4 JANUARY 2022
RUSSIA

Kugadzirira Uye Kuva Netariro Zviri Kubatsira Hama Pyotr Krupnov Nemudzimai Wavo

PLAY

Zvinhu Zvakaitika

30 December 2021

Dare reNikolskiy District Court riri munharaunda yePenza rakati hama Pyotr Krupnov nemudzimai wavo Maya, vane mhosva, richibva ravatongera makore matatu mujeri asi mutongo wacho wakabva wasendekwa padivi. Havasi kufanira havo kuenda kujeri pari zvino
25 October 2021

Nyaya yacho yakapinda mudare
12 October 2021

Mazita ahama nahanzvadzi Krupnov akanyorwa pamazita evanhu vanopandukira hurumende nekuti vaikurukura nyaya dzechitendero neshamwari dzavo
15 September 2021

Maya akapomerwa mhosva. Nekufamba kwenguva Pyotr akapomerwawo
11 October 2020

Mapurisa akasecha dzimba 4 dzeZvapupu zvaJehovha kuNikolsk, kusanganisira imba yahama nahanzvadzi Krupnov

Nhoroondo Yeupenyu

Pyotr Krupnov

Akaberekwa: 1963

Upenyu Hwake: Anoita basa replumbing. Akatanga kudzidza Bhaibheri neZvapupu zvaJehovha muna 1996. Kuverenga mabhuku edu uye kuona mararamiro emunhu aimudzidzisa Bhaibheri kwakaita kuti abvume kuti akanga awana chokwadi. Akabhabhatidzwa muna 2002

Vakaonana naMaya pamusangano weungano. Vakaroorana muna 2008

Zvaakataura

Pane here zvakamboitika kwamuri zvakakuratidzai kuti Jehovha akakubatsirai?

Ndichiri kuyeuka pandakambonyengetera kuti ndipiwe mweya mutsvene, ndichibva ndayeuka mashoko ari pana Johani 10:28 anoti: “Hapana achaabvuta muruoko rwangu.” Mashoko iwayo akaita kuti ndisatya uye ndifare. Ndainyatsonzwa kuti baba vangu Jehovha vakamira neni kurudyi rwangu. Izvi zvakaita kuti ndidzikame uye ndisatya.

Chii chiri kukubatsirai kutsungirira?

Ndinoramba ndichizviyeuchidza kuti pasinei nekuti miedzo yedu yakakura sei, hapana zviripo kana tichiienzanisa neropafadzo yekushumira Jehovha uye upenyu husingaperi hwatichawana muParadhiso. Kuda kwandinoita Jehovha uye vandinonamata navo kuri kundibatsira kutsungirira miedzo yandiri kusangana nayo.

Maya Krupnova

Akaberekwa: 1957 (Atasu, Kazakhstan)

Upenyu Hwake: Aiita basa rekubika. Iye zvino ava pamudyandigere uye anofarira zvekurima

Mwanasikana wake ndiye akatanga kumuudza nezveZvapupu zvaJehovha. Vese vakabhabhatidzwa muna 2001

Zvaakataura

Zvii zvamakaita kuti mugadzirire miedzo yamuri kusangana nayo?

Ndakatanga kugadzirira pandakanzwa nezvekusungwa kwaiitwa hama nehanzvadzi mune rimwe guta riri pedyo nesu. Ndakaverenga bhuku raEsteri naJeremiya. . . . Ndaigara ndichiverenga nhau dzepajw.org dzezviri kuitika kuhama dzedu uye ndakadzidzira nziyo kuti ndidzibate nemusoro. Ndakarongedza bhegi rinogara riine zvinhu zvekuzoshandisa kana pakaita njodzi uye bhegi rine zvekushandisa kana ndikaendeswa kujeri. . . . Ndakanyengetera kuna Jehovha kuti ndiwane uchenjeri uye ushingi kuitira kuti nditsungirire uye ndirambe ndakadzikama kana ndikatambudzwa.

Hama nehanzvadzi dziri kukubatsirai sei?

Munhu wese ari kundikurudzira chaizvo, kunyanya paya pandinonzwa ndaora mwoyo. Pane imwe nguva, hama nehanzvadzi dzakandifonera uye dzakanditumira mameseji dzichindiudza kuti dzinondida. . . . Ndaizviziva kuti ndine mhuri yakakura ine rudo. Asi kubvira muna 2020, ndava kunyatsonzwisisa zvazvinoreva.

Tinokurudzirwa chaizvo nemuenzaniso wahama nahanzvadzi Krupnov sezvavari kuramba vaine tariro yakasimba uye vachivimba naJehovha.—VaHebheru 6:19.

NHAU DZAKABUDISWA