Mibvunzo Inobva Kuvaverengi

Ko Dhavhidhi, munhu aifadza mwoyo waMwari, akabata nhapwa dzake noutsinye here, semaonero anoita vamwe zviri pana 2 Samueri 12:31 na1 Makoronike 20:3?

Kwete. Dhavhidhi akangopa nhapwa dzechiAmoni basa rechibharo. Zvakaitwa naDhavhidhi zvave zvichionekwa zvisizvo nemhaka yemataurirwo anoitwa ndima idzi nedzimwe shanduro dzeBhaibheri.

Dzichitaura kurangwa kwakaitwa vaAmoni, shanduro idzodzo dzeBhaibheri dzinotaura nezvaDhavhidhi seakaoma mwoyo uye ane utsinye. Somuenzaniso, 2 Samueri 12:31, muKing James Version inoti: “Akauya nevanhu vaivamo, uye akavaisa pamasaha, uye pambambo dzesimbi, nepamatemo esimbi, ndokuvati vapfuure nomuhovhoni yezvidhinha: uye ndizvo zvaakaitawo mumaguta ose evana vaAmoni.” Nhoroondo iri pana 1 Makoronike 20:3 inotaurwawo nenzira yakafanana.

Zvisinei, sezvakacherechedzwa nomudzidzi weBhaibheri anonzi Samuel Rolles Driver, utsinye “hauenderani nezviito uye unhu zvaiva naDhavhidhi.” Ndokusaka mashoko ari muThe Anchor Bible achiti: “Dhavhidhi ari kuronga zvikwata zvebasa zvevasungwa kuitira kuti awane pfuma yenyika yaakapamba, ndizvo chaizvo zvaigaroitwa nemadzimambo ainge akunda.” Papfungwa imwe chete iyoyo, Adam Clarke anoti: “Saka zvazvinoreva ndezvokuti, vanhu vacho Akavaita varanda, ndokuvati vashande vachicheka nemasaha, vachigadzira mbambo dzesimbi, kana kushanda mumigodhi, . . . uye kutema huni nokukanya zvidhinha. Kucheka nesaha, kugura, kudimbura, uye kutema-tema vanhu, hazvimo munyaya ino, sezvo zvakanga zvisimowo mukubata kwaiita Dhavhidhi vaAmoni.”

Dzichitaura izvi nenzira yakarurama uye inonyatsonzwisiswa, shanduro dzakawanda dzanhasi dzinobudisa pachena kuti Dhavhidhi haafaniri kupomerwa kuti akabata vanhu noutsinye. * Cherechedza zvinotaura New English Translation (2003) kuti: “Akabudisa vanhu vaiva mariri uye akaita kuti vaite basa rakaoma nemasaha, mapiki esimbi, uye matemo esimbi, achiita kuti vashande pahovhoni yezvidhinha. Izvi ndizvo zvaaiitira maguta ose evaAmoni.” (2 Samueri 12:31) “Akatora vanhu vaigara muguta ndokuvati vashande nemasaha, mapiki esimbi, nematemo. Dhavhidhi akaita izvi kumaguta ose evaAmoni.” (1 Makoronike 20:3) Zvinotaurwa neNew World Translation zvinowirirana nezvinotaurwa nenyanzvi dzeBhaibheri dzemazuva ano kuti: “Akabudisa vanhu vaiva mariri, kuti aite kuti vacheke matombo uye kuti vashandise zvokushandisa zvesimbi zvakapinza nematemo esimbi, uye akaita kuti vakanye zvidhinha.” (2 Samueri 12:31) “Akabudisa vanhu vaiva mariri, akaita kuti varambe vachicheka matombo uye kuti vashandise zvishandiso zvakapinza zvesimbi nematemo; uye Dhavhidhi akaitira maguta ose evanakomana vaAmoni saizvozvo.”—1 Makoronike 20:3.

Dhavhidhi haana kuomesera mwoyo uye kuponda zvinotyisa vaAmoni vakawanda vaakanga akunda. Haana kutevedzera tsika dzehondo dzoutsinye dzomuzuva rake.

[Mashoko Omuzasi]