1. Jesu aifunga nezvei usiku hwekupedzisira asati afa?

HWAIVA usiku hwekupedzisira Jesu asati afa. Aiziva kuti akanga ava kuda kusiya vadzidzi vake, uye aifunga nezveramangwana ravo. Akavaudza kuti: ‘Hamusi venyika.’ (Johani 15:19) Akazovanyengeterera kuna Baba vake achiti: “Havasi venyika, seni ndisiri wenyika.” (Johani 17:15, 16) Jesu airevei nemashoko aya?

2. “Nyika” yakataurwa nezvayo naJesu chii?

² Pano, shoko rekuti “nyika” rinoreva vanhu vasingashumiri Mwari uye vari kutongwa naSatani. (Johani 14:30; VaEfeso 2:2; Jakobho 4:4; 1 Johani 5:19) Tingaita sei kuti ‘tisava venyika’? Muchitsauko chino, tichakurukura nzira dzakasiyana-siyana dzatinoratidza nadzo kuti hatisi venyika dzinoti: Kuramba tichitsigira Umambo hwaMwari tisina divi ratinotsigira pane zvematongerwo enyika. Kuramba kukanganiswa nemweya wenyika. Kupfeka zvipfeko zvine mutsigo uye kuratidzika zvakanaka, zvinoremekedzeka, uye kusanyanya kukoshesa mari. Kupfeka zvipfeko zvakakwana zvemurwi zvatinopiwa naMwari.—Ona Mamwe Mashoko 16.

3. Jesu aiona sei zvematongerwo enyika?

³ Jesu paaiva panyika, akaona kuti vanhu vaiva nematambudziko akawanda uye upenyu hwavo hwakanga husiri nyore. Aiva nehanya navo zvechokwadi uye aida kuvabatsira. Akava mutungamiriri wezvematongerwo enyika here? Kwete. Aiziva kuti chinhu chaizogadzirisa matambudziko evanhu zvechokwadi Umambo hwaMwari. Jesu ndiye aizova Mambo weUmambo ihwohwo, hunova ndihwo hwaainyanya kusimbisa pakuparidza kwake. (Dhanieri 7:13, 14; Ruka 4:43; 17:20, 21) Jesu aisaita zvematongerwo enyika, uye aisava nedivi raaitsigira. Paaiva pamberi paGavhuna weRoma Pondiyo Pirato, Jesu akati: “Umambo hwangu hahusi hwenyika ino.” (Johani 18:36) Vadzidzi vake vaisapindirawo mune zvematongerwo enyika. Bhuku rinotaura zvakaitika kare rinonzi On the Road to Civilization rakati vaKristu vepakutanga “vakanga vasingadi kuva nezvigaro zvematongerwo enyika.” Ndizvo zvinoitwawo nevaKristu vechokwadi mazuva ano. Tinotsigira Umambo hwaMwari nemwoyo wese uye hatina divi ratinotsigira pane zvematongerwo enyika.—Mateu 24:14.

4. VaKristu vechokwadi vanotsigira sei Umambo hwaMwari?

⁴ Vamiririri vedzimwe nyika vanomiririra hurumende dzekwavanobva, saka havapindiri mune zvematongerwo enyika munyika dzavanoshanda vari. Vakazodzwa, avo vane tariro yekutonga pamwe chete naKristu kudenga, vakaitawo sevamiririri vekune dzimwe nyika. Pauro akanyorera vaKristu vakazodzwa achiti: “Tiri nhume dzinomiririra Kristu.” (2 VaKorinde 5:20) Vakazodzwa vanomiririra hurumende yaMwari. Havapindiri munyaya dzezvematongerwo enyika ino. (VaFiripi 3:20) Pane kudaro, vakazodzwa vari kubatsira mamiriyoni  evanhu kuti azive nezvehurumende yaMwari. ‘Vemamwe makwai,’ vaya vane tariro yekurarama nekusingaperi munyika itsva yaMwari, vanotsigira vakazodzwa. Naivowo vanoramba vasina divi ravanotsigira panyaya dzezvematongerwo enyika. (Johani 10:16; Mateu 25:31-40) Saka zviri pachena kuti hapana muKristu wechokwadi angapindira mune zvematongerwo enyika ino.—Verenga Isaya 2:2-4.

