Gore ra2022 ndiro gore rechi50 bazi reJapan richiprinda mabhuku. Mumakore ekuma1950 nekuma1960 hama nehanzvadzi dzemuJapan, pamwe chete nemamishinari 70 aivamo dzakashanda nesimba pakuparidza zvikaita kuti nhamba yevaparidzi iwedzere chaizvo. Sezvo vanhu vakawanda vaifarira mabhuku anotsanangura Bhaibheri mumutauro wechiJapanese, pakarongwa kuti bazi rekuJapan ritange kuprinda Nharireyomurindi neMukai!

Pagungano rakaitwa muguta reTokyo muna 1969 raiva nemusoro waiti “Peace on Earth,” hama Nathan H. Knorr vakataura kuti kwaizovakwa bazi idzva rine nzvimbo yekuprindira mabhuku muguta reNumazu, mujinga megomo reMount Fuji.

Basa rekuvaka rakatanga muna January 1972. Pakazosvika 15 August 1972, muchina wekuprinda unorema matani 40 nemimwe michina inosonanidza mabhuku nekucheka kumicheto zvakanga zvatoiswa. Magazini yakatanga kuprindwa pabazi iri idzva yaiva Mukai! yechiJapanese yaOctober 8, 1972. Imwe hama yaishanda munoprindwa panguva yacho inoti: “Ndakachema nemufaro pandakaona mabhokisi akawanda emamagazini akanga ava kuda kuendeswa kunzvimbo dzakasiyana-siyana.”

Muna 1982, bazi reJapan rakatama richienda kune imwe nzvimbo itsva muguta reEbina. Nzvimbo yacho yakanga yakakura zvekupeta nekatatu yavaimboshandisa muNumazu uye yaiva nemichina mitsva yemhando yepamusoro inoprinda mabhuku akawanda munguva pfupi. Kunze kwekungoprinda Nharireyomurindi neMukai!, bazi racho rakatanga kuprindawo Shanduro yeNyika Itsva. Vakatangawo kuprinda mamwe mabhuku anotsanangura Bhaibheri mumitauro inopfuura 200.

Iye zvino, bazi rekuJapan rava kuprinda magazini eNharireyomurindi neMukai! anosvika 13,2 miriyoni pamwedzi. Kubva muna 2013, vakaprinda maBhaibheri anopfuura 20 miriyoni mumitauro inopfuura 100 uye vakaatumira kunyika dzinopfuura 50.

Muna 1972, kwaiva nevaparidzi vanenge 13 000 muJapan. Iye zvino papfuura makore 50, uye nhamba iyi yawedzera kusvika ku213 000. Tinofara zvikuru kuona kuti basa iri rekuprinda ratsigira sei basa reUmambo muJapan uye pasi rese.—Mateu 28:19, 20.