Bhuku Rechipiri raSamueri 22:1-51
22 Dhavhidhi akaudza Jehovha mashoko erwiyo urwu+ pazuva raakanunurwa naJehovha mumaoko evavengi vake vese+ nemuruoko rwaSauro.+
2 Akati:
“Jehovha ndiye ibwe rangu nenhare*+ yangu uye ndiye anondinunura.+
3 Mwari wangu ndiye dombo rangu,+ wandinopotera kwaari,Nhoo yangu+ nenyanga* yangu yeruponeso,* nzvimbo yangu yekupotera*+Uye ndiye nzvimbo yangu yekutizira,+ muponesi wangu;+ imi munondiponesa pandinorwiswa.
4 Ndinoshevedzera kuna Jehovha, uyo akakodzera kurumbidzwa,Uye ndichaponeswa pavavengi vangu.
5 Mafungu erufu akandikomba kumativi ese;+Mafashamo evarume vasingabatsiri akandityisa.+
6 Tambo dzeGuva* dzakandikomba;+Rufu rwakateya misungo pamberi pangu.+
7 Ndakashevedzera kuna Jehovha pandaitambudzika,+Ndakaramba ndichishevedzera kuna Mwari wangu.
Akabva anzwa inzwi rangu ari mutemberi yake,Uye kuchemera kwangu kubatsirwa kwakasvika munzeve dzake.+
8 Nyika yakatanga kuzunguzika uye kudengenyeka, ichienda mberi neshure;+Nheyo dzedenga dzakazununguka,+Uye dzakazunguzikira mberi neshure nekuti iye akanga atsamwiswa.+
9 Utsi hwakakwira huchibva mumhino dzake,Uye moto unoparadza wakabuda mumuromo make;+Mazimbe emoto akatsvuka aibva paari.
10 Paaiburuka, akakotamisa denga,+Uye pasi petsoka dzake paiva nerima gobvu.+
11 Akatasva kerubhi+ ndokuuya achibhururuka.
Aioneka ari pamapapiro emweya.*+
12 Akabva aita kuti rima rimupoteredze setende,+Mumakore matema akazara nemvura.
13 Pachiedza chaiva pamberi pake pakatsvuka mazimbe aiva nemoto.
14 Jehovha akabva atanga kutinhira ari kudenga;+Wekumusorosoro akaita kuti inzwi rake rinzwike.+
15 Akapfura miseve yake+ akaita kuti vapararire;Akatuma mheni, akaita kuti vavhiringidzike.+
16 Pasi pegungwa pakaoneka;+Nheyo dzenyika dzakaiswa pachena nekutuka kwaJehovha,Nemhepo ine simba yakabuda mumhino dzake.+