5. Ndechipi chimwe chikonzero chinoita kuti vaKristu vasaenda kuhondo?

⁵ VaKristu vechokwadi vakabatana pasinei nenyika dzavanobva kana rudzi rwavo uye vanoonana semhuri imwe chete. (1 VaKorinde 1:10) Kana tikaenda kuhondo, tinenge tichitorwisa vanhu vemumhuri, vatinonamata navo, vatakarayirwa naJesu kuti tide. (Johani  13:34, 35; 1 Johani 3:10-12) Chimwezve ndechekuti, Jesu akaudza vadzidzi vake kuti vade kunyange vavengi vavo.—Mateu 5:44; 26:52.

6. Vashumiri vaJehovha vakazvitsaurira vanoona sei hurumende?

⁶ Kunyange zvazvo sevaKristu tisina divi ratinotsigira pane zvematongerwo enyika, tinoita zvese zvatinogona kuti tive vagari vemunyika vakanaka. Tinoratidza kuti tinoremekedza hurumende nekuteerera mitemo yainogadza uye kubhadhara mitero. Asi nguva dzese tinova nechokwadi chekuti tinopa “zvinhu zvaMwari kuna Mwari.” (Mako 12:17; VaRoma 13:1-7; 1 VaKorinde 6:19, 20) “Zvinhu zvaMwari” zvinosanganisira kumuda, kumuteerera, uye kumunamata. Tinosva tafa zvedu pane kuti tirege kuteerera Jehovha.—Ruka 4:8; 10:27; verenga Mabasa 5:29; VaRoma 14:8.

7, 8. Chii chinonzi “mweya wenyika,” uye unokanganisa sei vanhu?

⁷ Kuparadzana nenyika yaSatani kunoreva kusabvuma kupindwa ‘nemweya wenyika.’ Mweya iwoyo mafungiro nemaitiro anobva kuna Satani, uye vaya vasingashumiri Jehovha vanoita zvinoenderana nemweya uyu. Asi vaKristu havabvumi kukanganiswa nemafungiro aya. Sezvakataurwa naPauro, “hatina kugamuchira mweya wenyika asi mweya unobva kuna Mwari.”—1 VaKorinde 2:12; VaEfeso 2:2, 3; ona Mamwe Mashoko 17.

⁸ Mweya wenyika unoita kuti vanhu vafunge zvakanakira ivo chete, vazvikudze uye vapanduke. Unovaita kuti vafunge kuti havafaniri kuteerera Mwari. Satani anoda kuti vanhu vaite zvavada vasingambofungi kuti zvinozoguma sei. Anoda kuti vafunge kuti kugutsa  “kuchiva kwenyama, nekuchiva kwemaziso” ndiko kunokosha kupfuura zvimwe zvese muupenyu. (1 Johani 2:16; 1 Timoti 6:9, 10) Dhiyabhorosi ari kuedza kutsausa vanhu, zvikurukuru vashumiri vaJehovha, kuti vave nemafungiro akafanana neake.—Johani 8:44; Mabasa 13:10; 1 Johani 3:8.

9. Mweya wenyika ungatikanganisa sei?

⁹ Sezvakaita mhepo yatinofema, mweya wenyika uri pese pese. Kana tikasarwisa kuti mweya uyu usatipinda, uchatikanganisa. (Verenga Zvirevo 4:23.) Izvi zvinogona kutanga nenzira dzatingaona sedzisingakuvadzi, dzakadai sekutevedzera mafungiro evanhu vasinganamati Jehovha. (Zvirevo 13:20; 1 VaKorinde 15:33) Kana kuti tinogona kukanganiswa nezvinhu zvakadai sezvinhu zvinonyadzisira, zvinhu zvinobudiswa nevakatsauka pakutenda, kana mitambo inonyanya kusimudzira makwikwi.—Ona Mamwe Mashoko 18.

