zviuru zvitatu nembudzi chiuru; uye aiveura+ makwai ake muKameri.
3 Murume wacho ainzi Nabhari,+ uye mudzimai wake ainzi Abhigairi.+ Mudzimai wacho akanga akangwara+ uye aine chimiro chakanaka, asi murume wacho akanga aine hasha uye akaipa pamabasa ake;+ uye aiva muKarebhi.+
4 Dhavhidhi akanzwa ari murenje kuti Nabhari akanga achiveura+ makwai ake.
5 Naizvozvo Dhavhidhi akatuma varume gumi, Dhavhidhi akati kuvarume vacho: “Kwirai kuKameri, musvike kuna Nabhari, mumubvunze kuti akadini+ nezita rangu.
6 Muti kuhama yangu, ‘Iva norugare+ uye imba yakowo ngaive norugare nezvose zvauinazvo ngazvive norugare.
7 Zvino ndanzwa kuti une vaveuri. Takanga tiine vafudzi vako.+ Hatina kuvanetsa,+ uye hapana kana chavo chakashayikwa mazuva ose avakanga vari kuKameri.
8 Bvunza varume vako, vachakuudza, kuti unzwire nyasha varume vangu, nokuti tauya pazuva rakanaka. Ndapota, chingopa vashandi vako nomwanakomana wako Dhavhidhi chero chauinacho.’”+
9 Naizvozvo varume vaDhavhidhi vakasvika, vakataurira Nabhari maererano nemashoko aya ose nezita raDhavhidhi vachibva vamirira.
10 Nabhari akabva apindura vashandi vaDhavhidhi, akati: “Dhavhidhi ndianiko,+ uye mwanakomana waJese ndianiko? Mazuva ano vashandi vari kutiza, mumwe nomumwe achitiza tenzi wake, vawanda.+
11 Zvino nditore chingwa+ changu nemvura yangu nenyama yangu yandaurayira vaveuri vangu ndopa varume vandisingatombozivi kwavanobva here?”+
12 Varume vaDhavhidhi vakabva vatendeuka, vakadzokera, vakasvika, vakamuudza maererano nemashoko ose aya.
13 Dhavhidhi akabva ati kuvarume vake: “Munhu wose ngaasungirire bakatwa rake!”+ Nokudaro mumwe nomumwe akasungirira bakatwa rake uye Dhavhidhi akasungirirawo bakatwa rake; vakatanga kutevera Dhavhidhi, varume vanenge mazana mana, asi mazana maviri akanga akagara pedyo nomukwende.+
14 Munguva iyi, mumwe wevarume vacho akaudza Abhigairi, mudzimai waNabhari, achiti: “Tarirai! Dhavhidhi atuma nhume kubva kurenje kuti dzizokwazisa tenzi wedu, asi iye adzituka+ kwazvo.
15 Varume vacho vakanga vakanaka kwazvo kwatiri, havana kutinetsa, uye hatina kana chatakashayiwa mazuva ose atakafamba-famba navo patakanga tiri musango.+
16 Vakava rusvingo+ kumativi edu ose usiku nemasikati, mazuva ose atakanga tiinavo, tichifudza makwai.
17 Zvino zivai, muone zvamuchaita, nokuti tenzi wedu neimba yake yose vasarudzirwa dambudziko,+ zvaakanyanya kuva munhu pasina+ kuti titaure naye.”
18 Abhigairi+ akabva achimbidza, akatora zvingwa mazana maviri nezvirongo zvikuru zvewaini+ zviviri nemakwai mashanu akagadzirwa+ nemaseya mashanu ezviyo zvakakangwa+ nemakeke emazambiringa akaomeswa+ zana nemakeke emaonde akasvinwa+ mazana maviri, akazviisa pambongoro.
19 Akabva ati kumajaya ake: “Tungamirai.+ Tarirai! Ndiri kukuteverai.” Asi haana zvaakaudza murume wake Nabhari.
20 Paakanga akatasva mbongoro+ achiburuka mugomo chinyararire, chokwadi Dhavhidhi nevarume vake vakanga vachiuya kuzosangana naye. Naizvozvo akasangana navo.
21 Asi Dhavhidhi, akanga ati: “Ndakarinda zvinhu zvose zvomunhu uyu murenje kuti ndiodzwe mwoyo zvangu uye hapana kana chimwe chete pazvinhu zvake chakashayikwa,+ asi anonditsiva zvakaipa nokuda kwezvakanaka.+
22 Naizvozvo Mwari ngaaitire vavengi vaDhavhidhi saizvozvo uye ngaawedzere pazviri+ kana ndikarega ani naani wevanhurume+ vake vose ari mupenyu kusvikira mangwanani.”+
23 Abhigairi paakaona Dhavhidhi, akabva achimbidza, akaburuka pambongoro, akawira pasi nechiso chake pamberi paDhavhidhi, akakotama.+
24 Akabva awira patsoka dzake,+ akati: “Kukanganisa ngakuve pandiri,+ haiwa ishe wangu; ndapota, murandasikana wenyu ngaataure muchinzwa,+ uye teererai mashoko omurandasikana wenyu.
