“Munofanira Kunyengetera Kudai”

UNOZIVA mashoko oMunyengetero waShe here? Iwoyo munyengetero wokuenzanisira wakadzidziswa naJesu Kristu. MuMharidzo yake yepaGomo yakakurumbira, Jesu akati: “Ipapo, munofanira kunyengetera kudai.” (Mateu 6:9) Sezvo wakatangwa naJesu, unowanzonzi Munyengetero waShe, unozivikanwawo somunyengetero wokuti Baba Vedu.—Latin, Paternoster.

Mamiriyoni evanhu pasi pose akadzidza Munyengetero waShe nomusoro uye anoudzokorora kakawanda, pamwe zuva nezuva. Mumakore achangopfuura, vakawanda vakadzokorora munyengetero uyu muzvikoro uye mune zvimwe zviitiko zvevoruzhinji. Nei Munyengetero waShe uchikosheswa zvikuru?

Mumwe mufundisi womuzana remakore rechitatu ainzi Cyprian akanyora kuti: “Pane zvokunamata pane munyengetero ungapfuura watakapiwa naKristu here . . . ? Ndokupi kumwe kunyengetera kwechokwadi kwatingaita kuna Baba kungapfuura kuya kwatakaitirwa noMwanakomana uyo ari Chokwadi?”—Johani 14:6.

Mukatekisimo yayo, Chechi yeRoma Katurike inoratidza Munyengetero waShe “somunyengetero unokosha wechiKristu.” World Book Encyclopedia inobvuma kukosha kwomunyengetero  uyu muzvitendero zvose zvechiKristudhomu, uye inourondedzera semamwe “emashoko anokosha pakutenda kwechiKristu.”

Zvisinei, zvinofanira kubvumwa kuti, vakawanda vanodzokorora Munyengetero waShe nomusoro havanyatsounzwisisi. Rimwe pepanhau rokuCanada rinonzi Ottawa Citizen rinoti: “Kana uine karuzivo kechiKristu pamwe unogona kukurumidza kupedza Munyengetero waShe usina kumbotura befu, asi ungatadza kuutaura zvishoma nezvishoma uye uchiunzwisisa.”

Zvinombokosha here kuti tinzwisise minyengetero yedu yatinopa kuna Mwari? Nei Jesu akatipa Munyengetero waShe? Unorevei kwauri? Iye zvino ngatikurukurei mibvunzo iyi.