10. Tingaita sei kuti tisapindwa nemweya wenyika?

¹⁰ Saka tingaita sei kuti tisapindwa nemweya wenyika? Tinofanira kuramba tiri pedyo naJehovha uye kubvuma kutungamirirwa neuchenjeri hwake. Tinofanira kugara tichinyengeterera mweya wake mutsvene uye kugara tichishingaira mubasa rake. Jehovha ndiye ane simba rinopfuura raani naani zvake pasi nekudenga. Tine chokwadi chekuti anogona kutibatsira kuti tisapindwa nemweya wenyika.—1 Johani 4:4.

11. Mweya wenyika wava kuita kuti vanhu vapfeke sei?

¹¹ Tinoratidzawo kuti hatisi venyika nemapfekero edu uye kuratidzika kwatinoita. Vanhu vakawanda vari munyika vanopfeka kuti vaonekwe, vaite kuti vamwe vafunge  zvebonde, varatidze pfungwa dzekupanduka, kana kuti varatidze kuti vane mari yakawanda. Vamwe havana kana basa nekuti vanoratidzika sei. Vanogona kusarudza kungogara vakati nyangarara vasina kana kugeza. Hatitombodi kufanana nevanhu vari munyika pamapfekero edu uye kuratidzika kwedu.

12, 13. Ipfungwa dzipi dziri muMagwaro dzingatibatsira pakusarudza zvekupfeka?

¹² Sevashumiri vaJehovha, tinoda kugara tichipfeka zvinhu zvakanaka, zvakadzikama uye zvinoenderana nezvatinenge tichiita. Tinopfeka “zvinoratidza kuva  nemwero uye pfungwa dzakanaka” kuti tiratidze kuti ‘takazvipira kuna Mwari.’—1 Timoti 2:9, 10; Judha 21.

¹³ Mapfekero edu anogona kuita kuti Mwari nevanhu vake vakudzwe kana kuti vashorwe. Tinoda kuita “zvinhu zvese kuti Mwari akudzwe.” (1 VaKorinde 10:31) Kupfeka zvine mwero kunosanganisira kufunga kuti vamwe vanonzwa sei uye vanotiona sei. Saka patinosarudza kuti topfekei kana kuti toratidzika sei, tinoyeuka kuti zvatinosarudza zvinobata-batawo vamwe vanhu.—1 VaKorinde 4:9; 2 VaKorinde 6:3, 4; 7:1.

14. Zvii zvatinofanira kufunga nezvazvo patinosarudza zvekupfeka kumisangano kana muushumiri?

¹⁴ Tinopfeka sei patinenge tiri kumisangano kana muushumiri? Tinopfeka zvekuti munhu wese anototi acheuke here? Zvatinopfeka zvinoita kuti vamwe vatinyarire here? Tinofunga kuti hapana anofanira kutibvunza nezvezvatinopfeka here? (VaFiripi 4:5; 1 Petro 5:6) Ichokwadi kuti tinoda kuratidzika zvakanaka, asi chinoita kuti tive vanhu vanoyemurika zvechokwadi unhu hwatinoratidza sevaKristu. Izvi ndizvo zvinoonekwa naJehovha paanotitarisa. Zvinoratidza zvatiri chaizvo, “munhu akavanzika wemwoyo,” uyo anokosha chaizvo kuna Mwari.—1 Petro 3:3, 4.

