Musi wa19 September 2022, dare reGukovo City Court of the Rostov Region rakati hama Aleksey Dyadkin, Aleksey Goreliy, Nikita Moiseyev, Vladimir Popov, Yevgeniy Razumov, naOleg Shidlovskiy vane mhosva. Hama Goreliy nahama Shidlovskiy vakatongerwa kugara mujeri kwemakore 6 nehafu. Hama Dyadkin, Moiseyev, Popov, nahama Razumov vakatongerwa kugara mujeri kwemakore 7. Vachabva vatotanga kupika mutongo wacho.

1. 8 August 2020

   Mapurisa epachivande eFSB akasecha dzimba 17 dzeZvapupu zvaJehovha mumaguta matatu emuRostov Region uye muguta reKursk. Hama Goreliy, Moiseyev, Razumov, naShidlovskiy vakasungwa uye mangwana acho vakaendeswa kujeri rinochengeterwa vanhu vakamirira kutongwa. Hama Popov vakaiswa pandandanda yevanhu vanenge vachitsvagwa nemapurisa nenyaya yekupara mhosva

2. 12 August 2020

   Mapurisa epachivande eFSB akasunga hama Popov. Vakazoendeswa kujeri rinochengeterwa vanhu vakamirira kutongwa papera mazuva maviri

3. 21 August 2020

   Pashure pekunge vaenda kunobvunzurudzwa, hama Dyadkin vakaendeswa kujeri rinochengeterwa vanhu vakamirira kutongwa

4. 28 June 2021

   Gweta rakashanyira hama 6 idzi mujeri rinochengeterwa vanhu vakamirira kutongwa. Vakamuudza zvinhu zvakaoma zvavaisangana nazvo imomo, kusanganisira kupisa kwamaiita zvekusvika ku40 degrees Celsius, chakuvhuvhu kumadziro uye kubatira kwaiita vasungwa chirwere cheCOVID-19

5. 21 July 2021

   Hama Popov vainetseka nekufema saka vakaendeswa kuchipatara cherimwe jeri rinochengeterwa vanhu vakamirira kutongwa. Vakazoendeswa kuchipatara chisiri chepajeri

6. 30 September 2021

   Pashure pekunge vaita mwedzi miviri vari muchipatara, hama Popov vakazodzorerwa kujeri rinochengeterwa vanhu vakamirira kutongwa

7. 17 November 2021

   Nyaya yacho yakatanga kutongwa uye hama dzacho dziri 6 dzakanzi dzidzokere mujeri rinochengeterwa vanhu vakamirira kutongwa

Tinoramba tichinyengeterera hama idzi nemhuri dzavo. Tine chokwadi chekuti Jehovha achavabatsira kuti varambe vaine kutenda uye vaine simba.—VaRoma 15:30.