Musi wa27 February 2023, dare reYalta City Court of the Republic of Crimea rakati Hama Taras Kuzo nemudzimai wavo, Hanzvadzi Darya Kuzo, pamwe chete naHama Sergey Lyulin naHama Petr Zhiltsov vane mhosva. Hanzvadzi Darya vakatongerwa kugara mujeri kwemakore matatu asi mutongo wacho wakambosendekwa. Havasati vava kufanira kuenda kujeri pari zvino. Hama Taras vakatongerwa kugara mujeri kwemakore 6 nehafu uye Hama Sergey naHama Petr vakatongerwa kugara mujeri kwemakore 6 nemwedzi mumwe chete. Hama dzacho nhatu dzakabva dzatovharirwa.

1. 4 March 2021

   Taras anopomerwa mhosva yekutsigira nemari sangano rinopandukira hurumende

2. 11 March 2021

   Mapurisa akasecha dzimba 9 dzeZvapupu zvaJehovha, kusanganisira imba yahama nahanzvadzi Kuzo neyahama Sergey. Hama Kuzo vakabva vaiswa mujeri rinoiswa vanhu vanenge vakamirira kuzotongwa

3. 12 March 2021

   Taras akasunungurwa achibva arambidzwa kubva pamba uye akarambidzwa kugara nemhuri yake

4. 29 July 2021

   Darya, Petr, naSergey vanopomerwa mhosva. Petr akabva aiswa mujeri rinoiswa vanhu vanenge vakamirira kuzotongwa

5. 30 July 2021

   Nyaya dzavo dzakabatanidzwa kuita nyaya imwe chete. Petr akasunungurwa achibva arambidzwa kubva pamba

6. 11 August 2021

   Sergey akasungwa achibva aendeswa kujeri rinoiswa vanhu vanenge vakamirira kuzotongwa riri kure nemakiromita 800 kubva kwaanogara. Rwendo rwacho runotora maawa 16. Paaiendeswa kujeri, maoko ake akanga akasungirirwa pasimbi iri padenga remota yacho uye makumbo ake akanga akasungirirwa pachigaro chaakanga akagara

7. 1 March 2022

   Sergey akabudiswa mujeri achibva arambidzwa kubva pamba

8. 4 April 2022

   Nyaya inopinda mudare

9. 11 July 2022

   Petr, Sergey, naTaras vakanzi vava kubvumidzwa kubva pamba asi vakarambidzwa kuita nzendo

Hama nehanzvadzi dzakatendeka dziri mujeri, dzakamirira kutongwa kana kuti dzisiri kubvumidzwa kubva pamba dzinogona kumbonzwa sekuti ‘dzakaomerwa zvekutadza kufamba,’ asi Jehovha haambovasiyi nemhaka yezita rake.—2 VaKorinde 4:8, 9.