24 AUGUST 2022 | NYAYA IYI PAYAVA:16 AUGUST 2023
RUSSIA

NYAYA IYI PAYAVA—HAMA DZEDU DZAKASUNUNGURWA | Kufungawo Vamwe Kuri Kubatsira Hama Kuti Dzitsungirire Kugara Mujeri

PLAY

Musi wa15 August 2023, dare reCity Court of the Kemerovo Region rakati Hama Maksim Morozov naYuriy Usanov vane mhosva richibva ravapa mutongo wekugara mujeri kwemakore matatu. Asi nemhaka yenguva yavakagara mujeri vachimirira kuti nyaya yavo itongwe, havachafaniri kuramba vakavharirwa mujeri. Vakabva vatosunungurwa.

Zvinhu Zvakaitika

1 April 2021

Hama Yuriy vakapomerwa mhosva yekuronga misangano yechitendero chakabhanwa
2 April 2021

Mapurisa akaita maawa matatu achisecha imba yaYuriy. Akabva asungwa akanovharirwa achimirira kuti nyaya yacho ipinde mudare
4 August 2021

Hama Maksim vakapomerwa mhosva
6 August 2021

Hama Maksim vakasungwa uye vakaita usiku hwese vari muchitokisi
7 August 2021

Hama Maksim vakanzi vakanga vapara mhosva uye vakavharirwa vachimirira kuti nyaya yacho ipinde mudare
16 May 2022

Nyaya yakatanga kupinda mudare

Nhoroondo Yeupenyu

Maksim Morozov

Akaberekwa:1983 (Volgograd, Volgograd Region)

Upenyu Hwake: Aiva muchiuto. Akazoita basa rekudhiraivha marori

Akatanga kudzidza Bhaibheri neZvapupu zvaJehovha paakabuda muchiuto. Akabhabhatidzwa muna 2009

Zvaakataura

Chii chiri kukubatsirai kuti murambe muchifara kunyange zvazvo makavharirwa?

Ndine Bhaibheri uye ndinoriverenga mazuva ese. Ndinofarira chaizvo kuverenga tsamba dzemuapostora Pauro uye matsananguriro aanoita nyaya yekuvharirwa mujeri kana kuti kusungwa necheni kana nezvisungo zvematanda. Haana kuisa pfungwa pakusungwa kwake asi akadziisa pabasa raakapiwa naJehovha.

Chimwe chiri kundibatsira kuti ndirambe ndichifara kuziva kuti handisi ndega. Ndina Jehovha, Jesu, ngirozi dzakawanda uye sangano rese rehama. Imwe vhidhiyo yaKuda naSaru inoratidza kuti ngirozi dzakafara zvikuru vana pavakaita zvisarudzo zvakanaka kuchikoro. Izvozvo zvinondiyeuchidza kuti ndinofanira kuona nhamo imwe neimwe yandinosangana nayo semukana wekuratidza kuti ndakavimbika kuna Mwari. Izvi zvinondibatsira kuti ndisanyanya kungofunga nezvematambudziko andiri kusangana nawo, asi kuti ndifunge nezvekuti zvandinoita zvinoita kuti Jehovha, Jesu, nengirozi vanzwe sei.

Yuriy Usanov

Akaberekwa: 1991 (Gorno-Chuisky, Irkutsk Region)

Upenyu Hwake: Aiita zvemagetsi uye zvekuweredha. Iye naamai vake vakadzidza Bhaibheri achiri mudiki. Akabhabhatidzwa muna 2007

Akachata naIrina muna 2021

Zvakataurwa Irina, a mudzimai waYuriy

Yuriy ari kukukurudzirai sei kunyange zvazvo ari mujeri?

Kusvika pari zvino, hatisati tabvumidzwa kunomushanyira, kunyange kutaura naye pafoni. Chatinongokwanisa kuita kunyorerana tsamba uye dzimwe nguva, tsamba dzacho dzinononoka kusvika. Kuita zvekunyorerana tsamba kwakasiyana nekuonana, asi tinotenda kuti tiri kukwanisa kutaura tese tichishandisa tsamba.

Ndinosuwa chaizvo kutaura naye tichionana uye kuverenga Bhaibheri pamwe chete sezvataiita. Asi mutsamba dzakawanda dzaakandinyorera, Yuriy anondiudza nezvemavhesi ari kumukurudzira. Dzimwe nguva, anondiudzawo mashoko anokurudzira aakafarira ari mune dzimwe tsamba dzaakanyorerwa nevamwe. Tsamba idzodzo dzatinonyorerana dzakatoita sekunamata kwemhuri. Anogarawo achindiyeuchidza nezvekudiwa kwatinoitwa naJehovha uye makomborero aachatipa mune ramangwana. Yuriy anondiudzawo kuti anondida uye kuti anokoshesa zvese zvandiri kuita. Zvinhu izvi zvingaita sezvinhu zvidiki, asi zvinondikurudza chaizvo.

Tinoziva kuti Jehovha anokoshesa chaizvo hama nehanzvadzi idzi dzinofunga zvakanakirawo vamwe. Tine chokwadi chekuti Jehovha acharamba achivakomborera iye zvino uye achatowedzera kuvakomborera mune ramangwana.—VaHebheru 11:26.

a Pakanyorwa nyaya ino, hama Usanov vakanga vakavharirwa vachimirira kuti nyaya yavo itongwe saka hatina kukwanisa kutaura navo.

NHAU DZAKABUDISWA