Genesisi 33:1-20
33 Kwapera nguva yakati, Jakobho akatarira, akaona Isau achiuya aine varume mazana mana.+ Naizvozvo akakamurira vana kuna Reya naRakeri nevashandikadzi vaviri,+
2 akaisa vashandikadzi vacho nevana vavo pamberi,+ Reya nevana vake vachivatevera,+ Rakeri naJosefa vari shure kwavo.+
3 Iye akaenda mberi kwavo akakotama kanomwe kusvikira asvika pedyo nomukoma wake.+
4 Isau akamhanya kuti asangane naye,+ akamumbundira,+ akawira pamutsipa wake, akamutsvoda, vakasvimha misodzi.
5 Akabva atarira akaona vakadzi nevana akati: “Ava vauinavo ndivanaani?” iye akati: “Vana avo Mwari akanzwira nyasha mushandi wenyu navo.”+
6 Vashandikadzi vacho vakabva vauya mberi, ivo nevana vavo, vakakotama;
7 Reya akauyawo mberi, nevana vake, vakakotama, Josefa akazouyawo mberi, naRakeri, vakakotama.+
8 Zvino akati: “Unorevei neboka rose iri revafambi vandasangana navo?”+ Iye akati: “Kuti ndinzwirwe nyasha nashe wangu.”+
9 Isau akati: “Ndine zvizhinji kwazvo, munun’una wangu.+ Zvako ngazvirambe zviri zvako.”
10 Asi Jakobho akati: “Aiwa, ndapota. Kana mandinzwira nyasha,+ ibvai matora chipo changu paruoko rwangu, nokuti maererano nechinangwa chechipo chacho ndaona chiso chenyu sokunge ndiri kuona chiso chaMwari pakuti mandigamuchira nomufaro.+
11 Ndapota, torai chipo chinoratidza kuonga kwangu chamaunzirwa,+ nokuti Mwari akandinzwira nyasha uye nokuti ndine zvinhu zvose.”+ Akaramba achimumanikidza, zvokuti akachitora.+
12 Gare gare akati: “Ngatibvei pano tiende, rega ndikutungamirire.”
13 Asi akati kwaari: “Ishe wangu anoziva kuti vana havana simba uye ndine makwai nemombe zviri kuyamwisa zvandiri kutarisira,+ vakazvimhanyisa kwezuva rimwe, boka rose rezvipfuwo richabva rafa.+
14 Ndapota, ishe wangu ngaaende mberi kwomushandi wake, asi regai ini ndipfuurire norwendo zvishoma nezvishoma maererano nokufamba kwezvipfuwo+ zviri pamberi pangu uye maererano nokufamba kwevana+ kusvikira ndasvika kunashe wangu kuSeiri.”+
15 Isau akabva ati: “Ndapota, rega ndikupe vamwe vanhu vandinavo.” Iye akati: “Muchaitirei izvi? Ishe wangu ngaandinzwire nyasha.”+
16 Naizvozvo pazuva iroro Isau akatendeuka akadzokera kuSeiri.
17 Jakobho akabva ipapo akaenda kuSukoti,+ akazvivakira imba, akaitira boka rake rezvipfuwo matumba.+ Ndokusaka akatumidza nzvimbo yacho kuti Sukoti.
18 Kwapera nguva yakati, Jakobho akasvika akachengeteka uye zvakanaka kuguta reShekemu,+ riri munyika yeKenani,+ paakanga achibva kuPadhani-aramu;+ uye akadzika musasa pakatarisana neguta racho.
19 Akabva awana chikamu chenyika maakadzika tende rake paruoko rwevanakomana vaHamori baba vaShekemu, nokuda kwezana remari.+
20 Akazomisa atari ipapo, akaitumidza kuti Mwari, iye Mwari waIsraeri.+
