Pisarema 145:1-21
Rwiyo rwokurumbidza, rwaDhavhidhi.
א [ʼAʹleph]*
145 Ndichakukudzai, haiwa Mwari wangu Mambo,+Ndicharumbidza zita renyu nokusingagumi, kunyange nokusingaperi.+
ב [Behth]
2 Ndichakurumbidzai zuva rose,+Ndicharumbidza zita renyu nokusingagumi, kunyange nokusingaperi.+
ג [Giʹmel]
3 Jehovha mukuru uye anofanira kurumbidzwa kwazvo,+Ukuru hwake hahugoni kuongororwa.+
ד [Daʹleth]
4 Zvizvarwa nezvizvarwa zvicharumbidza mabasa enyu,+Zvichazivisa nezvemabasa enyu esimba.+
ה [Heʼ]
5 Kubwinya kunokudzwa kwokuremekedzwa kwenyu+Nezvinhu zvemabasa enyu anoshamisa ndizvo zvandichafungisisa.+
ו [Waw]
6 Vachataura nezvesimba rezvinhu zvenyu zvinotyisa;+Uye ndichazivisa nezvoukuru hwenyu.+
ז [Zaʹyin]
7 Vachafara kwazvo nokutaurwa kwokuwanda kwokunaka kwenyu,+Vachashevedzera nomufaro nokuda kwokururama kwenyu.+
ח [Chehth]
8 Jehovha ane nyasha nengoni,+Anononoka kutsamwa uye ane mutsa worudo kwazvo.+
ט [Tehth]
9 Jehovha akanaka kune vose,+Ngoni dzake dziri pamabasa ake ose.+
י [Yohdh]
10 Mabasa enyu ose achakukudzai, haiwa Jehovha,+Vakavimbika venyu vachakurumbidzai.+
כ [Kaph]
11 Vachataura nezvokukudzwa kwoumambo hwenyu,+Uye vachataura nezvesimba renyu,+
ל [Laʹmedh]
12 Kuti vazivise vanakomana vevanhu mabasa ake esimba+Nokukudzwa kwokubwinya kwoumambo hwake.+
מ [Mem]
13 Umambo hwenyu umambo hunogara nokusingagumi kwose,+Uye kutonga kwenyu kunogara kuripo muzvizvarwa zvose zvinotevedzana.+
ס [Saʹmekh]
14 Jehovha anotsigira vose vaya vanowa,+Uye anomutsa vose vakakotamiswa.+
ע [ʽAʹyin]
15 Maziso ezvinhu zvose anotarira kwamuri aine tariro,+Uye munozvipa zvokudya zvazvo mumwaka wazvo.+
פ [Peʼ]
16 Munopfumbanura ruoko rwenyu+Mogutsa zvinodiwa nezvinhu zvipenyu zvose.+
צ [Tsa·dhehʹ]
17 Jehovha akarurama munzira dzake dzose+Uye akavimbika mumabasa ake ose.+
ק [Qohph]
18 Jehovha ari pedyo navose vaya vanodana kwaari,+Navose vanodana kwaari zvechokwadi.+
ר [Rehsh]
19 Achaita zvinodiwa navose vanomutya,+Achanzwa kuchemera kwavo kubatsirwa, uye achavaponesa.+
ש [Shin]
20 Jehovha anorinda vose vanomuda,+Asi achatsakatisa vakaipa vose.+
ת [Taw]
21 Muromo wangu uchataura nezvokurumbidzwa kwaJehovha;+Zvipenyu zvose zvenyama ngazvirumbidze zita rake dzvene nokusingagumi, kunyange nokusingaperi.+
