30 MAY 2023
RUSSIA

Hama Dziri muTeykovo Dziri Kunyatsoona Kuti Jehovha Ari Kudzitsigira

PLAY

Dare reTeykovskiy District Court rava pedyo kupa mutongo waro panyaya ine chekuita naHama Sergey Galyamin, Anatoliy Lyamo, Vladimir Spivak, naHama Aleksandr Vasichkin. Muchuchisi haasati ataura kuti anoda kuti vapiwe mutongo wakaita sei.

Nhoroondo Dzeupenyu

Sergey Galyamin

Akaberekwa: 1967 (Teykovo, Ivanovo Region)

Upenyu Hwake: Ane bhizinesi rekugadzirisa bhutsu

Akachata naLyudmila muna 1991. Vane vanasikana vatatu

Akabayiwa mwoyo paakadzidza kuti Mwari ane zita. Mutsa waakaratidzwa paakapinda musangano weZvapupu zvaJehovha wakaita kuti anyatsoona kuti akanga awana chokwadi. Sergey akabhabhatidzwa muna 2001 uye Lyudmila akazobhabhatidzwa muna 2002

Zvaakataura

Chii chamakadzidza pamamiriro ezvinhu akaoma amuri maari?

Pandakatanga kunzwa mabatirwo aiitwa hama nehanzvadzi, ndakagumbuka. Uye ndakatanga kunetseka pandaifunga nezveramangwana rangu. Asi ndakabva ndayeuka mashoko ari pana Pisarema 73:26 anoti: “Muviri wangu nemwoyo wangu zvingaparara, asi Mwari idombo remwoyo wangu.” Mashoko aya ndiwo andainyatsoda kunzwa panguva iyoyo. Ndakaona kuti hazvibatsiri kugara ndichinetseka uye ndichifunga zvinhu zvakaipa zvinogona kuzoitika. Kwaitova kuchenjera kuti ndirambe ndichisimbisa ushamwari hwangu naJehovha uye ndichivimba naye.

Anatoliy Lyamo

Akaberekwa: 1963 (Pogar, Bryansk Region)

Upenyu Hwake: Aiita basa rekuvaka

Akachata naGalina muna 1993. Vane vana vaviri nevazukuru vaviri

Aitsvaga chokwadi uye akabayiwa mwoyo paakaona kuti zvinotaurwa neBhaibheri zvine musoro. Anatoliy akabhabhatidzwa muna 1995 uye Galina akazobhabhatidzwa muna 1997

Zvaakataura

Hama nehanzvadzi dziri kukubatsirai sei?

Ndava kunyatsoda uye kukoshesa hama nehanzvadzi dzangu. Handikwanisi kunyatsotsanangura kuti Jehovha akabatsira zvakadii achishandisa hama nehanzvadzi dzangu. Ndakasangana nematambudziko akawanda paiongororwa nyaya yedu asi Jehovha akariritira mhuri yangu achishandisa hama nehanzvadzi. Vanoratidza ushingi kuburikidza nekuuya kudare kuzonditsigira. Uye zuva nezuva, vanonditumira mameseji vachindiudza kuti vari kundinyengeterera uye vari kunyengetererawo mhuri yangu. Zvavanoita zvinondikurudzirawo kuti ndide kubatsira vamwe vari kusanganawo nematambudziko.

Vladimir Spivak

Akaberekwa: 1955 (Litin, Ukraine)

Upenyu Hwake: Aiva muchiuto asati ava mumwe weZvapupu zvaJehovha

Akachata naNellie muna 1979. Nellie ndiye akatanga kudzidza Bhaibheri. Vakaenda vese kugungano muna 1992 uye Vladimir akabayiwa mwoyo nezvaakaona uye zvaakanzwa pagungano racho. Nellie akabhabhatidzwa muna 1994 uye Vladimir akazobhabhatidzwa muna 1997

Zvaakataura

Chii chiri kukubatsirai kuti mukurire kuora mwoyo?

Chimwe chezvinhu zvandinosuwa chaizvo kupinda magungano. Kusaungana nevamwe uye kusaitawo zvimwe zvinhu zvandiri kurambidzwa kunomboita kuti ndishaye simba uye ndiore mwoyo dzimwe nguva. Asi ndinoziva kuti handisi ndega. Jehovha aneni nguva dzese uyewo hama nehanzvadzi dzinozvipira kundibatsira nguva dzese. Ndine chokwadi chekuti Jehovha acharamba achinditsigira, achindidzivirira uye achindibatsira kutsungirira matambudziko.

Aleksandr Vasichkin

Akaberekwa: 1969 (Bryansk, Bryansk Region)

Upenyu Hwake: Aiva muchiuto asati ava mumwe weZvapupu zvaJehovha. Aiita basa rekugadzira zvivanze

Akachata naNataliya muna 1993. Vane vana vaviri

Akabayiwa mwoyo nemutsa waakaratidzwa paaipinda misangano yeZvapupu zvaJehovha. Iye nemudzimai wake vakatanga kudzidza Bhaibheri. Nataliya akabhabhatidzwa muna 1994 uye Aleksandr akazobhabhatidzwa muna 1995

Zvaakataura

Chii chiri kukubatsirai kuti musanyanya kunetseka nezvematambudziko amuri kutsungirira?

Ndakaona kuti pandinotanga kuzvinzwira tsitsi ndinobva ndanyanya kuora mwoyo. Pane kufunga nezvekuti nei izvi zviri kuitika kwandiri, ndinoisa pfungwa paropafadzo yandiinayo yekuparidza nezvaJehovha. Ndinoyeukawo kuti zvinhu zvandiri kusangana nazvo iye zvino ndezvenguva pfupi. Pasina nguva, zvinenge zvatopera. Kana ndikaramba ndakatendeka, ndicharamba ndiine ushamwari hwepedyo naJehovha uyewo nehama nehanzvadzi dzangu.

Tese tinoziva kuti matambudziko atinosangana nawo munyika ino ndeenguva diki kana achienzaniswa nemakomborero atichapiwa naJehovha nekusingaperi munguva yemberi.—2 VaKorinde 4:17, 18.

Zvinhu Zvakaitika

10 April 2020

Vakapomerwa mhosva
11 April 2020

Dzimba dzavo dzakasechwa
16 April 2020

Vakarambidzwa kuita nzendo
2 February 2023

Nyaya yakatanga kutongwa mudare

NHAU DZAKABUDISWA