CHIDZIDZO 11
Ungaita Sei Kuti Unyatsobatsirwa neBhaibheri?
Wakamboona here kuti kana uine basa rakakura rauri kuda kuita unogona kushaya pekutangira? Pamwe kuti zvikurerukire, unogona kuronga basa racho uchitanga nezviri nyore. Ndozvazvinoitawo panyaya yekuverenga Bhaibheri. Unogona kuzvibvunza kuti, ‘Ndotangira papi?’ Muchidzidzo chino tichaona zvimwe zvinhu zviri nyore zvaunogona kuita kuti unakidzwe nekuverenga uye kudzidza Bhaibheri.
1. Kugara uchiverenga Bhaibheri kwakanakirei?
Munhu anogara achiverenga Bhaibheri, kana kuti “mutemo waJehovha,” anofara uye anobudirira pane zvese zvaanoita muupenyu. (Verengai Pisarema 1:1-3.) Unogona kutanga nekuverenga kwemaminitsi mashomanana zuva rega rega. Paunowedzera kunzwisisa zviri muShoko raMwari, unobva wawedzerawo kunakidzwa nekuriverenga.
2. Ungaita sei kuti ubatsirwe nekuverenga Bhaibheri?
Kuti tinyatsobatsirwa nekuverenga Bhaibheri, tinofanira kumbomira tofunga nezvezvatiri kuverenga. Tinofanira kuriverenga uye “kufungisisa zviri mariri.” (Joshua 1:8, mashoko emuzasi) Paunenge uchiverenga, zvibvunze mibvunzo yakaita seiyi: ‘Zvandiri kuverenga zvinondidzidzisei nezvaJehovha Mwari? Zvingashanda sei muupenyu hwangu? Ndingashandisa sei mavhesi aya kubatsira vamwe?’
3. Ungawana sei nguva yekuverenga Bhaibheri?
Zvinokuomera here kuwana nguva yekuverenga Bhaibheri? Kana zvakadaro hausi wega. Edza ‘kushandisa nguva yako nekuchenjera.’ (VaEfeso 5:16) Unogona kusarudza nguva yaunoti ndeyekuverenga Bhaibheri zuva rega rega. Vamwe vakasarudza kuverenga Bhaibheri mangwanani. Vamwe vanoverenga masikati. Vamwewo vanoverenga manheru vasati varara. Ko iwewe ndeipi nguva yakakunakira?
WEDZERA KUONGORORA
Dzidza zvaungaita kuti unakidzwe nekuverenga Bhaibheri. Kuti unyatsobatsirwa paunenge uchidzidza Bhaibheri, ona zvaunofanira kuita pakugadzirira zvidzidzo zvako.
Kutanga kuverenga Bhaibheri kwakafanana nekutanga kudya zvekudya zvawaisaziva, asi zvozopedzisira zvava kukunakira
4. Zvaungaita kuti ufarire kuverenga Bhaibheri
Zvinogona kukuomera kutanga kuverenga Bhaibheri, sezvinongoitikawo munhu paanotanga kudya chekudya chaaisaziva. Asi unogona kupedzisira wava kutonakidzwa naro, kutoita seuri kurinzwira nzara kana usina kuriverenga. Verengai 1 Petro 2:2, mobva makurukura muchishandisa mubvunzo unotevera:
-
Unofunga kuti ukatanga kuverenga Bhaibheri zuva rega rega zvichakunakidza zvekuti unenge wava kuda kuramba uchiriverenga here?
Ngationei VHIDHIYO inoratidza kuti vamwe vanhu vakatanga sei kunakidzwa nekuverenga Bhaibheri, tobva takurukura mibvunzo inotevera.
-
Muvhidhiyo iyi vechidiki vaitadziswa nei kuverenga Bhaibheri?
-
Chii chakavabatsira kuti varambe vachiriverenga?
-
Vakaita sei kuti vanyatsonakidzwa nekuverenga Bhaibheri?
Matangiro aungaite:
-
Sarudza Bhaibheri rakaturikirwa nemazvo uye rinonzwisisika. Chimboedza kuverenga Bhaibheri reShanduro yeNyika Itsva kana richiwanika mumutauro wako.
