Nahumi 2:1-13
2 Munhu anoparadzira auya pamberi pako.+ Nzvimbo yakavakirirwa ngaichengetedzwe. Rindai nzira. Simbisai hudyu. Wedzerai simba kwazvo.+
2 Nokuti Jehovha achadzorera kukudzwa kwaJakobho,+ sokukudzwa kwaIsraeri, nokuti vadururi vakavadurura;+ uye vakaparadza nhungirwa dzavo.+
3 Nhoo yevarume vake vane simba yakaiswa ruvara rutsvuku; varume vake vane simba vakapfeka nguo tsvuku.+ Ngoro yehondo inopenya sokupenya kwezvombo zvesimbi muzuva raanogadzirira kurwa, uye mapfumo akagadzirwa nemijunipa+ adedereswa.
4 Ngoro dzehondo dzinoramba dzichimhanya kwazvo mumigwagwa.+ Dzinoramba dzichimhanya dzichikwira, dzichidzika munzvimbo dzinoungana vanhu. Dzakaita semazhenje omoto. Dzinoramba dzichimhanya semheni.+
5 Achayeuka vakuru vake.+ Vachagumburwa pakufamba kwavo.+ Vachachimbidza kuenda kurusvingo rwake, uye chinodzivirira chichafanira kusimbiswa kwazvo.
6 Magedhi enzizi achavhurwa, uye muzinda uchaparadzwa.
7 Zvatemwa; iye afukurwa; achaendwa naye,+ uye varandasikana vake vachange vachichema, sokurira kunoita njiva,+ vachiramba vachirova pamwoyo yavo.+
8 Ninivhi, kubvira pamazuva arave riripo,+ range rakaita sedziva remvura;+ asi vari kutiza. “Mirai! Mirai!” Asi hapana ari kutendeuka.+
9 Pambai sirivha; pambai ndarama;+ nokuti zvinhu zvakarongwa zvakawanda kwazvo. Mune zvinhu zvakanaka zvemarudzi ose zvizhinji kwazvo.+
10 Harina chinhu uye harina anogaramo, iguta rakaitwa dongo!+ Mwoyo uri kutya kwazvo,+ mabvi ari kubvunda,+ hudyu dzose dziri kurwadza kwazvo;+ uye zviso zvavo vose, zvachenuruka nokunetseka.+
11 Nzvimbo inogara shumba iripi, nebako revana veshumba vava nezenze, makafambwa neshumba ikapinda,+ maiva nomwana weshumba, uye pasina aizvidederesa?+
12 Shumba yacho yaibvambura-bvambura zvaikwana vana vayo, uye yaiurayira hadzi dzayo mhuka. Yaiita kuti mapako ayo arambe akazara nemhuka dzakabatwa nenzvimbo dzayo dzokuvanda dzakazara nemhuka dzakabvamburwa-bvamburwa.+
13 “Tarira! Ndinorwisana newe,” ndizvo zvinotaura Jehovha wemauto,+ “ndichapisira ngoro yake yehondo pakati poutsi.+ Bakatwa richaparadza vana vako veshumba vava nezenze.+ Ndichabvisa mhuka dzawakabata panyika, uye inzwi renhume dzako harizonzwikizve.”+
