Genesisi 40:1-23
40 Zvino pashure pezvinhu izvi, mudiri+ wamambo weIjipiti nomubiki vakatadzira ishe wavo mambo weIjipiti.+
2 Farao akatsamwira vakuru vaviri vaimushandira,+ mukuru wevadiri nomukuru wevabiki.+
3 Naizvozvo akavaisa mujeri reimba yomukuru wevarindi,+ mujeri,+ nzvimbo umo Josefa akanga ari musungwa.
4 Mukuru wevarindi akabva agadza Josefa kuti ave navo kuti avashandire;+ uye vakaramba vari mujeri kwemazuva akati.
5 Zvino vaviri vacho vakarota hope,+ mumwe nomumwe hope dzake pausiku humwe chete,+ mumwe nomumwe hope dzake dzine kududzirwa kwadzo,+ mudiri nomubiki vamambo weIjipiti vakanga vari vasungwa mujeri.+
6 Josefa paakapinda mavaiva mangwanani, akaona kuti vakanga vakasuruvara.+
7 Akatanga kubvunza vakuru vacho vaishandira Farao vaaiva navo mujeri reimba yatenzi wake, achiti: “Nei zviso zvenyu zvakasuruvara nhasi?”+
8 Ivo vakati kwaari: “Tarota hope, asi hatina mududziri.” Naizvozvo Josefa akati kwavari: “Kududzira hakusi kwaMwari here?+ Ndapota, rondedzerai hope dzacho kwandiri.”
9 Zvino mukuru wevadiri akarondedzera hope dzake kuna Josefa, akati kwaari: “Muhope dzangu, ndaona pamberi pangu pane muzambiringa.
10 Pamuzambiringa wacho panga pane matavi matatu, uye waita sokuti wanga uchitungira.+ Maruva awo abuda. Masumbu emazambiringa acho aibva.
11 Kapu yaFarao yanga iri muruoko rwangu, ndikatora mazambiringa acho ndikaasvinira mukapu yaFarao.+ Pashure paizvozvo ndaisa kapu yacho muruoko rwaFarao.”+
12 Josefa akabva ati kwaari: “Uku ndiko kududzirwa kwadzo:+ Matavi matatu mazuva matatu.
13 Mazuva matatu kubva zvino Farao achakusunungura okudzorera pabasa rako;+ uye uchaisa kapu yaFarao muruoko rwake, sezvawaiita pawaiva mudiri wake.+
14 Asi pazvinongokufambira zvakanaka, ndapota undiyeuke,+ undiitire mutsa worudo, uudze Farao nezvangu,+ uye undibudise muimba ino.
15 Nokuti chokwadi ndakabiwa kunyika yevaHebheru;+ uye kunowo handina kumboita chinhu chavangandiisira mugomba rejeri.”+
16 Mukuru wevabiki paakaona kuti akanga adudzira chinhu chakanaka, iyewo akati kuna Josefa: “Iniwo ndanga ndichirota, ndikaona tswanda nhatu dzechingwa chichena dzanga dziri pamusoro wangu,
17 uye mutswanda yepamusoro manga mune zvokudya zvemarudzi ose zvaFarao,+ zvinobikwa nomubiki, uye panga pane shiri+ dzanga dzichizvidya mutswanda yanga iri pamusoro wangu.”
18 Josefa akabva apindura, akati: “Uku ndiko kududzirwa kwadzo:+ Tswanda nhatu mazuva matatu.
19 Mazuva matatu kubva zvino, Farao achakusunungura obvisa musoro wako pauri uye achakuturika padanda;+ shiri dzichadya nyama yako dzichiibvisa pauri.”+
20 Zvino zuva rechitatu raiva zuva rokuberekwa kwaFarao,+ akaitira vashandi vake vose mutambo, akasunungura mukuru wevadiri nomukuru wevabiki pakati pevashandi vake.+
21 Naizvozvo akadzosa mukuru wevadiri pabasa rake rokuva mudiri,+ uye iye akaramba achiisa kapu muruoko rwaFarao.
22 Asi akaturika mukuru wevabiki,+ sezvavakanga vadudzirwa naJosefa.+
23 Zvisinei, mukuru wevadiri haana kuyeuka Josefa asi akamukanganwa.+
