Zekariya 1:1-21
1 Mumwedzi wechisere mugore rechipiri raDhariyasi,+ shoko raJehovha rakauya kuna Zekariya+ mwanakomana waBherekiya mwanakomana womuprofita Idho,+ richiti:
2 “Jehovha akatsamwira madzibaba enyu—akaatsamwira kwazvo.+
3 “Zvino uti kwavari, ‘Zvanzi naJehovha wemauto: “‘Dzokai kwandiri,’+ ndizvo zvinotaura Jehovha wemauto, ‘uye ini ndichadzoka kwamuri,’+ Jehovha wemauto adaro.”’
4 “‘Regai kuita semadzibaba enyu+ ayo vaprofita vekare vakashevedzera kwaari,+ vachiti: “Zvanzi naJehovha wemauto, ‘Ndapota, dzokai, mubve panzira dzenyu dzakaipa nepamabasa enyu akaipa.’”’+
“‘Asi iwo haana kuteerera, uye haana kundinzwa,’+ ndizvo zvinotaura Jehovha.
5 “‘Zvino madzibaba enyu ari kupi?+ Uye vaprofita+ vacho vakaramba vachirarama nokusingagumi here?
6 Asi mashoko angu nemirau yangu zvandakarayira vashumiri vangu, ivo vaprofita,+ hazvina kubata madzibaba enyu here?’+ Naizvozvo iwo akadzoka, akati: ‘Jehovha wemauto akatiitira+ maererano nezvaaifunga,+ maererano nenzira dzedu uye maererano nemabasa edu.’”
7 Pazuva rechimakumi maviri nemana romwedzi wechigumi nomumwe chete, kureva mwedzi waShebhati, mugore rechipiri raDhariyasi,+ shoko raJehovha rakauya kuna Zekariya+ mwanakomana waBherekiya mwanakomana womuprofita Idho,+ richiti:
8 “Ndakaona usiku, uye tarira! paiva nomurume+ akanga akatasva bhiza dzvuku,+ akanga akamira pakati pemiti yemikute+ yaiva munzvimbo yakadzika; uye shure kwake kwaiva nemabhiza matsvuku, nematsvukutsvuku, nemachena.”+
9 Naizvozvo ndakati: “Ishe wangu, ava ndivanaani?”+
Ngirozi yakanga ichitaura neni ikabva yati+ kwandiri: “Ini ndichakuratidza kuti ava ndivanaani.”
10 Murume akanga akamira pakati pemiti yemikute akabva apindura, akati: “Ava ndivo vakatumwa naJehovha kuti vafambe-fambe panyika.”+
11 Ivo vakapindura ngirozi yaJehovha yakanga yakamira pakati pemiti yemikute, vakati: “Takafamba-famba munyika,+ uye tarira! nyika yose yakanyarara uye haina chiri kunetsa.”+
12 Naizvozvo ngirozi yaJehovha yakapindura, ikati: “Haiwa Jehovha wemauto, muchasvika riniko musinganzwiri ngoni Jerusarema nemaguta aJudha,+ amakatsamwira kwemakore makumi manomwe aya?”+
13 Zvino Jehovha akapindura ngirozi yakanga ichitaura neni, nemashoko akanaka, mashoko anonyaradza;+
14 uye ngirozi yakanga ichitaura neni yakati kwandiri: “Shevedzera uchiti, ‘Zvanzi naJehovha wemauto: “Ndave ndiine godo, ndiine godo kwazvo nokuda kweJerusarema uye nokuda kweZiyoni.+
15 Ndakatsamwa kwazvo, ndakatsamwira marudzi akagara zvakanaka;+ nokuti ini, ndakatsamwa zvishoma,+ asi iwo, akabatsira kuti pave nedambudziko.”’+
16 “Naizvozvo zvanzi naJehovha, ‘“Ndichadzoka kuJerusarema ndiine ngoni zhinji.+ Imba yangu ichavakwa mariri,”+ ndizvo zvinotaura Jehovha wemauto, “uye tambo yokuyeresa ichatambanudzirwa pamusoro peJerusarema.”’+
17 “Shevedzerazve uchiti, ‘Zvanzi naJehovha wemauto: “Maguta angu achafashukira nezvakanaka;+ uye Jehovha achazvidemba pamusoro peZiyoni,+ osarudzazve Jerusarema.”’”+
18 Zvino ndakatarira ndikaona; uye tarira! kwaiva nenyanga ina.+
19 Naizvozvo ndakati kungirozi yakanga ichitaura neni: “Zvii izvi?” Iyo ikati kwandiri: “Idzi ndidzo nyanga dzakaparadzira Judha,+ Israeri+ neJerusarema.”+
20 Jehovha akandiratidzazve mhizha ina.
21 Ndakabva ndati: “Ava vari kuuya kuzoitei?”
Iye akati: “Idzi ndidzo nyanga+ dzakaparadzira Judha zvokuti hapana kana akasimudza musoro wake; uye vamwe ava vachauya kuzovadederesa, kuzowisira pasi nyanga dzemarudzi ari kusimudzira nyika yaJudha nyanga, kuti vaiparadzire.”+