-
Tanga nekuverenga mabhuku ane nyaya dzinonyanya kukunakidza. Unogona kushandisa chati yakanzi “Kutanga Kuverenga Bhaibheri.”
-
Nyora pasi zvitsauko zvaunenge waverenga. Shandisa chati yakanzi “Purogiramu Yekuverenga Bhaibheri” iri mubhuku rino.
-
Shandisa app inonzi JW Library®. Inokubatsira kuverenga Bhaibheri kana kuita zvekuriteerera pafoni yako kana kuti patablet chero kwaunenge uri.
-
Shandisa mamwe mashoko ari nechekunoperera Shanduro yeNyika Itsva. Anosanganisira mamepu, machati, nekutsanangurwa kwemashoko emuBhaibheri izvo zvichakubatsira kuti unakidzwe nekuverenga Bhaibheri.
5. Gadzirira zvidzidzo zvako
Verengai Pisarema 119:34, mobva makurukura muchishandisa mubvunzo unotevera:
-
Zvakanakirei kunyengetera usati watanga kuverenga Bhaibheri kana kuti kugadzirira zvidzidzo zvako?
Ungaita sei kuti unyatsobatsirwa nechidzidzo chimwe nechimwe? Edza kuita zvinotevera paunenge uchigadzirira zvidzidzo zviri mukosi ino:
-
Verenga ndima dzekutanga dzechidzidzo chacho.
-
Vhura mavhesi uchiaverenga, woona kuti anobatana sei nenyaya yacho.
-
Maka panenge paine mhinduro yemubvunzo mumwe nemumwe; izvi zvichakubatsira pamunenge mava kukurukura chidzidzo chacho nemudzidzisi wako.
Waizviziva here?
Zvapupu zvaJehovha zvagara zvichishandisa maBhaibheri akasiyana-siyana. Asi tinonyanya kushandisa rinonzi Shanduro yeNyika Itsva nekuti rakaturikirwa nemazvo, riri nyore kunzwisisa, uye rine zita raMwari.—Ona nyaya iri paIndaneti yakanzi “Zvapupu zvaJehovha Zvine Bhaibheri Razvo Here?”
VAMWE VANOTI: “Kudzidza Bhaibheri ibasa chairo. Handina nguva uye kakawanda ndinenge ndakaneta.”
-
Ko iwe unoti kudii?
PFUPISO
Kuti unyatsobatsirwa neBhaibheri, ronga nguva yekuriverenga, nyengetera kuti unzwisise zvaunenge uchiverenga, uye gadzirira zvidzidzo zvako.
Kudzokorora
-
Ungaita sei kuti unyatsobatsirwa neBhaibheri?
-
Inguva ipi yaungasarudza kuverenga uye kudzidza Bhaibheri?
-
Zvakanakirei kuti ugare wagadzirira chidzidzo chako?
WEDZERA PANE ZVAWADZIDZA
Verenga nyaya iyi uone mamwe mazano anogona kukubatsira pakuverenga Bhaibheri.
“Zvaungaita Kuti Ubatsirwe Nekuverenga Bhaibheri” (Nharireyomurindi Nhamba 1 2017)
Dzidza zvinhu zvitatu zvaunogona kuita kana uchida kuverenga Bhaibheri.
“Bhaibheri Ringandibatsira Sei?—Chikamu 1: Kudzidza Bhaibheri” (Nyaya iri paIndaneti)
Verenga unzwe mazano angakubatsira kuti unakidzwe nekuverenga Bhaibheri.
“Bhaibheri Ringandibatsira Sei?—Chikamu 2: Nakidzwa Nekuverenga Bhaibheri” (Nyaya iri paIndaneti)
Inzwa zvinoitwa nevamwe vava nemakore vachiverenga Bhaibheri mazuva ese.
Zvimwe Zvaunogona Kufarira
MIBVUNZO INONYANYA KUBVUNZWA
Kosi yeBhaibheri Inoitiswa neZvapupu zvaJehovha Yakaita Sei?
Paunoita kosi yeBhaibheri inoitiswa neZvapupu zvaJehovha, unogona kushandisa chero Bhaibheri raunaro. Mhuri yako neshamwari vanogona kuvapowo paunenge uchidzidza.
