Vakaita Kuti Mwoyo Yevabereki Vavo Ifare
Vakaita Kuti Mwoyo Yevabereki Vavo Ifare
“MWANAKOMANA wangu, kana mwoyo wako ukava wakachenjera, mwoyo wangu ini uchafara.” (Zvirevo 23:15) Chokwadi, vabereki vechiKristu vanofara vana vavo pavanowana uchenjeri hwaMwari. Musi woMugovera, September 10, 2005, boka revanhu 6 859 vakabva kunyika dzakawanda raivapo richiona vaipedza kudzidza vekirasi yechi119 paChikoro cheBhaibheri cheWatchtower cheGiriyedhi. Mwoyo yavo vose yakapfachukira nomufaro, kunyanya vabereki vevaipedza kudzidza vacho 56.
David Walker, uyo ave nenguva yakareba ari nhengo yemhuri yeBheteri kuUnited States, akavhura purogiramu yacho nomunyengetero womwoyo wose. Zvadaro sachigaro, David Splane weDare Rinodzora reZvapupu zvaJehovha, akatanga purogiramu yacho nokuudza vanababa navanaamai vevadzidzi vacho kuti: “Tinofanira kukurumbidzai nomwoyo wose. Unhu hwamakadzidzisa vanakomana nevanasikana venyu hwakaita kuti vade kuita basa roumishinari.” Vabereki ivavo vangave vaizvidya mwoyo, sezvo vanakomana nevanasikana vavo vaizokurumidza kuenda kunoita basa ravo kunyika dziri kure. Zvisinei, Hama Splane vakavavimbisa kuti: “Musanetseka pamusoro pevana venyu. Jehovha anogona kuvatarisira zviri nani kudarika zvamungagona kuita.” Vakabva vati: “Chimbofungai zvinhu zvakanaka zvichaitwa nevanakomana nevanasikana venyu. Vanhu vanotambura vachanyaradzwa zvechokwadi kokutanga muupenyu hwavo.”
Kuramba Muchiita Kuti Vamwe Vafare
Sachigaro akasuma vakurukuri vana. Ralph Walls weDare Rebazi rokuUnited States ndiye akatanga kukurukura musoro waiti, “Rambai Makasvinura.” Akasimbisa kuti upofu hwezvokunamata hwakaipa kudarika upofu chaihwo. Ungano yokuRaodhikiya yomuzana remakore rokutanga yakanga isingachaoni zvokunamata. VaKristu vaiva muungano iyoyo avo vaiva mapofu mune zvokunamata vakabatsirwa, asi nguva dzose zviri nani zvikuru kudzivisa upofu hwakadaro nokuramba takasvinura mune zvokunamata. (Zvakazarurwa 3:14-18) Mukurukuri wacho akati: “Rambai makasvinura, uye onai varume vane mutoro sokuonekwa kwavanoitwa naJehovha.” Vadzidzi vacho havafaniri kunyanya kuzvidya mwoyo kana muungano muine matambudziko. Ishe Jesu Kristu anoziva zvinhu zvose zvakadaro. Achaona kuti zvinhu zvagadziriswa panguva yakakodzera.
Zvadaro, Samuel Herd weDare Rinodzora akapindura mubvunzo waiti, “Magadzirira Here?” Sezvo munhu anofamba rwendo achitakura zvokupfeka zvaanoda, saka vari kupedza kudzidza vanofanirawo kupfeka unhu hutsva nguva dzose. Vanofanira kunzwira tsitsi sezvaiita Jesu. Mumwe munhu aiva nemaperembudzi paakamuudza kuti: “Kana muchida henyu, munogona kundichenesa,” Jesu akati: “Ndinoda. Cheneswa.” (Mako 1:40-42) Mukurukuri wacho akabva azoti: “Kana muchinyatsoda kubatsira vanhu, muchawana nzira yokuvabatsira nayo.” VaFiripi 2:3 inoudza vaKristu kuti vafunge kuti “vamwe vakuru.” Hama Herd vakati: “Kuva nomwoyo unozvininipisa kunonyanya kukosha kupfuura kuva nezivo. Vaya vamunoona muushumiri hwenyu uye hama nehanzvadzi dzenyu dziri muungano vachabatsirwa nezivo yenyu kana bedzi muchizvininipisa.” Vakagumisa nokutaura kuti kana vadzidzi vacho vaizoramba vachipfeka rudo rwechiKristu, vaizenge vakagadzirira kuenda kubasa ravo, vaine chokwadi chokunobudirira.—VaKorose 3:14.
Mark Noumair, mumwe wevarayiridzi veGiriyedhi, akavapa havi yokuda kuziva nomusoro wehurukuro yake waiti, “Mucharamba Muine Manzwiro Iwayo Here?” “Manzwiro” ari kurehwa kuonga kwatinoita kunaka kwaJehovha. Pisarema 103:2 rinoti: “Rumbidza Jehovha, haiwa mweya wangu, urege kukanganwa zvose zvaakaita.” VaIsraeri vakaratidza kuti vakanga vasingaongi mana yaiita kuti varambe vari vapenyu, vachiiti “chingwa ichi chinosembura.” (Numeri 21:5) Nguva zvayaifamba, kukosha kwemana hakuna kuchinja, asi kuionga kwavaiita kwakanyangarika. Murayiridzi wacho akati: “Kana mukakanganwa mabasa aJehovha moita kuti basa renyu rokune imwe nyika ringova basawo zvaro, izvozvo zvichakanganisa maonero amunoita basa ramakapiwa naJehovha.” Pisarema 103:4 rinoti Jehovha ari ku“kupfekedza[i] korona yomutsa worudo.” Vadzidzi vacho vachaona mutsa worudo waMwari muungano dzavo itsva.
