Zano Raamai Rouchenjeri

“Mwanakomana wangu, inzwa kurayirira kwababa vako; usarasha kudzidzisa kwamai vako.”—Zvirevo 1:8.

VABEREKI vedu—baba naamai vedu—vanogona kuva tsime rinokosha rokukurudzira, kutsigira nezano. Bhuku reBhaibheri raZvirevo rinotaura nezvemumwe mambo muduku, Remueri, akagamuchira ‘mashoko anokosha’ o‘kururamisa’ kubva kuna amai vake. Mashoko aya akanyorwa muchitsauko 31 chaZvirevo, uye isuwo tinogona kubatsirwa neiri zano raamai rouchenjeri.—Zvirevo 31:1.

Zano Rakakodzera Mambo

Amai vaRemueri vanotanga nemibvunzo inoverengeka inowedzera kufarira kwedu: “Nhai, mwanakomana wangu! Nhai, mwanakomana wedumbu rangu! Nhai, mwanakomana wemhiko dzangu!” Chikumbiro chavo chakadzokororwa katatu chinoratidza kuitira hanya kwavanoita kuti mwanakomana wavo ateerere mashoko avo. (Zvirevo 31:2) Kuitira hanya kwavo kugara zvakanaka kumudzimu kwevana vavo kunogadza muenzaniso wakanaka kuvabereki vechiKristu nhasi.

Nezvekugara zvakanaka kwemwanakomana wavo, chii chinganetsa amai kupfuura mitambo yokuzvifadza neyakaipa yewaini, vakadzi, uye nziyo zvinotaurwa muna Zvirevo? Amai vaRemueri vanotaura zvakananga nhau yacho: “Rega kupa vakadzi simba rako.” Vanotsanangura mufambiro wounzenza kuti ndiwo uno“paradza madzimambo.”—Zvirevo 31:3.

Kunwisa hakufaniri kurerutswa. “Iwe Remueri hazvifaniri madzimambo, hazvifaniri madzimambo kunwa waini,” vanoyambira kudaro. Ko mambo angapa mutongo wakanaka wokunzwisisa nokusa“kanganwa murayiro, [kuti] arege kukanganisa kururamisira vamwe vanotambudzika” sei kana achigara akadhakwa?—Zvirevo 31:4-7.

Mukupesana, nokusaita tsika dzakaipa dzakadaro, mambo anozogona kuti a“tonge zvakarurama [a]ruramisire murombo nounoshaiwa.”—Zvirevo 31:8, 9.

Kunyange zvazvo pwere dzechiKristu dzingasava “madzimambo” nhasi, zano rouchenjeri raamai vaRemueri riri kuuya panguva yakakodzera, kana risina kutonyanya kufanira. Kushandisa doro zvisina kufanira, kushandisa fodya, neunzenza zvakapararira pakati pevechiduku mazuva ano, uye zvinokosha kuti vaKristu vechiduku vateerere apo vabereki vavo vanovapa ‘mashoko anokosha.’

Mukadzi Anoita Zvakanaka

Vanaamai vane kodzero yokushushikana pamusoro pevachazoroorwa nevanakomana vavo vave kusvika pakuva vanhu vakura. Amai vaRemueri vanotendeukira  kuunhu hwomukadzi akanaka. Pasina kupokana, murume muduku anogona kubatsirwa zvikuru nokufunga maonero emukadzi panhau iyi inokosha.

Zvi 31 Mundima 10, “mukadzi anoita zvakanaka” anofananidzwa nemaparera asingawaniki pose pose neanokosha zvikuru, ayo munguva inotaurwa muBhaibheri aitowanika nekutamburira chaiko. Nenzira yakafanana, kuwana mukadzi anoita zvakanaka kunoda kutamburira. Pane kudisa kumhanyira kuroora, murume muduku angaita zvakanaka kuzvipa nguva yakakwana kuti anyatsosarudza. Ipapo, anozogona kukoshesa zvikuru chaanenge awana chinokosha.

Nezvemukadzi anoita zvakanaka, Remueri anoudzwa kuti: “Mwoyo womurume wake unomutenda.” (Zvi 31 Ndima 11) Nemamwe mashoko, haafaniri kuomerera pakuti mukadzi wake awane tendero yake panhau iri yose. Chokwadika, vakaroorana vanofanira kubvunzana vasati vaita zvisarudzo zvikuru, zvakadai sezvinosanganisira kutenga zvinhu zvinodhura kana zvokurera vana vavo. Kukurukurirana panhau idzi kunoita kuti pave nokubatana kwapedyo pakati pavo.

