Joeri 3:1-21
3 “Nokuti, tarirai! mumazuva iwayo nomunguva iyoyo,+ pandichadzosa nhapwa dzaJudha neJerusarema,+
2 ndichaunganidzawo marudzi ose+ ndoaendesa kubani raJehoshafati;+ uye ndichaatonga ikoko nokuda kwevanhu vangu nenhaka yangu Israeri,+ vavakaparadzira pakati pemamwe marudzi; uye vakagova nyika yangu.+
3 Ivo vakaramba vachikanda mijenya nokuda kwevanhu vangu;+ vaitsinhanisa mukomana kuti vawane pfambi,+ uye vakatengesa musikana nokuda kwewaini, kuti vanwe.
4 “Muneiwo chokuita neni, haiwa Tire neSidhoni+ nemi nzvimbo dzose dzeFiristiya?+ Izvi zvamuri kundiitira ndiwo mubayiro wacho here? Kana muchindiitira zvakadai, ndichatsiva zvamunondiitira pamisoro yenyu nokukurumidza,+ nokuchimbidza.
5 Nokuti makatora sirivha yangu nendarama yangu,+ uye makaenda nezvinhu zvangu zvinokosha zvinofadza kutemberi dzenyu;+
6 makatengesa vanakomana vaJudha nevanakomana vomuJerusarema+ kuvanakomana vevaGiriki,+ kuti muvabvise, muvaendese kure nenharaunda yavo;+
7 tarirai ndiri kuvamutsa kuti vauye vachibva kwamakavatengesera,+ uye ndichatsiva zvamakaita pamisoro yenyu.+
8 Ndichatengesera vanakomana venyu nevanasikana venyu mumaoko evanakomana vaJudha,+ uye vachavatengesa kuvarume vokuShebha,+ kurudzi ruri kure;+ nokuti Jehovha azvitaura.
9 “Zivisai izvi, pakati pemamwe marudzi,+ ‘Gadzirirai kurwa! Mutsai varume vane simba!+ Ngavaswedere pedyo! Varume vose vehondo ngavauye!+
10 Pfurai miromo yemagejo enyu kuti ive mapakatwa nezvokuchekereresa miti+ kuti zvive mapfumo marefu. Munhu asina simba ngaati: “Ndiri munhu ane simba.”+
11 Yamurai muuye, imi marudzi ose ari kumativi ose,+ unganai.’”+
Haiwa Jehovha, burutsirai vane simba venyu kunzvimbo iyoyo.+
12 “Marudzi ngaamutswe, auye kubani raJehoshafati;+ nokuti ndichagara pasi ikoko kuti nditonge marudzi ose ari kumativi ose.+
13 “Tambanudzai jeko renyu,+ nokuti zvinokohwewa zvaibva.+ Uyai, burukai, nokuti chisviniro chewaini chazara.+ Zvisviniro zvinofashukira; nokuti kuipa kwavo kwawanda.+
14 Mapoka evanhu, mapoka evanhu ari mubani rokusarudza,+ nokuti zuva raJehovha riri pedyo mubani rokusarudza.+
15 Zuva nomwedzi zvichasviba, uye nyeredzi hadzizopenyi.+
16 Jehovha achadzvova ari muZiyoni, uye achaita kuti inzwi rake rinzwike ari muJerusarema.+ Denga nenyika zvichazununguka;+ asi Jehovha achava nzvimbo yokupotera yevanhu vake,+ nenhare nokuda kwevanakomana vaIsraeri.+
17 Imi muchaziva kuti ndini Jehovha Mwari wenyu,+ anogara muZiyoni, iro gomo rangu dzvene.+ Jerusarema richava nzvimbo tsvene;+ uye vamwe vanhuwo zvavo havazopfuurizve nomariri.+
18 “Zvino nezuva iroro makomo achadonha waini inotapira,+ zvikomo zvichayerera mukaka, uye hova dzaJudha dzose dzichayerera mvura. Mumba maJehovha muchabuda chitubu,+ chichadiridza mupata une rukova weMibayamhondoro.+
19 Ijipiti ichava dongo;+ uye Edhomu ichava renje risina chinhu,+ nokuda kwechisimba chakaitirwa vanakomana vaJudha, vane nyika yavakateurira ropa risina mhosva.+
20 Asi nyika yaJudha, ichagarwa nokusingagumi,+ uye Jerusarema richagarwa kwezvizvarwa nezvizvarwa.+
21 Ndichati ropa ravo harina mhosva, riya randakanga ndati rine mhosva;+ uye Jehovha achange achigara muZiyoni.”+
