Muparidzi 8:1-17
8 Ndiani aripo akafanana nomunhu akachenjera?+ Ndiani aripo anoziva kududzirwa kwechinhu?+ Uchenjeri hwomunhu hunoita kuti chiso chake chipenye, kunyange kusuruvara kwechiso chake kunochinjwa kwova nani.+
2 Ndinoti: “Chengeta murayiro wamambo,+ uite izvozvo kuti uremekedze mhiko yaMwari.+
3 Usakurumidza, kuti ubude pamberi pake.+ Usamira muchinhu chakaipa.+ Nokuti zvose zvaanofarira kuita achazviita,+
4 nokuti shoko ramambo isimba rinodzora;+ uye ndiani angati kwaari: ‘Muri kuitei?’”
5 Munhu anochengeta murayiro haazowani chinhu chero chipi zvacho chinotambudza,+ uye mwoyo wakachenjera uchaziva nguva nokutongwa.+
6 Nokuti pane nguva yakakodzera uye pane mutongo nokuda kwenyaya imwe neimwe,+ nokuti dambudziko revanhu riri pavari.+
7 Nokuti hapana anoziva zvichavapo,+ nokuti ndiani angamuudza kuti zvichavapo sei?
8 Hapana munhu ane simba pamusoro pesimba roupenyu kuti adzivise simba roupenyu;+ uyewo hapana simba rokudzora pazuva rokufa;+ uyewo muhondo hapana anomboregwa kuti aende.+ Uipi hauzopukunyutsi vaya vanohuita.+
9 Zvose izvi ndakazviona, uye mwoyo wangu wakafungisisa mabasa ose akaitwa pasi pezuva, panguva iyo munhu akatonga mumwe munhu achimukuvadza.+
10 Asi kunyange zvazvo zvakadaro, ndakaona vakaipa vachivigwa,+ mapindiro avaiita nemabviro avaiita panzvimbo tsvene,+ vokanganwika muguta mavaiita izvozvo.+ Izviwo hazvina zvazvinobatsira.
11 Mutongo zvausina kukurumidza kupiwa pabasa rakaipa,+ mwoyo yevanakomana vevanhu yakatsunga kwazvo mukati mavo kuti vaite zvakaipa.+
12 Kunyange zvazvo mutadzi angave achiita zvakaipa+ kane zana uye achiramba aripo kwenguva refu sezvaanoda, ini ndinozivawo kuti zvichafambira zvakanaka vaya vanotya Mwari wechokwadi,+ nokuti vaimutya.+
13 Asi hazvizombofambiri zvakanaka munhu akaipa,+ uyewo haazowanzi mazuva ake akaita somumvuri,+ nokuti haatyi Mwari.+
14 Pane chinhu chinoitwa panyika chisina zvachinobatsira, chokuti pane vakarurama vanoitirwa sezvinoitirwa basa revakaipa,+ uye pane vakaipa vanoitirwa sezvinoitirwa basa revakarurama.+ Ndakati izviwo hazvina zvazvinobatsira.
15 Ini ndakarumbidza kufara,+ nokuti hapana chinhu chiri nani pasi pezuva kupfuura kuti vanhu vadye, vanwe uye vafare, uye kuti zvinofanira kuitwa pamwe chete nebasa ravo rakaoma kwemazuva oupenyu hwavo,+ avakapiwa naMwari wechokwadi pasi pezuva.+
16 Maererano neizvi ndakafungisisa nomwoyo wangu+ kuti ndizive uchenjeri uye kuti ndione basa rinoitwa panyika,+ nokuti pane mumwe asingaoni hope nemaziso ake nokuda kwaro, angava masikati kana kuti usiku.+
17 Zvino ndakaona basa rose raMwari wechokwadi,+ kuti vanhu havagoni kuziva basa rakaitwa pasi pezuva;+ zvisinei nokuti vanhu vanoramba vachishanda zvakaoma sei kuti vatsvake, asi havazivi.+ Kana vakati vakachenjera kwazvo zvokuti vanoziva,+ havangakwanisi kuziva.+