Mumwe murayiridzi weGiriyedhi, Lawrence Bowen, akakurukura musoro waiti “Muchakomborerwa Here?” Akataura kuti nhengo dzekirasi yechi119 yeGiriyedhi dzakadzidza nesimba kuti dzive mamishinari anobudirira. Asi iye zvino vanofanira kunamatira pana Jehovha uye pabasa raakavapa. Pana Zvakazarurwa 14:1-4 panotsanangurwa vane 144 000 se“vanoramba vachitevera Gwayana pasinei nokwarinoenda.” Vose vari muboka racho vanoramba vakavimbika kuna Jehovha noMwanakomana wake pasinei nemiedzo yavo, uye vanozadzika chinangwa chavo. “Pasinei nezvingaitika, isuwo tinoramba takavimbika kuna Jehovha uye tinoramba tichiita basa raakatipa,” akadaro mukurukuri wacho. Nokuita izvozvo, vadzidzi vachaona kuti zvikomborero zvaJehovha ‘zvichavabata.’—Dheuteronomio 28:2.
Kubereka Zvibereko Mubasa Ravo
Vadzidzi vacho vaiita ushumiri hwomumunda pakupera kwevhiki kumwe nokumwe pavaiva pachikoro. Sezvavakataurirwa papurogiramu yacho naWallace Liverance, mabharani wechikoro chacho, zvakava pachena kuti vakanga vabudirira. Vakaparidzira mashoko akanaka muinenge mitauro gumi uye vakatanga kudzidza Bhaibheri nevanhu vakawanda. Mumwe murume nomudzimai wake vaiva vapedza kudzidza kuGiriyedhi vakatanga kudzidza Bhaibheri nomumwe murume wokuChina. Pashure pokunge vamushanyira kaviri, vakamubvunza kuti ainzwa sei nezvokuziva Jehovha. Akavhura Bhaibheri rake ndokuvakumbira kuti vaverenge Johani 17:3. Ainzwa kuti aiva munzira inoenda kuupenyu.
Anthony Morris weDare Rinodzora akabva azobvunzurudza hama nhatu dziri muMatare Emapazi okuCôte d’Ivoire, Dominican Republic, neEcuador. Hama idzi dzakavimbisazve vadzidzi ava kuti Matare Emapazi acho ari kutarisira kusvika kwavo uye achavabatsira kuronga mabasa avo.
Zvadaro, Leonard Pearson wemhuri yeBheteri yokuUnited States akataura nenhengo nhatu dzeMatare Emapazi okuDemocratic Republic of the Congo, Papua New Guinea, nokuUganda. Hama idzi dzakakurudzira vadzidzi vacho kuti vaite zvizere ushumiri hwomumunda. Mamwe mamishinari maviri akaroorana akanga apedza makore 21 ari kuCongo akabatsira vanhu 60 kuzvitsaurira uye kubhabhatidzwa. Vaviri vacho iye zvino vanodzidza Bhaibheri nevanhu 30, uye 22 vavo vanopinda misangano yeungano. Sezvo kukohwa mune zvokunamata kwakura zvakadaro, iye zvino ndiyo nguva yakanakisisa yokuva mumishinari.
Kupupurira Nepfungwa Yokukurumidzira
Gerrit Lösch weDare Rinodzora ndiye akapa hurukuro yokupedzisira. Musoro wehurukuro yake waiti, “Kutaura nezvaMwari uye Kupupurira Jesu Muzuva raShe.” Mashoko okuti “kupupura,” “zvapupu,” uye “kupupurira” anowanikwa ka19 mubhuku raZvakazarurwa. Saka, Jehovha anonyatsoratidza basa raanoda kuti vanhu vake vaite. Tichaita rini uchapupu ihwohwo? Tichahuita Zvakazarurwa 1:9, 10) Zuva iroro rakatanga muna 1914, richiri kuenderera mberi muzuva redu, uye rinopfuurira munguva yemberi. Maererano naZvakazarurwa 14:6, 7, basa rokutaura nezvaMwari rinotsigirwa nengirozi. Zvakazarurwa 22:17 inoratidza kuti vaKristu vakazodzwa vasara ndivo vane basa rokutungamirira kupupurira Jesu. Asi isu tose tinofanira kushandisa ropafadzo iyoyo iye zvino. Mundima 20, Jesu anoti: “Ndiri kukurumidza kuuya.” Hama Lösch vakakurudzira vose vaivapo kuti: “Udzai vanhu kuti, ‘Uyai, torai mvura youpenyu musingatengi.’ Jesu ari kukurumidza kuuya. Tagadzirira here?”
“muzuva raShe.” (Fred Rusk, aishumira somurayiridzi paChikoro cheGiriyedhi kwemakore 11, akagumisa purogiramu yacho nomunyengetero wokuonga Jehovha uyo wakabaya mwoyo yevose vaivapo. Kwaiva kuguma kwakakodzera kwezuva rakanga richifadza zvikuru.
[Bhokisi riri papeji 13]
ZVAKAITA KIRASI YACHO
Nyika dzinomiririrwa: 10
Nyika dzavakatumirwa: 25
Vadzidzi: 56
Avhareji yezera: 32,5
Avhareji yemakore vari muchokwadi: 16,4
Avhareji yemakore vari muushumiri hwenguva yakazara: 12,1
[Mufananidzo uri papeji 15]
Kirasi Yechi119 Yevakapedza Kudzidza paChikoro cheBhaibheri cheWatchtower cheGiriyedhi
Pamazita akarongwa pasi apa, mitsetse inoverengwa kubva mberi zvichidzokera shure, uye mazita akarongwa kubva kuruboshwe zvichienda kurudyi mumutsetse woga woga.
(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.