Bhuku raDhanieri Rakatsanangurwa!

VAIVA pakokorodzano vaida zvikuru kuwana kopi yavo pachavo yebhuku remapeji 320 rakanga richangobva kubudiswa, rinonzi Fungisisa Uprofita hwaDhanieri! Vakanzwa sei nezvebhuku racho? Funga zvakataura vamwe.

“Kufanana nevazhinji vari kuyaruka, zvakandiomera kunakidzwa nokudzidza nhau yakare. Saka pandakagamuchira kopi yangu pachangu yebhuku idzva rinonzi, Fungisisa Uprofita hwaDhanieri! ndakanga ndisinganyanyi kunakidzwa nokurirava, asi ndakaedza. Vakomana, ndakanga ndakarasika! Iri nderimwe remabhuku akanakisisa andati ndamboona. Mutakunanzva chaiwo! Handichambonzwi kuti ndiri kurava nezvenyaya yakaitika zviuru zvemakore zvakapfuura. Kwenguva yokutanga, ndinofunga kuti ndinogona kuzviona saDhanieri. Zvechokwadi ndinogona kunyatsofungidzira zvazvingava zvakaita kutorwa mumhuri yako, kutumirwa kunyika yokumwe, uye kuedzwa kuvimbika kwako nguva nenguva. Ndinokutendai zvikuru nokuda kwebhuku iri.”—Anya.

“Chinonyanya kundibetsera ishoko riri pachena rokuti Jehovha ari kudzora zvakakwana nhau dzine chokuita nevanhu vake. Nezvakaratidzwa Dhanieri uye zvaakarota uye izvo zvavamwe zvaakadudzira, zviri pachena kuti Mwari wedu nguva dzose achabvumira kuti zvinhu zviitike maererano nezvaakaronga. Izvi zvinosimbisa tariro yatinayo mumifananidzo youprofita inowanikwa muBhaibheri maererano nenyika itsva yaari kugadzira.”—Chester.

“Ndakada nzira yamakaita kuti Dhanieri ave mupenyu. Ndakamuziva zviri nani nenzira yamakasimbisa kutarisira kwake uye kuva nehanya kwake. Ndaigona kunzwisisa zviri nani nei Jehovha akamuona achidikanwa kwazvo. Mumiedzo yake yose nezvitambudzo, aisanetseka nezvake. Ainyanyonetsekera Jehovha nezita Rake rakaisvonaka. Ndinokutendai nokuita kuti pfungwa idzi dzibude pachena.”—Joy.

“Izvi ndizvo zvatanga takamirira! Hazvina kunge zvamboratidzwa kuti zvinhu zvakawanda sei zviri mubhuku raDhanieri zvinonyatsoshanda kune mumwe nomumwe wedu. Ndarava zvakawanda zvebhuku idzva racho manheru ezuva andakarigamuchira, ndaitofanira kumira ndokutenda Jehovha mumunyengetero.”—Mark.

“Chatanga tisingatarisiri kwaiva kubatsira kwaraizoita vana vedu. Vane makore mashanu uye matatu. . . . Nepo nyaya dzaanaDhanieri, Hanania, Mishaeri, uye Azaria dzagara dziri pakati pedzavanofarira muBhuku Rangu Renhau dzeBhaibheri, nhoroondo iri mubhuku rinonzi Uprofita hwaDhanieri yavatapura munzira yatanga tisingatarisiri. Kunyange pazera ravo duku, vanoratidzika kuva vanokwanisa kuziva majaya aya akarurama. Mienzaniso inoshamisa zvakadini yokuti vana vedu vatevedzere! Chishandiso chinoshamisa zvakadini chamakatipa! Ndinokutendai, ndinokutendai zvikuru!”—Bethel.

“Ndainzwa sokuti ndaiva nevakomana vaduku vechiHebheru sezvavaiedzwa kutenda kwavo; uye izvi zvakandikurudzira kuongorora kutenda kwangu pachangu. Bhokisi rokudzokorora rine musoro unoti “Wanzwisisei?” rinoroverera mumwoyo zviri muchitsauko chacho. Ndinokutendaizve nokuda kwerimwe basa rounyanzvi.”—Lydia.