Dheuteronomi 15:1-23
15 “Panopera makore manomwe oga oga unofanira kusunungura.
2 Aya ndiwo masununguriro aunofanira kuita:+ mukweretesi wose achasunungura chikwereti chaangaita kuti mumwe wake ave nacho. Haafaniri kumanikidza mumwe wake kana hama yake kuti iripe,+ nokuti kusunungura kunoitirwa Jehovha kunofanira kuziviswa.+
3 Ungamanikidza wokune imwe nyika+ kuti aripe; asi ruoko rwako ngarusunungure chero chinhu chako chipi zvacho chingava chiine hama yako.
4 Zvisinei, pakati pako hapana anofanira kuva murombo, nokuti chokwadi Jehovha achakukomborera+ munyika yauri kupiwa naJehovha Mwari wako senhaka kuti uitore ive yako,+
5 kana ukangoteerera inzwi raJehovha Mwari wako kuti uchenjerere kuita murayiro uyu wose wandiri kukurayira nhasi.+
6 Nokuti Jehovha Mwari wako achakukomborera sezvaakakupikira, uye uchakweretesa+ marudzi mazhinji uchiwana chokumbofanobata, asi iwe hauzokwereti; uchatonga marudzi mazhinji, asi iwo haazokutongi.+
7 “Kana imwe yehama dzako ikava murombo pakati pako mune rimwe remaguta ako, munyika yako yauri kupiwa naJehovha Mwari wako, usaomesa mwoyo wako kana kupfumbatira ruoko rwako kuhama yako murombo.+
8 Nokuti unofanira kupfumbanura ruoko rwako norupo kwaari,+ uye unotofanira kumukweretesa uchiwana chokumbofanobata maererano nezvaanoda, zvaanoshayiwa.
9 Chenjerera kuti shoko rakaipa rirege kuva mumwoyo mako,+ uchiti, ‘Gore rechinomwe, gore rokusunungura, rava pedyo,’+ ziso rako rova risina rupo kuhama yako murombo,+ worega kumupa chinhu, iye oshevedzera kuna Jehovha pamusoro pako,+ chikava chivi kwauri.+
10 Unotofanira kumupa,+ mwoyo wako haufaniri kuomera paunomupa, nokuti Jehovha Mwari wako achakukomborera nokuda kweizvi mumabasa ako ose uye pane zvose zvaunoita.+
11 Nokuti murombo haazomboshayikwi munyika.+ Ndokusaka ndiri kukurayira, ndichiti, ‘Unofanira kupfumbanura ruoko rwako norupo kuhama yako inotambudzika uye iri murombo iri munyika yako.’+
12 “Kana ukatengeserwa hama yako, muHebheru kana mukadzi muHebheru,+ akakushandira kwemakore matanhatu, mugore rechinomwe unofanira kubva wamuendesa abve kwauri somunhu akasununguka.+
13 Kana ukamuendesa achibva kwauri asununguka, usamuendesa asina chinhu.+
14 Umugovere chimwe chinhu chinobva paboka rako rezvipfuwo nepaburiro rako nepachisviniro chako chemafuta nechewaini. Umupe sokukomborerwa kwawakaitwa naJehovha Mwari wako.+
15 Unofanira kuyeuka kuti iwe wakava muranda munyika yeIjipiti, Jehovha Mwari wako akakudzikinura.+ Ndokusaka ndiri kukurayira chinhu ichi nhasi.
16 “Kana akati kwauri, ‘Handidi hangu kukusiyai!’ nokuti anokuda uye anoda imba yako, zvazvaiva zvakamunakira paaiva newe,+
17 unofanirawo kutora mutsunda, uboorere nzeve yake pasuo, uye ngaave muranda wako nokusingagumi.+ Uitewo seizvi kumurandasikana wako.
18 Ngazvirege kuva zvinhu zvakakuomera paunomurega achienda achibva kwauri somunhu akasununguka;+ nokuti akakushandira kwemakore matanhatu basa rinoenzanirana nomubhadharo womunhu wemaricho+ wakapetwa kaviri, uye Jehovha Mwari wako akakukomborera mune zvose zvawaiita.+
19 “Utsaurire Jehovha Mwari wako mukono wose unotanga kuberekwa pamombe dzako nepamakwai ako.+ Usaita basa nenzombe yako inotanga kuberekwa, kana kuveura mwana anotanga kuberekwa pamakwai ako.+
20 Unofanira kuudya pamberi paJehovha Mwari wako gore negore munzvimbo ichasarudzwa naJehovha,+ iwe neimba yako.
21 Kana ukava wakaremara, uri chirema kana kuti bofu, chero urema hupi zvahwo hwakaipa, usaubayira kuna Jehovha Mwari wako.+
22 Unofanira kuudyira mukati memagedhi ako, vose zvavo, munhu akachena nomunhu asina kuchena vangadya,+ sezvinoitwa mhara uye sezvinoitwa nondo hono.+
23 Asi usadya ropa rawo.+ Unofanira kuridururira pasi semvura.+
