“Uyai Kwandiri, . . . Uye Ndichakuzorodzai”

“Ngatiitirei Vose Zvakanaka”

KUPARIDZA nokudzidzisa mashoko akanaka oUmambo hwaMwari ndiro raiva basa guru raJesu. (Mako 1:14; Ruka 8:1) Sezvo vateveri vaKristu vachida kumutevedzera, vanoona basa rokudzidzisa shoko reBhaibheri pamusoro poUmambo hwaMwari riri iro basa ravo guru muupenyu. (Ruka 6:40) Zvechokwadi Zvapupu zvaJehovha zvinofara kuona mazorodzero anoita shoko roUmambo kune vaya vanorigamuchira—sezvakangoita Jesu paaiva pasi pano.—Mateu 11:28-30.

Kuwedzera pakudzidzisa Shoko raMwari, Jesu akaita mabasa akanaka, akadai sokuporesa vanorwara uye kupa vane nzara zvokudya. (Mateu 14:14-21) Saizvozvowo, Zvapupu zvaJehovha zvinowedzera basa razvo rokudzidzisa Bhaibheri nezviito zvinobatsira vari mumatambudziko. Pakutika Magwaro anoshongedzera vaKristu “basa rose rakanaka” uye anovakurudzira ‘kuitira vose zvakanaka.’—2 Timoti 3:16, 17; VaGaratiya 6:10.

“Hama Dzedu Dzaivapo”

Muna September 1999, Taiwan yakazunungutswa nokudengenyeka kwepasi kwaiparadza. Mwedzi mishomanana gare gare, mvura yaiva nemhepo yakasimba nemafashamo zvakakonzera imwe yenjodzi dzinongozviitikira dzoga yakaipisisa muVenezuela. Nguva ichangopfuura, mafashamo akaparadza munyika yeMozambique. Muzviitiko zvacho zvose zviri zvitatu, Zvapupu zvaJehovha zvakakurumidza kusvika panzvimbo pacho nezvokudya, mvura, mishonga, zvokupfeka, matende, uye zvokubikisa. Vazvipiri vane unyanzvi hwokurapa vakagadzira matumba okurapira vanhu vakanga vakuvara, uye vashandi vokuvaka vokuzvipira vakavaka dzimba itsva dzevanhu vakasiyiwa vasina misha.

Vakatarisana nenjodzi idzi vakakurudzirwa nokubatsirwa panguva chaiyo kwavakaitwa. “Patakanga tanyatsopererwa, hama dzedu dzaivapo,” anodaro  Malyori, uyo ane musha wakaparadzwa nemafashamo muVenezuela. Vazvipiri pavakavakira mhuri yake musha mutsva, Malyori akati: “Hatigoni kutenda Jehovha zvakakwana nokuda kwezvaakatiitira zvose!” Uye apo vakaparadzirwa misha nemafashamo muMozambique vakagamuchira kiyi dzemisha yavo mitsva, boka racho rose rakabva ratanga kuimba rwiyo rwoUmambo runoti “Jehovha Ndiye Hutiziro Hwedu.” *

Kubatsira vanoshayiwa kwaizorodza kunyange ivo vazvipiri. “Zvaizonakidza kushandiswa pakubatsira hama idzi dzaitambudzika zvakadaro,” akadaro Marcelo, uyo aishanda somukoti mumusasa wevapoteri muMozambique. Huang, mumwe muzvipiri muTaiwan, akati: “Zvaifadza zvikuru kushanda mukuendesera hama dzaishayiwa zvokudya nematende. Zvaisimbisa kutenda.”

Purogiramu Yokuzvipira Inobudirira

Basa rokuzvipira rave richiunzawo zororo romudzimu kumakumi ezviuru zviri mumajeri munyika yose. Sei? Mumakore achangopfuura, Zvapupu zvaJehovha zvakagovera mabhuku anotsanangura Bhaibheri kuvanhu vanopfuura 30 000 vari mumajeri anenge 4 000 muUnited States moga. Uyezve, pazvinobvira, zvimwe Zvapupu zvinoshanyira majeri kuti zvinodzidza Bhaibheri nevasungwa nokuitisa misangano yechiKristu. Vasungwa vanobatsirwa here?

Vamwe vasungwa vanodzidza Bhaibheri vanotanga kuudza vamwe vavo dzidziso dzinozorodza dzeShoko raMwari. Izvi zviri kuita kuti mumajeri anoverengeka munyika yose muve nemapoka evasungwa vanonamata Jehovha pamwe chete. “Boka redu riri kubudirira,” akadaro mumwe musungwa muOregon, U.S.A., muna 2001. “Tine vaparidzi voUmambo 7 uye tiri kuitisa zvidzidzo zveBhaibheri 38. Vanhu vanopfuura 25 vanopinda hurukuro yavose neChidzidzo cheNharireyomurindi, uye taiva ne39 vakapinda Chirangaridzo [chorufu rwaKristu]. Vamwe vanhu vatatu vachabhabhatidzwa munguva pfupi iri kutevera!”

Kubatsira Kwacho uye Mufaro

Vakuru vemajeri vakaona kuti purogiramu yokuzvipira iyi inoshanda. Chinonyanya kufadza vakuru vakuru kubatsira kwenguva refu kunoita purogiramu yokuzvipira iyi. Mumwe mushumo unoti: “Mumakore gumi ayo purogiramu iyi yave ichishanda, hapana musungwa akabudiswa abhabhatidzwa mujeri somumwe weZvapupu zvaJehovha akadzokera kujeri—kusiyana ne50 kusvikira ku60 muzana yemamwe mapoka inozodzokera kujeri.” Ashamiswa nezvakaitwa neZvapupu zvinozvipira, mumwe mufundisi womujeri muIdaho akanyorera tsamba kudzimbahwe reZvapupu zvaJehovha achiti: “Kunyange zvangu ini pachangu ndisingabvumirani nedzidziso dzenyu, ndinofadzwa zvikuru nesangano renyu.”

Kubatsira vari mumajeri kunoratidza kuva kunobatsirawo vazvipiri vacho. Pashure pokuita musangano neboka revasungwa iro rakaimba rwiyo rwoUmambo kokutanga, mumwe muzvipiri akanyora kuti: “Zvaikurudzira kuona varume 28 vachibatana mukuimbira Jehovha rumbidzo. Uye vaiimba vachidanidzira! Iropafadzo yakadini kuva pakadaro!” Mumwe muzvipiri aishanyira majeri muArizona akati: “Yave iri ropafadzo yakazokura kuva nomugove mukuita basa rinokosha iri!”

Vazvipiri veZvapupu vari munyika yose vanobvumirana naJesu, uyo akati: “Pane mufaro mukuru pakupa kupfuura uri pakugamuchira.” (Mabasa 20:35) Vanoitawo kuti zvinyatsooneka kuti kutevedzera kurudziro yeBhaibheri yokuitira vose zvakanaka kunozorodza zvechokwadi.—Zvirevo 11:25.

[Mashoko Omuzasi]

[Mufananidzo uri papeji 8]

Venezuela

[Mufananidzo uri papeji 8]

Taiwan

[Mufananidzo uri papeji 8]

Mozambique