Isaya 51:1-23
51 “Nditeererei, imi muri kutevera kururama,+ imi muri kutsvaka kuwana Jehovha.+ Tarirai dombo+ ramakatemwa mukabviswa pariri, uye gomba romugodhi ramakacherwa mariri.
2 Tarirai kuna Abrahamu+ baba venyu+ nokuna Sara+ akakuberekai zvishoma nezvishoma achirwadziwa nokusununguka. Nokuti akanga ari mumwe chete pandakamushevedza,+ ndikamukomborera uye ndikaita kuti awande.+
3 Nokuti Jehovha achanyaradza Ziyoni.+ Chokwadi achanyaradza nzvimbo dzaro dzose dzakaparadzwa,+ achaita kuti renje raro rive seEdheni+ uye bani raro rerenje rive somunda waJehovha.+ Kupembera nomufaro uye kufara zvichawanikwa mariri, kuonga neinzwi rokuimba.+
4 “Nditeererei, haiwa imi vanhu vangu; ndinzwei, imi boka rangu remarudzi.+ Nokuti ndichabudisa mutemo,+ uye ndichaita kuti zvandakatonga zvive chiedza kumarudzi.+
5 Kururama kwangu kwava pedyo.+ Ruponeso rwangu+ ruchabuda, uye maoko angu achatonga marudzi.+ Zvitsuwa zvichatarira kwandiri,+ uye zvichamirira ruoko rwangu.+
6 “Tarirai kumatenga,+ uye tarirai nyika iri pasi. Nokuti matenga achapararira-pararira sezvinoita utsi,+ nyika ichasakara sezvinoita nguo,+ uye vanogara mairi vachafa sezvinoita unyunyu. Asi ruponeso rwangu ruchavapo nokusingagumi,+ uye kururama kwangu hakuzoputswi.+
7 “Nditeererei, imi munoziva kururama, vanhu vane mutemo wangu mumwoyo mavo.+ Musatya kuzvidza kwevanhuwo zvavo, uye musavhundutswa nemashoko avo okutuka.+
8 Nokuti chipfukuto chichavadya sokunge kuti inguo, uye chitemamachira chichavadya sokunge kuti imvere dzemakwai.+ Asi kururama kwangu kuchavapo nokusingagumi, uye ruponeso rwangu ruchavapo kusvikira kuzvizvarwa zvisingaverengeki.”+
9 Muka, muka, pfeka simba,+ haiwa iwe ruoko rwaJehovha!+ Muka sepamazuva ekare kare, somuzvizvarwa zvomunguva yakapfuura.+ Hausi iwe wakagura-gura Rakabhi,+ wakabaya zimhuka romugungwa here?+
10 Hausi iwe wakaomesa gungwa, iyo mvura yakadzika here?+ Hausi iwe wakaita nzira panzvimbo dzakadzika dzegungwa kuti vakadzikinurwa vayambuke here?+
11 Vakadzikinurwa vaJehovha vachabva vadzoka uye vachasvika kuZiyoni vachishevedzera nomufaro,+ uye kufara nokusingagumi kuchava pamisoro yavo.+ Vachapembera nomufaro uye vachafara.+ Shungu nokugomera zvichatiza.+
12 “Ini—ndini ndiri kukunyaradzai.+
“Ndiwe ani kuti utye munhuwo zvake achafa,+ uye mwanakomana wevanhu achaitwa souswa hwakasvibirira?+
13 Ndiwe ani kuti ukanganwe Jehovha Muiti wako,+ Iye anotatamura matenga+ nokuvaka nheyo dzenyika,+ zvokuti nguva dzose waiswerotya hasha dzaiye ari kukukomberedza,+ sokunge kuti akagadzirira kukuparadza?+ Dziripi hasha dzaiye ari kukukomberedza?+
14 “Iye ari kukotama akasungwa necheni achakurumidza kusunungurwa,+ kuti arege kupinda murufu, imo mugomba+ uye kuti zvokudya zvake zvirege kushayikwa.+
15 “Asi ini, Jehovha, ndini Mwari wako, Iye anonyandura gungwa kuti mafungu aro arege kugadzikana.+ Jehovha wemauto ndiro zita rake.+
16 Ndichaisa mashoko angu mumuromo mako,+ uye ndichakufukidza nomumvuri woruoko rwangu,+ kuti ndidyare matenga+ uye ndivake nheyo dzenyika+ uye nditi kuZiyoni, ‘Muri vanhu vangu.’+
17 “Muka, muka, simuka, haiwa iwe Jerusarema,+ iwe wakanwira paruoko rwaJehovha kapu yake yehasha.+ Wakanwira mumudziyo wokunwira, iyo kapu inodzedzeresa, ukapedza yose.+
18 Kwakanga kusina kana mumwe wevanakomana+ vose vaakabereka aimutungamirira, uye kwakanga kusina kana mumwe wevanakomana vose vaakarera aimubata ruoko.+
19 Zvinhu zviviri izvozvo zvakanga zvichikuwira.+ Ndiani achakunzwira tsitsi?+ Kupambwa nokuputsika, uye nzara nebakatwa!+ Ndiani achakunyaradza?+
20 Vanakomana vako vati rukutu.+ Varara kumusoro kwemigwagwa yose segwai romusango rakabatwa mumambure,+ sevaya vakazadzwa nehasha dzaJehovha,+ iko kutuka kwaMwari wako.”+
21 Naizvozvo teerera izvi, ndapota, haiwa iwe mukadzi+ anotambudzika uye akadhakwa, asi kwete newaini.+
22 Zvanzi naIshe wako, Jehovha, iye Mwari wako, uyo anorwira+ vanhu vake: “Tarira! Ndichabvisa kapu inodzedzeresa muruoko rwako.+ Mudziyo wokunwira, kapu yangu yehasha—hauzodzokorori kuinwirazve.+
23 Ndichaiisa muruoko rwevaya vari kukutsamwisa,+ vakati kumweya wako, ‘Kotama kuti tiyambuke,’ zvokuti waisiita musana wako senyika, uye somugwagwa kune vaya vaiyambuka.”+
