CHIDZIDZO 16
Taura Zvinokurudzira Uye Zvakanaka
Jobho 16:5
PFUPISO YECHIDZIDZO: Nyanya kutaura nezvezvinhu zvinobatsira pakugadzirisa matambudziko uye zvinokurudzira vateereri vako.
MAITIRWO AZVO:
-
Vimba nevateereri vako. Vimba nehama dzako kuti dzinoda kufadza Jehovha. Kunyange paunenge uchivaruramisa, tanga wavarumbidza nemwoyo wese pese pazvinoita.
-
Usanyanye kutaura zvinhu zvisingafadzi. Ingotaura zvinhu kana zviitiko zvisingafadzi pazvinenge zvichikubatsira kuti ubudise pfungwa inokosha. Zvizhinji zvaunotaura zvinofanira kunge zvichikurudzira.
-
Shandisa Shoko raMwari. Ratidza vateereri vako zvinhu zvakaitirwa vanhu naJehovha, zvaari kuvaitira uye zvaachavaitira. Vakurudzire uye vabatsire kuti vave netariro.