ZVINOTAURA BHAIBHERI
Mesiya
Bhaibheri rakafanotaura kuti Mesiya aizouya panyika uye kuti aizobvisa zvirwere, kutambura uye rufu. Jesu Kristu ndiye Mesiya here?
Vanhu vaizoziva sei kuti ndiye Mesiya wacho?
Uprofita hweBhaibheri hunoratidza kuti Mesiya, kana kuti Kristu aizouya kaviri, uye mushure mekunge auya kokutanga, paizova nenguva refu asati auya kechipiri. * Kekutanga, aizouya ari munhu wenyama. Kuti vanhu vamuzive, vanyori veBhaibheri vakafanotaura zvinhu zvakawanda zvaaizoita muupenyu hwake nemubasa rake rokuparidza. Kutaura zvazviri, chinangwa chikuru chouprofita hweBhaibheri ‘ndechokupupurira Jesu.’—Zvakazarurwa 19:10.
Jesu paaiva panyika akaita zvinhu zvishoma asi mune ramangwana achaita zvikuru
ZVINOTAURWA NEBHAIBHERI
Mesiya . . .
-
Aizobva mudzinza raMambo Dhavhidhi.—Isaya 9:7; Ruka 3:23-31. *
-
Aizoberekerwa muguta reBhetrehema.—Mika 5:2; Ruka 2:4-7.
-
Aizova muparidzi anozvininipisa ‘wemashoko akanaka.’—Isaya 61:1; Ruka 4:43.
-
Aizozvidzwa oitwa semunhu wenhando.—Isaya 53:3; Mateu 26:67, 68.
-
Aizotengeswa nemasirivha 30.—Zekariya 11:12, 13; Mateu 26:14, 15.
-
Aizoramba akanyarara paaipomerwa, otongerwa rufu asi asina mhosva.—Isaya 53:6, 7; Mateu 27:12-14.
-
Aizova “gwayana” rechibayiro rinobvisa zvivi kuti vanhu vakwanise kuva neukama hwakanaka naMwari.—Isaya 53:7; Johani 1:29, 34, 36.
-
Aizourayiwa asi hapana kana bhonzo rake raizotyorwa.—Pisarema 34:20; Johani 19:33, 36.
-
Aizovigwa pamwe chete nevapfumi.—Isaya 53:9; Mateu 27:57-60.
-
Aizomutswa pazuva rechitatu.—Mateu 16:21; 28:5-7.
Jesu akazadzisa uprofita hwose uhwu nehumwewo hwakawanda hwakataurwa nezvake. Akaporesawo vanorwara uye akamutsa vakafa. Zvose zvakaitwa naJesu zvinotipa uchapupu hwokuti aiva Mesiya uyewo zvinoita kuti tive nechikonzero chakasimba chokutenda kuti munguva yemberi achatoita zvakawanda kudarika zvaakaita. (Ruka 7:21-23; Zvakazarurwa 21:3, 4) Jesu paakamutswa akanogara ‘kuruoko rworudyi’ rwaMwari achimirira nguva yokuti apedzise basa rake saMesiya.—Pisarema 110:1-6.
“Kristu paanosvika, angazoita zviratidzo zvinopfuura zvaitwa nomunhu uyu here?”—Johani 7:31.
Mesiya achapedzisa basa rake sei?
VaJudha vairarama panguva yaJesu vaitarisira kuti Mesiya aizovasunungura pakutongwa nevaRoma uye obva aita mambo wavo. (Mabasa 1:6) Vateveri vaJesu vechiJudha vakatozonzwisisa pava paya kuti Mesiya aizopedzisa basa rake ari kudenga pashure pokunge apiwa simba.—Mateu 28:18.
ZVINOTAURWA NEBHAIBHERI
Paachauya kechipiri, Mesiya . . .
-
Achatonga pasi rose saMambo weUmambo hwaMwari.—Dhanieri 7:13, 14; Zvakazarurwa 11:15.
-
Achakomborera vose vanotenda maari.—Genesisi 22:17, 18; Pisarema 72:7, 8.
-
“Achavhundutsa marudzi mazhinji” nevatongi vawo paachaaparadza nokuti anoramba kuzviisa pasi pake.—Isaya 52:15; Zvakazarurwa 19:19, 20.
-
Achaponesa “boka guru” revanhu vakarurama kuti vararame munyika itsva ine rugare.—Zvakazarurwa 7:9, 10, 13-17.
-
Achibatsirwa naJehovha Mwari, achamutsa vakafa kuti vararame muParadhiso pasi pano.—Ruka 23:43; Johani 5:21, 28, 29.
-
Achadzidzisa vanhu vake nzira dzorugare.—Isaya 11:1, 2, 9, 10.
-
Achabvisa chivi zvachose, icho chiri kukonzera kuti vanhu varware uye vafe.—Johani 1:29; VaRoma 5:12.
-
Achaputsa mabasa ose aSatani uye achaita kuti vanhu vose vabatane semhuri imwe chete vachitongwa naJehovha Mwari.—1 VaKorinde 15:25-28; 1 Johani 3:8.
Jesu akaita zvose zvaakanzi aizoita pakuuya kwake kwokutanga saMesiya. Achaitawo zvose zvaakanzi achaita pakuuya kwake kechipiri. Saka vanhu vakachenjera vanotodzidza nezvake nokuti iye akati: “Ndini nzira nechokwadi noupenyu.”—Johani 14:6.
‘Mumazuva ake, munhu akarurama achakura zvakanaka, uye rugare rukuru ruchavapo kusvikira mwedzi usisipo. Achatonga vanhu kusvikira kumigumo yenyika.’—Pisarema 72:7, 8.
^ ndima 5 Shoko rokuti “Mesiya” nderechiHebheru uye rinoreva zvakafanana nerechiGiriki rokuti “Kristu.”—Johani 1:41.
^ ndima 7 Vhesi yokutanga iri kuratidza uprofita hwacho uye yechipiri iri kuratidza kuzadzika kwahwakaita.
Zvimwe Zvaunogona Kufarira
MIBVUNZO YEBHAIBHERI INOPINDURWA
Jesu Ndiye Mesiya Anotaurwa Muuprofita Here?
Kunogona kunge kuine vamwe vanaMesiya here?
NHARIREYOMURINDI
“Tawana Mesiya”!
Vakawanda vanobvuma kuti Jesu ndiye Mesiya akapikirwa. Vamwe havabvumi. Ona zvinotaurwa neBhaibheri.
