21 JANUARY 2022
RUSSIA

Hama Nehanzvadzi Dzedu Dzemuguta reKarpinsk Dziri Kuvimba naJehovha Uye Dzine Kutenda Kwakasimba

PLAY

Dare reKarpinsk City Court of the Sverdlovsk Region rava pedyo kupa mutongo waro panyaya yahanzvadzi Darya Dulova, Venera Dulova, hama Aleksandr Prianikov nemudzimai wavo, hanzvadzi Anastasiya Prianikova, nahanzvadzi Svetlana Zalyaeva. Muchuchisi haasati ataura kuti anoda kuti vapiwe mutongo wakaita sei

Zvinhu Zvakaitika

27 January 2020

Aleksandr, Darya, naVenera vakanzi vane mhosva panyaya yavakatanga kupomerwa
February 2020

Aleksandr, Darya, naVenera vanopomerwa imwe mhosva zvakare
30 March 2020

Mapurisa akasecha dzimba dzavo vachibva vatorerwa mafoni nemakombiyuta
19 May 2020

Anastasiya naSvetlana vakapomerwawo mhosva. Vakanzi vasabuda munharaunda yavanogara
29 April 2021

Nyaya yavo yakatanga kupinda mudare

Nhoroondo Dzeupenyu

Venera Dulova

Akaberekwa: 1968 (Karpinsk, Sverdlovsk Region)

Upenyu Hwake: Akarerwa naamai nambuya vake. Anofarira kuruka, kuverenga mabhuku nekudzidza. Akafirwa naamai nambuya vake asati asvitsa makore 17. Akachata muna 1990. Ane vana vatatu

Ainetseka kuti nei tichifa uye kuti ramangwana revana vake raizenge rakamira sei. Akatanga kudzidza Bhaibheri neZvapupu zvaJehovha aine makore 28. Akabhabhatidzwa muna 1998

Zvaakataura

Jehovha ari kukutsigirai sei panguva ino?

Hama dzangu dzaimbopikisa ini nemurume wangu dzava kutibata zvakanaka. Murume wangu anondirumbidza uye anondikurudzira kuti ndisakanda mapfumo pasi. . . . Jehovha anondibatsirawo achishandisa hama nehanzvadzi dzedu. Zvadzinotaura zvinotikurudzira.

Imba yedu payakasechwa kekutanga, chinhu chakatanga kuuya mupfungwa dzangu ndechekuti: ‘Ndiri kunzi ndakapara mhosva. Hazvingamboiti. Zvinhu izvi zvinotyisa uye hazvina kunaka!’ Asi imwe shamwari yangu yakandiudza kuti ndisafunga izvozvo, asi kuti ndifunge kuti, ‘Ndichakunda sezvakaita Jesu.’

Aleksandr Prianikov

Akaberekwa: 1987 (Udinsk, Khabarovsk Territory)

Upenyu Hwake: Anofarira mimhanzi. Anogona kuridza chiridzwa chinonzi accordion. Aiita zvemagetsi pane imwe fekitari. Iye zvino ava kuita basa rekugadzira matiles

Kubvira kare, aitenda kuti Mwari ariko. Vimbiso yaMwari yekuti vanhu havazombofi yakamubaya mwoyo. Akabhabhatidzwa muna 2004. Akachata nemudzimai wake, Anastasiya, muna 2011

Zvaakataura

Hama dzakakukurudzirai sei pamakasangana nemiedzo iyi?

Imwe hama yakandibatsira kuti ndifunge zvinotaurwa pana Pisarema 139:1. Yakati: “Jehovha anokuda zvakanyanya zvekuti anoziva zvese zvaunofunga, zvaunonzwa mumwoyo mako, zvaunotaura uye zvaunoita. . . . Mambo Dhavhidhi aiziva kuti Jehovha anoda chaizvo mumwe nemumwe wedu. . . . Anonyatsoziva zvinhu zvakaitika muupenyu hwedu zvinoita kuti tive zvatiri. Hatimbofaniri kufunga kuti tiri tega.” Mashoko aya akandibaya mwoyo. Zuva nezuva ndinonyatsonzwa kuti Jehovha ari padivi pangu.

Anastasiya Prianikova

Akaberekwa: 1987 (Karpinsk, Sverdlovsk Region)

Upenyu Hwake: Iye nehanzvadzi yake vakarerwa naamai vavo. Anofarira kuimba nekusona

Akafarira chaizvo vimbiso yeBhaibheri yekuti kuchava neramangwana rakanaka rine rugare. Akaona kuti Bhaibheri rinobatsira uye mazano aro ndeeuchenjeri. Akabhabhatidzwa muna 2002. Akachata naAleksandr muna 2011

Zvaakataura

Ushamwari hwenyu naJehovha hwawedzera sei kusimba panguva ino yamuri kusangana nemiedzo?

Kutenda kwangu kwawedzera chaizvo kusimba mumakore ese anoda kusvika matatu andanga ndichipomerwa mhosva. Ndava kunyatsovimba naJehovha. Ndinonyatsoziva kuti zvinhu zvese zviri mumaoko aJehovha. Dzimwe nguva pazvinoita sekuti hapasisina pekubuda napo, Jehovha anovhura nzira yekubuda nayo. Ndakaonawo kuti pandinowedzera kutambudzwa ndipo pandinonzwa ndichida kuwedzera basa randinoitira Jehovha.

Kunyange zvazvo hama nehanzvadzi dzedu dzekuRussia dziri kuramba dzichitambudzwa, zvinosimbisa kutenda kuona kuti Jehovha anovada uye ari kuvatsigira. Kutenda kwavo kwakaedzwa kuri kuita kuti pazita raJehovha “pave nekurumbidzwa nekubwinya nekukudzwa.”—1 Petro 1:7.

NHAU DZAKABUDISWA