Chokwadika, mukadzi anoita zvakanaka, ane zvinhu zvakawanda zvokuita. Zvi 31 Mundima 13 kusvika ku27 makanyorwa mazano nenheyo izvo vakadzi vari kurarama munguva ipi zvayo vanogona kushandisa kubatsira mhuri dzavo. Somuenzaniso, nokukwira kwemitengo yezvokupfeka nemidziyo yomumba, mukadzi anoita zvakanaka anodzidza kushandisa maoko nokushandisa mari zvakanaka zvokuti mhuri yake inova nezvokupfeka zvakakwana uye ichiratidzika zvakanaka. (Zvi 31 Ndima 13, 19, 21, 22) Kuti aderedze mari yemhuri inoshandiswa kutenga zvokudya, anorima zvimwe zvinhu zvaanokwanisa uye anotenga nokuchenjera.—Zvi 31 Ndima 14, 16.

Zviri pachena kuti mukadzi uyu haadyi “zvokudya zvousimbe.” Anoshanda zvakaoma, uye anofambisa mabasa omumba make zvakanaka. (Zvi 31 Ndima 27) Anozvisunga “chiuno nesimba,” zvinoreva kuti anogadzirira kuita mabasa akaoma. (Zvi 31 Ndima 17) Anomuka zuva risati rabuda kuti atange zuva rake rokushanda, uye anoshanda nesimba kusvikira usiku. Zvinoita sokuti mwenje unovhenekera basa rake waibvira nguva dzose.—Zvi 31 Ndima 15, 18.

Kupfuuura zvose, mukadzi anoita zvakanaka munhu anoda zvokunamata. Anotya Mwari uye anomunamata noruremekedzo rukuru nokumutya. (Zvi 31 Ndima 30) Nenzira yakafanana anobatsira murume wake pakudzidzisa vana vavo kuita zvakafanana. Zvi 31 Ndima 26 inoti: “Nouchenjeri,” anorayiridza vana vake, uye “rurimi rwake runodzidzisa nounyoro.”

Murume Anoita Zvakanaka

Kuti akwezve mukadzi anoita zvakanaka, Remueri aifanira kuita zvinotarisirwa murume anoita zvakanaka. Amai vaRemueri vanomuyeuchidza zvinoverengeka zvazvo.

Murume anoita zvakanaka anogamuchira mushumo wakanaka kubva ku“vakuru venyika.” (Zvirevo 31:23) Izvozvo zvinoreva kuti anenge akachenjera, akatendeka, anovimbwa naye, uye anotya Mwari. (Eksodho 18:21; Dheuteronomio 16:18-20) Naizvozvo, anenge achi“zivikanwa pamasuwo eguta,” apo varume vakakurumbira vaiungana kuti vatarisire zvinhu zvomuguta. Kuti azo“zivikanwa” somurume anotya Mwari, anofanira kuva anonzwisisa uye kushanda achiwirirana nevakuru ve“nyika,” zvimwe kureva ruwa kana nharaunda.

Pasina kupokana vachitaura kubva kune zvakaitika kwavari, amai vaRemueri vanoyeuchidza mwanakomana vavo nezvekukosha kwekuratidza kuonga mukadzi waaitarisira kuroora. Hapana chero munhu panyika aizoona akamukunda kunaka. Naizvozvo fungidzira manzwiro ake emwoyo wose ari munzwi rake paanotaura pachena pamberi pavose kuti: “Vakunda vazhinji vakaita zvakanaka, asi iwe unovakunda vose.”—Zvirevo 31:29.

Zviri pachena kuti Remueri akakoshesa zano raamai vake rouchenjeri. Somuenzaniso, tinoona kuti mundima yokutanga anoratidza mashoko aamai vake seake. Nokudaro, akagamuchira ‘kururamisa’ kwavo nemwoyo wose, ndokubatsirwa nemazano avo. Ngatibatsirweiwo neaya ‘mashoko anokosha’ nokushandisa nheyo dzawo muupenyu hwedu.

[Mufananidzo uri papeji 31]

Mukadzi anoita zvakanaka haadyi “zvokudya zvousimbe”