25 Ndapota, ishe wangu ngaarege kuisa mwoyo wake pamurume uyu pasina,+ iye Nabhari, nokuti zvakaita zita rake, ndizvo zvaakaita. Zita rake ndiNabhari, uye upenzi huri maari.+ Ini murandasikana wenyu, handina kuona varume vashe wangu vamanga matuma.
26 Zvino, ishe wangu, naJehovha mupenyu+ uye nomweya wenyu mupenyu,+ Jehovha akudzivisai+ kuva nemhosva yeropa+ uye kuita kuti ruoko rwenyu rukuponesei.+ Zvino vavengi venyu nevaya vari kutsvaka kuitira ishe wangu zvinokuvadza ngavave saNabhari.+
27 Zvino chipo chokuonga+ ichi chaunzwa nomushandikadzi wenyu kunashe wangu, ngachipiwe varume vari kufamba-famba vachitevera tsoka+ dzashe wangu.
28 Ndapota, regererai kudarika kwomurandasikana wenyu,+ nokuti chokwadi Jehovha achaitira ishe wangu imba inogara kwenguva refu,+ nokuti ishe wangu ari kurwa hondo dzaJehovha;+ uye zvakaipa hazvizowaniki mamuri mazuva enyu ose.+
29 Munhu paanosimuka kuti akudzingirirei nokutsvaka nzira yokuuraya mweya wenyu, mweya washe wangu uchava wakaputirwa muhomwe youpenyu+ naJehovha Mwari wenyu;+ asi mweya yevavengi venyu, achaipotsera sokunge kuti iri kubva muchipfuramabwe.+
30 Nokuti Jehovha achaitira ishe wangu zvakanaka maererano nezvose zvaakataura, achakurayirai kuti muve mutungamiriri waIsraeri.+
31 Izvi ngazvirege kukudzungaidzai kana kuti kuva chinhu chinogumbura mwoyo watenzi wangu, nokuteura ropa pasina chikonzero+ uye nokuita kuti ruoko rwashe wangu rumuponese.+ Jehovha achaitira ishe wangu zvakanaka, uye yeukai+ murandasikana wenyu.”
32 Dhavhidhi akabva ati kuna Abhigairi: “Jehovha Mwari waIsraeri ngaarumbidzwe,+ akutuma nhasi kuti usangane neni!
33 Kuchenjera+ kwako ngakukomborerwe, uye komborerwa iwe wandidzivisa nhasi kuti ndirege kuva nemhosva yeropa+ uye ndiite kuti ruoko rwangu rundiponese.+
34 Uyewo, naJehovha Mwari waIsraeri mupenyu, andidzivisa kukuitira chinhu chinokuvadza,+ kudai wanga usina kuchimbidza kuti usangane neni,+ chokwadi Nabhari angadai asina kusarirwa nomunhurume+ chero upi zvake kusvikira kwaedza mangwanani.”
35 Naizvozvo Dhavhidhi akagamuchira paruoko rwake zvaakanga amuunzira, akati kwaari: “Enda kumba kwako norugare.+ Ona, ndateerera inzwi rako kuti ndive nehanya+ newe.”
36 Gare gare Abhigairi akapinda maiva naNabhari, akamuwana achiita mutambo mumba make wakafanana nomutambo wamambo;+ uye mwoyo waNabhari waifara, uye akanga akadhakwa+ kwazvo; asi haana kana kumuudza chinhu, chiduku kana chikuru, kusvikira kwaedza mangwanani.
37 Mangwanani, Nabhari paakanga apengenuka pawaini, mudzimai wake akamuudza zvinhu izvi. Mwoyo+ wake ukava wakafa mukati make, iye akaita sedombo.
38 Pashure paizvozvo mazuva anenge gumi akapfuura, Jehovha akabva arova+ Nabhari, zvokuti akafa.
39 Zvino Dhavhidhi akanzwa kuti Nabhari akanga afa, nokudaro akati: “Jehovha ngaarumbidzwe, areverera mhosva+ yokuzvidzwa+ kwangu kuti andisunungure paruoko rwaNabhari uye adzora mushumiri wake pakuita zvakaipa,+ uye Jehovha adzorera zvakaipa zvaNabhari pamusoro wake!”+ Dhavhidhi akatuma shoko kunokumbira Abhigairi kuti amutore ave mudzimai wake.+
40 Naizvozvo vashandi vaDhavhidhi vakasvika kuna Abhigairi kuKameri, vakataura naye, vachiti: “Dhavhidhi atituma kwamuri kuti tikutorei muve mudzimai wake.”
41 Akabva asimuka, akakotama, chiso chake chakatarira pasi,+ akati: “Heuno murandasikana wenyu kuti ave mushandikadzi wokuti ageze tsoka+ dzevashandi vashe wangu.”+
42 Abhigairi+ akabva achimbidza, akasimuka, akatasva+ mbongoro, vashandikadzi vake vashanu vachifamba vari shure kwake; uye akaenda nenhume dzaDhavhidhi akabva ava mudzimai wake.
43 Dhavhidhi akanga atorawo Ahinoamu+ wokuJezreeri;+ uye vakadzi vacho, vari vaviri, vakava madzimai ake.+
44 Asi Sauro akanga apa mwanasikana wake Mikari,+ mudzimai waDhavhidhi kuna Pariti+ mwanakomana waRaishi, wokuGarimu.+
