YAIVA nguva yakaoma zvikuru muJerusarema, guta raiva netemberi yaMwari. Mambo Ahaziya akanga achangourayiwa. Zvakazoitwa naamai vaAhaziya, Atariya zvinonyadzisa. Vakaita kuti vazukuru vavo, vanakomana vaAhaziya, vapondwe! Unoziva here kuti nei?— * Vaiitira kuti vanakomana vaAhaziya vasatonga asi ivo vave mutongi.

Zvisinei, Jehoashi, mumwe muzukuru waAtariya aiva mucheche, akanunurwa, uye mbuya vake havana kana kutombozviziva. Ungada here kuziva kuti akanunurwa sei?— Mucheche uyu aiva natete vainzi Jehoshebha, vakavanza Jehoashi mutemberi. Tete ava vaikwanisa kuita izvi nokuti murume wavo, Jehoyadha, aiva Mupristi Mukuru. Saka vose vari vaviri vakanyatsochengetedza Jehoashi.

Jehoashi akavanzwa mutemberi kwemakore matanhatu. Ndimo maakadzidziswa nezvaJehovha Mwari nemitemo yake. Jehoashi paakazosvitsa makore manomwe, Jehoyadha akaita kuti Jehoashi ave mambo. Ungada here kunzwa kuti Jehoyadha akazviita sei, uye kuti chii chakaitika kuna ambuya vaJehoashi, Mambokadzi aiva akaipa Atariya?—

Jehoyadha akashevedza varindi vaiita basa rokuchengeta madzimambo muJerusarema panguva iyoyo. Akavaudza nezvokununura kwavakanga vaita mwanakomana waMambo Ahaziya. Jehoyadha akabva aita kuti varindi vacho vaone Jehoashi, uye vakaona kuti ndiye aiva nekodzero yokutonga. Saka, vakaronga zvavaizoita.

Jehoyadha akabudisa Jehoashi uye akabva amupfekedza korona. Vanhu “vakatanga kuombera vakati: ‘Mambo ngaararame!’” Varindi vakakomberedza Jehoashi kuti vamuchengetedze. Atariya paakanzwa mheremhere yevanhu vaifara akamhanya kwavaiva uye akataura kuti akanga amukirwa. Asi Jehoyadha akarayira varindi kuti vauraye Atariya.—2 Madzimambo 11:1-16.

Unofunga here kuti Jehoashi akaramba achiteerera Jehoyadha uye achiita zvakanaka?— Hungu, akateerera Jehoyadha paakanga achiri mupenyu. Jehoashi akatoita kuti vanhu vabvise mari yokuti temberi yaMwari igadziriswe, yakanga  isiri kutarisirwa zvakanaka nababa vake, Ahaziya uye sekuru vake, Jehoramu. Asi ngationei kuti chii chakazoitika Mupristi Mukuru Jehoyadha paakafa.—2 Madzimambo 12:1-16.

Jehoashi akanga ava nemakore 40. Pane kuti arambe achishamwaridzana nevaya vaishumira Jehovha, Jehoashi akashamwaridzana nevainamata vanamwari venhema. Zekariya, mwanakomana waJehoyadha akanga ari mupristi waJehovha panguva iyoyo. Unofunga kuti Zekariya akaitei paakaziva nezvezvakaipa zvakanga zvava kuitwa naJehoashi?—

Zekariya akaudza Jehoashi kuti: “Zvamakasiya Jehovha, iye achakusiyaiwo.” Mashoko iwayo akatsamwisa Jehoashi zvikuru zvokuti akarayira kuti Zekariya atemwe nematombo kusvika afa. Chimbofunga—Jehoashi akanga anunurwa kuti asapondwa, asi iye akazoita kuti Zekariya apondwe!—2 Makoronike 24:1-3, 15-22.

Unoona zvidzidzo zvatinowana munyaya iyi here?— Chokwadi, hatitombodi kufanana naAtariya, aivenga vamwe uye aiva noutsinye. Asi, tinofanira kuda vatinonamata navo kunyange vaya vanotivenga, sezvatakadzidziswa naJesu kuti tiite. (Mateu 5:44; Johani 13:34, 35) Uye yeuka kuti kana tikatanga tichiita zvakanaka sezvakaitwa naJehoashi, tinofanira kuramba tichishamwaridzana nevaya vanoda Jehovha uye vanotikurudzira kumushumira.