Akanga Akwegura asi Asina Kusurukirwa

NEMHAKA yokukwegura, vakawanda vanenge vasingachakwanisi kuita zvakawanda, uye vasingachakwanisi kusonganirana nevamwe munzanga. Izvozvo hazvisizvo zvakaitika kuna Fernand Rivarol, akazofa ava nemakore 95 kuGeneva, Switzerland. Aigara oga, nokuti mudzimai wake akanga afa uye mwanasikana wake akaroorwa aiva nomusha wakewo. Kunyange zvazvo aiwanzogara achingova pamba pake, akanga asina kusurukirwa. Aiwanzogara patafura muimba yokutandarira, achishandisa runhare kuti akurukure nevanhu zvinhu zvine chokuita nokunamata.

Pane imwe nguva muupenyu hwake hwaifadza, Fernand akanga asingakwanisi kubva pamba pake. Nei? Fernand nomudzimai wake pavakangova Zvapupu zvaJehovha zvaishingaira muna 1939, Hondo Yenyika II yakabva yatanga muEurope. Fernand akaomerera pachisarudzo chake chakavakirwa paBhaibheri chokusakuvadza munhu chero upi zvake. Pamusana paizvozvo, basa rake rakapera uye aifanira kuva mujeri kanoverengeka—ose pamwe chete akasvika makore mashanu nehafu—nguva yaakagara akaparadzana nomudzimai wake nomwanasikana wake muduku.

Achifunga izvozvo, Fernand akati: “Kune vanhu vakawanda, zvinoita sokuti ndakasiya basa rakanga rakanaka ndokurega kutsigira mhuri yangu. Vanhu vaindizvidza uye vaindibata setsotsi. Asi pandinofunga nezvemakore iwayo akaoma, ndinonyatsoyeuka kutsigirwa uye kubatsirwa kwatakaitwa naJehovha. Pava nemakore akawanda kubvira ipapo, asi kuvimba kwandinoita naJehovha kuchakasimba sezvakwakanga kwakaita panguva iyoyo.”

Kutenda uku kwakakurudzira Fernand kuudza vamwe tariro yake yomuMagwaro achishandisa runhare. Mumwe munhu paairatidza kufarira, aimutumira bhuku reBhaibheri. Gare gare, aizoridzirazve munhu wacho runhare kuti anzwe kana akanga anakidzwa nebhuku racho. Dzimwe nguva vanhu vaipindura nokumunyorera tsamba vachionga, zvaiita kuti afare zvikuru.

Zvimwe mumwe munhu wokwaunogara akaita saFernand angakuridzira runhare. Wadii kuteerera zvaanotaura kuitira kuti uzive zvaanotenda? Zvapupu zvaJehovha zvinofara kugara zvichikurukura newe zvazvinotenda.