Joeri 1:1-20
1 Iri ndiro shoko raJehovha rakauya kuna Joeri* mwanakomana waPetueri:
2 “Inzwai izvi, imi vakuru,Uye teererai, imi vagari vese vemunyika.*
Zvinhu zvakadai zvakamboitika here mumazuva enyuKana mumazuva emadzitateguru enyu?+
3 Zviudzei vanakomana venyu,Uye vanakomana venyu ngavazviudze vanakomana vavo,Uye vanakomana vavo vozviudza chizvarwa chinotevera.
4 Zvakasiyiwa nemhashu dzinoparadza, zvakadyiwa nemhashu dzinobhururuka dzakawanda;+Uye zvakasiyiwa nemhashu dzinobhururuka dzakawanda, zvakadyiwa nemhashu dzisina mapapiro;Uye zvakasiyiwa nemhashu dzisina mapapiro, zvakadyiwa nemhashu dzinodya dzisingasiyi chinhu.*+
5 Mukai, imi zvidhakwa,+ mucheme misodzi!
Ridzai mhere imi mese munonwa waini,Nekuti hamusisina waini inotapira.+
6 Nekuti pane rudzi rwauya munyika yangu, rune simba uye rusingaverengeki.+
Mazino arwo akaita semazino eshumba,+ uye shaya dzarwo dzakaita sedzeshumba.
7 Rwaparadza muzambiringa wangu uye rwaita kuti muonde wangu uve chigutsa,Rwachenesa miti yacho zvachose rukaikandira kwakadaro uko,Rukasiya tumapazi twayo twava tuchena.
8 Ridzai mhere sezvinoita mhandara yakapfeka masagaIchichema mukomana anga achida kuiroora.*
9 Muimba yaJehovha hamusisina mupiro wezviyo*+ nemupiro wezvinwiwa;+Vapristi, ivo vashumiri vaJehovha, vari kuchema.
10 Munda waparadzwa, ivhu riri kuchema;+Nekuti zviyo zvaparadzwa, waini itsva yaoma, mafuta apera.+
11 Varimi vari kunetseka, vashandi vemuminda yemizambiringa vari kuridza mhere,Pamusana pegorosi uye pebhari;Nekuti mbeu dzemuminda dzaparara.
12 Muzambiringa waoma,Muonde waoma.
Mupomegraneti,* muchindwe, nemuapuro,Miti yese yemumunda yaoma;+Nekuti mufaro wevanhu wachinja kuva nyadzi.
13 Pfekai masaga, mucheme,* imi vapristi;Ridzai mhere, imi vashumiri vepaatari.+
Pindai mukati, murare makapfeka masaga, imi vashumiri vaMwari wangu;Nekuti mupiro wezviyo+ nemupiro wezvinwiwa+ hazvichaunzwi muimba yaMwari wenyu.
14 Zivisai vanhu kuti vatsanye;* shevedzai vanhu kuti vauye kugungano dzvene.+
Unganidzai vakuru, nevagari vese vemunyika,Kuimba yaJehovha Mwari wenyu,+ muchemere kubatsirwa naJehovha.
15 Maiwee zuva riya kani!
Nekuti zuva raJehovha rava pedyo,+Uye richauya nekuparadza kunobva kune Wemasimbaose!
16 Zvekudya hazvina kubviswa pamberi pedu chaipo here,Uye kupembera nemufaro hazvina kubviswa muimba yaMwari wedu here?
17 Mbeu dzavari kushanda padziri nefoshoro dzavo, dzaputana.*
Matura haasisina chinhu.
Tsapi* dzaputswa, nekuti zviyo zvaoma.
18 Kunyange zvipfuwo zviri kugomera!
Mombe dziri kumberereka, nekuti hadzina mafuro!
Uye makwai ari kurwadziwa.
19 Ndichachema kwamuri haiwa Jehovha;+Nekuti moto waparadza mafuro musango,Uye rimi remoto rapisa miti yese yesango.
20 Kunyange mhuka dzesango dzinochema kwamuri,Nekuti hova dzemvura dzaomaUye moto waparadza mafuro musango.”
Mashoko Emuzasi
^ Kureva kuti “Jehovha ndiMwari.”
^ Kana kuti “vepanyika.”
^ Muvhesi ino mutauro wechiHebheru wakashandisa mazita mana anotsanangura mhashu.
^ Kana kuti “Ichichema murume weudiki hwayo.”
^ Shoko rakashandurwa kuti zviyo rinoreva zvirimwa zvakasiyana-siyana zvine tsanga zvakadai segorosi nebhari.
^ Pomegraneti muchero wakada kuita mutsvuku uye unoratidzika seapuro. Vamwe vanouti chibage cheChirungu.
^ Kana kuti “muzvirove zvipfuva.”
^ ChiHeb., “Tsaurai nguva tsvene yekutsanya.”
^ Dzimwe shanduro dzinoti, “Maonde akaoma avari kushanda paari nefoshoro dzavo aputana.”
^ Kana kuti “Hozi,” kureva imba inochengeterwa zvirimwa zvinenge zvakohwewa.