17 Akadzikisa ruoko rwake ari kumusoro;Akandibata, akandibudisa mumvura yakadzika.+
18 Akandinunura pamuvengi wangu ane simba,+Pavanhu vaindivenga, vaiva nesimba kundipfuura.
19 Vakandivinga pazuva randaiva mudambudziko,+Asi Jehovha akanditsigira.
20 Akandibudisa, akandiisa munzvimbo isina njodzi;*+Akandinunura nekuti aindifarira.+
21 Jehovha anondipa mubayiro unoenderana nekururama kwangu;+Anondipa mubayiro unoenderana nekuchena* kwemaoko angu.+
22 Nekuti ndakachengeta nzira dzaJehovha,Uye handina kuita zvakaipa ndichisiya Mwari wangu.
23 Mitongo+ yake yese iri pamberi pangu;Handizotsauki pamirau yake.+
24 Ndicharamba ndisina mhosva+ pamberi pake,Uye ndichangwarira kuti ndisakanganisa.+
25 Jehovha ngaandipe mubayiro unoenderana nekururama kwangu,+Maererano nekuchena kwangu pamberi pake.+
26 Makavimbika kumunhu akavimbika;+Kumunhu* asina mhosva munoratidza kuti hamuna mhosva;+
27 Kune vakachena munoratidza kuti makachena,+Asi kune vasina kururama munoratidza kuti makachenjera.*+
28 Nekuti munoponesa vanozvininipisa,+Asi maziso enyu haafariri vanozvikudza, uye munovaderedza.+
29 Nekuti muri rambi rangu, haiwa Jehovha;+Jehovha ndiye anondivhenekera pandinenge ndiri murima.+
30 Ndichibatsirwa nemi, ndinogona kumhanya ndichinorwisa boka revapambi;Nesimba raMwari ndinogona kukwira rusvingo.+
31 Nzira yaMwari wechokwadi yakakwana;+Shoko raJehovha rakachena.+
Iye inhoo kune vese vanopotera kwaari.+
32 Nekuti ndiani mumwe Mwari kunze kwaJehovha?+
Nderipi rimwe dombo kunze kwaMwari wedu?+
33 Mwari wechokwadi ndiye nhare yangu yakasimba,+Uye achaita kuti nzira yangu ive muchechetere.+
34 Anoita kuti tsoka dzangu dziite sedzenondo;Anoita kuti ndimire panzvimbo dzakakwirira.+
35 Anodzidzisa maoko angu hondo;Maoko angu anogona kukombamisa uta hwemhangura.
36 Munondipa nhoo yenyu yeruponeso,Uye kuzvininipisa kwenyu kunoita kuti ndive mukuru.+
37 Munoita kuti nzira yandinofamba ive yakafara;Tsoka dzangu hadzizotsvedzi.*+
38 Ndichadzingirira vavengi vangu ndovaparadza;Handizodzoki kusvikira vatsvairwa vese.
39 Ndichavatsvaira vese uye ndichavapwanya, kuti varege kusimuka;+Vachawira pasi ndovatsika.
40 Muchandipa simba rekurwa hondo;+Muchaita kuti vavengi vangu vadonhe pamberi pangu.+
41 Muchaita kuti vavengi vangu vanditize;+Ndichaparadza* vaya vanondivenga.+
42 Vanochemera kubatsirwa, asi hapana anovaponesa;Vanotochema kuna Jehovha, asi haavapinduri.+
43 Ndichavakuya-kuya votsetseka seguruva renyika;Ndichavakuya ndovatsika-tsika sematope emumigwagwa.
44 Muchandinunura pakutsvagirwa mhosva nevanhu vangu.+
Muchandichengetedza kuti ndive mutungamiriri wemarudzi;+Vanhu vandanga ndisingazivi vachandishandira.+
45 Vanhu vekune dzimwe nyika vachauya kwandiri vachidedera;+Zvavanonzwa pamusoro pangu zvichaita kuti vanditeerere.*
46 Vanhu vekune dzimwe nyika vachatya;*Vachauya vachibvunda vachibva munhare dzavo.
47 Jehovha mupenyu! Dombo rangu ngarirumbidzwe!+
Mwari weruponeso rwangu ngaakudzwe.+
48 Mwari wechokwadi anotsiva vavengi vangu;+Anoisa marudzi pasi pangu;+
49 Anondinunura pavavengi vangu.
Munondisimudza+ mondiisa pamusoro pevaya vanondirwisa;Munondinunura pamunhu anoita zvemhirizhonga.+
50 Ndokusaka ndichakutendai ndiri pakati pemarudzi, haiwa Jehovha,+Uye ndichaimba* ndichirumbidza zita renyu:+
51 Iye anoitira mambo wake mabasa makuru eruponeso;+Anoratidza rudo rusingachinji kumuzodziwa wake,Kuna Dhavhidhi nekuvana* vake nekusingaperi.”+
Mashoko Emuzasi
^ Iyi inzvimbo yaishandiswa kuhwanda uchitiza muvengi.
^ Ona Tsanangudzo Yemashoko.
^ Kana kuti “nemununuri wangu ane simba.”
^ Kana kuti “yakakwirira yakachengeteka.”
^ Kana kuti “dzeSheori.” Ona Tsanangudzo Yemashoko.
^ Kana kuti “emhepo.”
^ Kana kuti “munzvimbo yakakura.”
^ Kana kuti “nekusava nemhosva.”
^ Kana kuti “Kumurume ane simba.”
^ Dzimwe shanduro dzinoti, “munoita sebenzi.”
^ Kana kuti “Zviziso zvetsoka dzangu hazvizotsvedzi.”
^ ChiHeb., “Ndichanyararidza.”
^ ChiHeb., “Nzeve painonzwa, vachanditeerera.”
^ Kana kuti “vachapera simba.”
^ Kana kuti “ndicharidza rwiyo.”
^ ChiHeb., “mbeu.”
