Vanhu vanogona kusarura vanhu vekune dzimwe nyika, vemumwe mutauro kana kuti verimwe dzinza. Asi hazvingogumiri ipapo, vanosarurawo vanhu vezvimwe zvitendero, vanotarisa kuti uyu munhurume here kana kuti munhukadzi, mupfumi here kana kuti murombo. Vamwe vanotarisira vamwe pasi nemhaka yezera ravo, dzidzo, chitarisiko, kana kuti urema hwavainahwo. Pavanenge vachiita izvi vanenge vachiona sekuti havana rusarura.

Iwe ungadarowo here wakabatwa nechirwere ichi? Zviri nyore kuona rusarura runoitwa nevamwe, asi zvakaoma kuti uzvione kuti une rusarura. Chokwadi ndechekuti tese pane patinombosarurawo. Mumwe chiremba anonzi David Williams akati: “Kana vanhu vachitarisira vanhu verumwe rudzi pasi, pavanozosangana nemumwe munhu werudzi irworwo, kazhinji kacho vanoita kakumusarura uye dzimwe nguva vasingatombozvioni.”

Semuenzaniso, mumwe murume anonzi Jovica, uyo anogara munyika mune rumwe rudzi runotarisirwa pasi anoti: “Ndaifunga kuti vanhu vese verudzi irworwo vaiva vanhu vakaipa. Handina kumbofunga kuti ndaiva nerusarura nekuti ndaiona sekuti vanhu vacho ndozvavari.”

Hurumende dzakawanda dzinoisa mitemo yekurwisa kuti pasave nerusarura. Asi rusarura harusi kupera. Nemhaka yei? Nekuti mitemo yavanogadza inongotaura zvisingafaniri kuitwa nevanhu. Haibatsiri vanhu kuchinja mafungiro avanoita, nekuti rusarura runotangira mupfungwa nemumwoyo. Izvi zvinoreva here kuti rusarura harufi rwakapera?