4 NOVEMBER 2022
RUSSIA

NYAYA IYI PAYAVA—MHURI YEKWASEMENOV YAKANZI INE MHOSVA | Vari Kusimbiswa Nemienzaniso Yevamwe Vanotaurwa muBhaibheri Vaiva Nekutenda

PLAY

Musi wa8 November 2022, Dare rePetropavlovsk-Kamchatskiy City Court remunharaunda yeKamchatka rakati hama nahanzvadzi Semenov vane mhosva. Vese vari vaviri vakatongerwa kugara mujeri kwemakore 4, asi mitongo yacho yakambosendekwa padivi. Havasati vava kufanira kuenda kujeri pari zvino.

Zvinhu Zvakaitika

3 September 2021

Mumwe mukadzi aidzidza Bhaibheri naDmitriy naNadezhda akatanga kupa mapurisa eFSB mashoko nezveZvapupu. Mapurisa akashandisa mashoko iwayo kupomera Dmitriy naNadezhda mhosva. Vakapomerwa mhosva yekuedza kuita kuti vamwe vabatane nesangano rinonzi rinopandukira hurumende
6 September 2021

Imba yavo yakasechwa. Vakatorwa kuti vanobvunzurudzwa uye vakabva varambidzwa kuita nzendo
26 July 2022

Nyaya yavo yakatanga kupinda mudare

Nhoroondo Yeupenyu

Dmitriy Semenov

Akaberekwa : 1984 (Petropavlovsk-Kamchatskiy)

Upenyu Hwake: Akadzidzira masvomhu uye zvemakombiyuta. Anoita basa recomputer programming

Imwe hama yavo ndiyo yakamuudza nezveZvapupu zvaJehovha. Akabhabhatidzwa muna 2006. Akaramba kupinda muchiuto achibva apiwa rimwe basa rekuita

Akachata naNadezhda muna 2010

Zvaakataura

Ndiani munhu wemuBhaibheri akakubatsirai kuti muwedzere kuvimba naJehovha?

Tisati tatombotanga kutambudzwa, ndaigara ndichifungisisa nezvaJeremiya uyo akakandwa mujeri, Jerusarema parakanga rakombwa nevaBhabhironi. Zvaiita sekuti pakanga pasisina tariro yekuti aizopona, asi Jehovha akamudzivirira nenzira inoshamisa. Vanhu vemuJerusarema pavakatanga kushaya zvekudya, Jeremiya akaramba achipiwa zvekudya uye akapona pakaparadzwa guta racho. (Jeremiya 37:21) Maonero anoita Jehovha zvinhu akasiyana needu uye anoziva zvichaitika mune ramangwana. Kunyange kana zvikaita sekuti hapana pekubuda napo, Jehovha haamboshayi nzira yekubatsira nayo vanhu vake panguva yakakodzera.

Nadezhda Semenova

Akaberekwa: 1985 (Yekaterinburg, Sverdlovsk Region)

Upenyu Hwake: Paaiva mudiki, afarira kuimba mukwaya yekuchikoro uyewo kutamba. Anoshanda mune chimwe chitoro

Akatanga kunzwa nezvechokwadi kubva kuna sisi vake avo vakanga vatanga kudzidza neZvapupu. Nadezhda, amai vake, nasisi vake vakabva vava Zvapupu zvaJehovha. Akabhabhatidzwa muna 1997

Akachata naDmitriy muna 2010

Zvaakataura

Inyaya ipi yemuBhaibheri yakakubatsirai kuti muwedzere kusimbisa kutenda kwenyu?

Munguva pfupi ichangopfuura, takadzidza nezvechirikadzi yekuZarefati uye zvayakaita kuti iratidze kuti yaiva nekutenda isati yawana makomborero. Nharireyomurindi yacho yatakadzidza yakati: “Mwari anokomborera vaya vanotenda maari.” Yaivawo nemashoko aiva muZion’s Watch Tower ya1898 iyo yakati: “Ndozvazvakaitawo nesu, murwendo rwedu rwoupenyu tinosvika pokuti Tenzi anotiedza kuti aone kuti kutenda kwedu kwakadii. Kana tikaratidza kutenda tichakomborerwa; asi tikasadaro, hatikomborerwi.”

Izvi zvakandibatsira kuona kuti pasinei nekuti ndasangana nedambudziko rakaoma sei, zvakakosha kuti ndirambe ndakavimbika kuna Jehovha uye kuhama nehanzvadzi dzangu. Ndikadaro, Jehovha achandibatsira kuti nditsungirire nekundipa ushingi, kutenda uye simba.

Sezviri kuitika kuna Dmitriy naNadezhda, Jehovha anobatsira vashumiri vake kuti vave neushingi uye kuti varambe vaine kutenda kwakasimba pavanotambudzwa. Haambovasiyi.—Joshua 1:9.

NHAU DZAKABUDISWA