Jeremiya 11:1-23
11 Iri ndiro shoko rakauya kuna Jeremiya richibva kuna Jehovha, richiti:
2 “Inzwai mashoko esungano iyi!
“Unofanira kuataura+ kuvarume vaJudha nevagari vomuJerusarema,
3 uti kwavari, ‘Zvanzi naJehovha Mwari waIsraeri: “Munhu asingateereri mashoko esungano iyi ngaatukwe,+
4 andakarayira madzitateguru enyu pazuva randakaabudisa munyika yeIjipiti,+ muvira resimbi,+ ndichiti, ‘Teererai inzwi rangu, uye itai zvinhu maererano nezvose zvandinokurayirai;+ muchava vanhu vangu uye ini ndichava Mwari wenyu,+
5 kuti ndiite mhiko yandakapikira madzitateguru enyu,+ kuti ndiape nyika inoyerera mukaka nouchi,+ sezvazvakaita nhasi.’”’”
Zvino ndakapindura ndikati: “Ameni, haiwa Jehovha.”
6 Jehovha akati kwandiri: “Zivisa mashoko aya ose mumaguta aJudha nomumigwagwa yeJerusarema,+ uchiti, ‘Inzwai, mashoko esungano iyi, muaite.+
7 Nokuti ndakarayira kwazvo madzitateguru enyu pazuva randakaabudisa munyika yeIjipiti+ kusvikira nhasi, ndichifumomuka uye ndichirayira, ndichiti: “Teererai inzwi rangu.”+
8 Asi ivo havana kuteerera kana kurereka nzeve dzavo,+ asi mumwe nomumwe akaramba achifamba mukuoma kwomwoyo wake wakaipa;+ naizvozvo ndakavaunzira mashoko ose esungano ino andakavarayira kuti vaite, asi avasina kuita.’”
9 Jehovha akatizve kwandiri: “Kumukira kwakawanikwa pakati pevarume vaJudha uye pakati pevagari vomuJerusarema.+
10 Vakadzokera kuzvikanganiso zvemadzitateguru avo+ okutanga, ayo akaramba kuteerera mashoko angu, asi akatevera vamwe vanamwari kuti avashumire.+ Imba yaIsraeri neimba yaJudha dzakaputsa sungano yangu yandakaita nemadzitateguru avo.+
11 Naizvozvo zvanzi naJehovha, ‘Tarirai ndiri kuunza dambudziko+ pavari, ravasingazokwanisi kubuda mariri;+ uye vachashevedzera kwandiri kuti vabatsirwe, asi handizovateereri.+
12 Maguta aJudha nevagari vomuJerusarema vachaenda, voshevedzera kuna vanamwari vavari kukwidzira utsi hwezvibayiro kuti vabatsirwe,+ asi hazvizovaunziri kuponeswa munguva yedambudziko ravo.+
13 Nokuti vanamwari vako vazhinji semaguta ako,+ haiwa iwe Judha; uye makaisa atari zhinji semigwagwa yeJerusarema nokuda kwechinhu chinonyadzisa,+ atari dzokuti mukwidzire Bhaari utsi hwezvibayiro.’+
14 “Zvino iwe, usanyengeterera vanhu ava, uye usachema uchiteterera nokuda kwavo kana kunyengetera,+ nokuti ndichange ndisiri kuteerera panguva yavachashevedzera kwandiri pamusoro pedambudziko ravo.+
15 “Mudiwa wangu anotsvakei muimba yangu,+ zvokuti vazhinji vavo vaite chinhu ichi,+ iko kufunga kwakaipa?+ Vachaita kuti zvipfuure zvichibva pauri nenyama tsvene,+ dambudziko rako parinouya here? Panguva iyoyo uchapembera nomufaro here?+
16 Jehovha akakutumidza kuti ‘muorivhi wakasvibirira, wakanaka une michero uye unotaridzika zvakanaka.’+ Nokutinhira kukuru, iye akatungidza moto kuti uupise, uye vakatyora mapazi awo.+
17 “Jehovha wemauto, Mudyari wako,+ akutaurira dambudziko nokuda kwezvakaipa zveimba yaIsraeri+ neimba yaJudha zvavakaita kuti vandigumbure nokukwidzira Bhaari utsi hwezvibayiro.”+
18 Jehovha akandiudza kuti ndizive. Panguva iyoyo makandionesa zvavakaita.+
19 Ndakanga ndakaita segwayana gono, rakapfava, rinounzwa kuzourayiwa,+ uye handina kuziva kuti vaindifungira mazano+ vachiti: “Ngatiparadzei muti pamwe chete nezvokudya zvawo, uye ngatimubvisei panyika yevapenyu,+ kuti zita rake rirege kuyeukwazve.”
20 Asi Jehovha wemauto anotonga nokururama;+ anoongorora itsvo nomwoyo.+ Haiwa regai ndione kuvatsiva kwenyu, nokuti ndakakuzivisai mhosva yangu.+
21 Naizvozvo zvanzi naJehovha kuvarume vokuAnatoti+ vari kutsvaka mweya wako, vachiti: “Usaprofita uchishandisa zita raJehovha,+ kuti urege kufira mumaoko edu”;
22 naizvozvo zvanzi naJehovha wemauto: “Tarirai ndiri kufunga nezvavo. Majaya achaurayiwa nebakatwa.+ Vanakomana vavo nevanasikana vavo vachafa nenzara.+
23 Hapana kunyange nevavachasarirwa navo, nokuti ndichaunza dambudziko pavarume vokuAnatoti,+ gore ravachafungwa nezvavo.”+