15. Nei Jehovha asingatipi tumitemo tunotiudza kuti topfekei uye toratidzika sei?

¹⁵ Jehovha haana kutipa tumitemo tunodonongodza zvese zvatinofanira kupfeka nezvatisingafaniri kupfeka. Pane kudaro, akatipa mazano emuBhaibheri anogona kutibatsira kusarudza zvakanaka. (VaHebheru 5:14) Anoda kuti tiite zvisarudzo zvedu, zvingava zvakakura kana zvidiki, zvichibva pakuda kwatinomuita uye pakuda kwatinoita vamwe. (Verenga Mako 12: 30, 31.) Pasi rese, vanhu vaJehovha vanopfeka zvakasiyana-siyana zvichienderana nekwavanogara uye zvavanofarira. Kusiyana uku kwakanaka uye kunoita kuti upenyu hunakidze.

16. Maonerwo anoitwa mari nevanhu vari munyika anopesana sei nezvakadzidziswa naJesu? Tinofanira kuzvibvunza mibvunzo ipi?

¹⁶ Satani anoda kuti vanhu vafunge kuti mari nezvinhu zvainotenga ndizvo zvinoita kuti vafare, asi vashumiri vaJehovha vanoziva kuti izvozvo hazvisi zvechokwadi. Tinoziva kuti mashoko akataurwa naJesu ndeechokwadi ekuti: “Kunyange kana  munhu aine zvizhinji, upenyu hwake hahubvi pazvinhu zvaainazvo.” (Ruka 12:15) Mari haikwanisi kutipa mufaro wechokwadi. Haikwanisi kutipa shamwari dzechokwadi, kutizorodza pfungwa, kana kutipa upenyu husingaperi. Ichokwadi kuti tinodawo zvimwe zvinhu kuti tirarame, uye tinoda kunakidzwa neupenyu. Asi Jesu akatidzidzisa kuti tichava nemufaro kana tikava neushamwari hwakasimba naMwari uye kunamata kukava chinhu chinokosha kupfuura zvimwe zvese muupenyu hwedu. (Mateu 5:3; 6:22) Zvibvunze kuti: ‘Maonerwo anoitwa mari nenyika haana kundikanganisa here? Ndinongogara ndichifunga kana kutaura nezvemari here?’—Ruka 6:45; 21:34-36; 2 Johani 6.

17. Upenyu hwako hunovandudzika sei kana ukaramba kuva nemaonero enyika panyaya yemari?

¹⁷ Kana tikaisa pfungwa pakushumira Jehovha toramba kuva nemaonero enyika panyaya yemari, upenyu hwedu hunova nechinangwa. (Mateu 11:29, 30) Tichagutsikana nezvatiinazvo uye tichava nerugare mupfungwa nemumwoyo. (Mateu 6:31, 32; VaRoma 15:13) Hatizonyanyi kuzvidya mwoyo nezvezvinhu zvekurarama nazvo. (Verenga 1 Timoti 6:9, 10.) Tichava nemufaro unobva pakupawo vamwe zvatiinazvo. (Mabasa 20:35) Tichava nenguva yekuva nemhuri dzedu neshamwari. Zvinogona kutotibatsirawo kuti tiwane hope.—Muparidzi 5:12.

18. Satani ari kuedza kutiita sei?

¹⁸ Satani ari kuedza kuparadza ushamwari hwedu naJehovha, saka tinofanira kuita zvese zvatinogona kuti tihuchengetedze. Tiri kurwisana “nemasimba emweya yakaipa.”  (VaEfeso 6:12) Satani nemadhimoni ake havadi kuti tifare kana kuti tirarame nekusingaperi. (1 Petro 5:8) Vavengi vedu ava vane simba vari kutirwisa, asi tinogona kukunda tichibatsirwa naJehovha.

