Imboedza kufungidzira tichirarama kusingabudi zuva. Zuva rinoita kuti miti ikure, maruva atumbuke, towana michero. Zuva ndiro rinoita kuti midzi yemiti ikwanise kukweva mvura iri muvhu yoenda mumashizha uye yozobuda yopinda mumhepo.

Mvura chipo chinobva kuna Mwari nekuti ndiyo inoita kuti tiwane zvekudya. Anotinayisira mvura uye anoita kuti pave nemwaka yakasiyana-siyana zvoita kuti vanhu vawane zvekudya, vorarama vachifara.

Vanababa vakawanda vanozvidya mwoyo vachifunga kuti vangawanepi zvekudya uye zvekupfeka zvemhuri dzavo. Inzwa zvinotaurwa neShoko raMwari: “Nyatsocherechedzai shiri dzekudenga; hadzidyari mbeu kana kukohwa kana kuunganidza mumatura, asi Baba venyu vekudenga vanodzipa zvekudya. Hamukoshi kudzipfuura here?”—Mateu 6:25, 26.

“Dzidzai kumaruva emusango, makuriro aanoita . . . ; asi ndinokuudzai kuti kunyange [Mambo] Soromoni mukubwinya kwake kwese haana kumboshonga serimwe reaya. Zvino kana aya ari iwo mapfekedzero anoita Mwari zvinhu zvinomera musango . . . , angatadza here kutokupfekedzai kupfuura ipapo?”—Mateu 6:28-30.

Sezvo Mwari achigona kutipa zvekudya uye zvekupfeka, anogonawo kutibatsira kuti tiwane zvinhu zvatinoda pakurarama. Kana tikaedza kuita zvinodiwa naMwari, achatikomborera pakurima kwatinoita kana kuti achatibatsira kuwana basa tokwanisa kutenga zvatinoda pakurarama.—Mateu 6:32, 33.

Tine zvinhu zvakawanda zvinoita kuti tide Mwari. Zvimwe zvacho zvinosanganisira zuva raanotipa, mvura, maruva, uye shiri dzatinoona. Nyaya inotevera ichatibatsira kuona kuti Musiki wedu anotaura sei nesu.