19. VaEfeso 6:14-18 inorondedzera sei “zvipfeko zvakakwana zvemurwi” zvinopfekwa nemuKristu?

¹⁹ Kare masoja aipfeka zvipfeko zvekurwa nazvo kuti azvidzivirire muhondo. Isuwo tinofanira kupfeka “zvipfeko zvakakwana zvemurwi” zvatakapiwa naJehovha. (VaEfeso 6:13) Zvipfeko izvi zvichatidzivirira. Tinoverenga nezvazvo pana VaEfeso 6:14-18 panoti: “Saka mirai makasimba, makasunga muchiuno menyu nebhandi rechokwadi, makapfeka chinhu chinovharidzira chipfuva, chekururama, uye tsoka dzenyu dzakapfeka mashoko akanaka erugare amakagadzirira kuzivisa. Kuwedzera pazvese izvi, torai nhoo huru yekutenda, yamuchakwanisa kudzima nayo miseve yese inobvira inokandwa neakaipa. Uyewo, pfekai ngowani yeruponeso, uye torai bakatwa remweya, iro shoko raMwari, uku muchiramba muchinyengetera mumweya nguva dzese, muchishandisa nzira dzese dzekunyengetera nekuteterera.”

20. Tinofanira kuitei kana tichida kuti “zvipfeko zvakakwana zvemurwi” zvitibatsire?

²⁰ Kana musoja akakanganwa kupfeka chimwe chezvipfeko zvake, osiya imwe nhengo yemuviri wake isina kudzivirirwa, muvengi wake achananga ipapo. Kana tichida kuti “zvipfeko” zvedu zvitidzivirire, hatifaniri kukanganwa kana chimwe chete chazvo. Tinofanira kugara takazvipfeka uye zvisina pamwe pakakanganisika. Ticharamba tichirwa kusvikira nyika yaSatani yaparadzwa uye Satani nemadhimoni ake vabviswa panyika. (Zvakazarurwa 12:17; 20:1-3) Saka kana tiri  kurwisa zvishuwo zvakaipa kana kamwe katsika kakaipa katiinako, hatifaniri kuneta.—1 VaKorinde 9:27.

21. Tingaita sei kuti tikunde hondo yedu naSatani?

²¹ Tiri tega, hatina simba rinopfuura raDhiyabhorosi. Asi tichibatsirwa naJehovha takasimba kumupfuura! Kuti tirambe takatendeka, tinofanira kunyengetera kuna Jehovha, kudzidza Shoko rake, uye kuwadzana nehama nehanzvadzi dzedu. (VaHebheru 10:24, 25) Izvi zvichatibatsira kuti tirambe takavimbika kuna Mwari uye kuti tigare takagadzirira kudzivirira kutenda kwedu.

22, 23. (a) Tingaita sei kuti tigare takagadzirira kutsigira zvatinotenda? (b) Tichakurukurei muchitsauko chinotevera?

²² Tinofanira kugara takagadzirira kutsigira zvatinotenda. (Johani 15:19) Pane dzimwe nyaya, maonero eZvapupu zvaJehovha akasiyana chaizvo neevanhu vakawanda. Zvibvunze kuti: ‘Ndinonyatsonzwisisa here kuti nei tichiona zvinhu nenzira iyi? Ndine chokwadi here kuti zvinotaurwa neBhaibheri nemuranda akatendeka, akangwara zvakarurama? Ndinodada kuti ndiri mumwe weZvapupu zvaJehovha here? (Pisarema 34:2; Mateu 10:32, 33) Ndinokwanisa kutsanangurira vamwe zvandinotenda here?’—Mateu 24:45; Johani 17:17; verenga 1 Petro 3:15.

²³ Kazhinji, zviri nyore kuziva zvatinofanira kuita kuti tirambe takaparadzana nenyika. Asi dzimwe nguva, hazvisi nyore kuziva. Satani anoedza kutiteya nenzira dzakasiyana-siyana. Chimwe chaanoshandisa ivaraidzo. Tingasarudza sei zvekuzvivaraidza nazvo nekuchenjera? Tichaona kuti tingazviita sei muchitsauko chinotevera.