7 JUNE 2022 | NYAYA IYI PAYAVA: 3 APRIL 2023
RUSSIA

NYAYA IYI PAYAVA—VAKATONGERWA KUGARA MUJERI | Kuvimba naJehovha Kuri Kubatsira Hama Kuti Dzitsungirire

PLAY

Musi wa31 March 2023, dare reBabushkinskiy District Court of Moscow rakati Hama Ivan Chaykovskiy, Yuriy Chernyshev, Vitaliy Komarov, Sergey Shatalov, naVardan Zakaryan vane mhosva. Hama Ivan, Yuriy, Vitaliy, naSergey vakatongerwa kugara mujeri kwemakore 6 nemwedzi mitatu. Hama Vardan vakatongerwa kugara mujeri kwemakore 4 nemwedzi mitatu. Vakabva vatonovharirwa mujeri.

Zvinhu Zvakaitika

24 November 2020

Mapurisa emuRussia akapinda nechisimba mudzimba dzinosvika 20 dzeZvapupu zvaJehovha muMoscow. Vakatora Ivan, Yuriy, Vitaliy, naSergey vakanovavharira, mumwe nemumwe akaiswa make ega. Paivaisecha nekubvunzurudza Yuriy nemhuri yake, paiva nevanhu vaitora vhidhiyo rezvaiitika. Vhidhiyo yacho yakazobudiswa munhau dzepaTV
26 November 2020

Sergey akabudiswa mujeri asi akanzi asabva pamba. Vardan, uyo akakuvara mapurisa paaisecha, akaendeswa mujeri kwaakanovharirwa kwake ega achimirira kuzotongwa
27 November 2020

Dare rakabudisa Ivan, Yuriy, naVitaliy mujeri asi vakanzi vasabva pamba
30 November 2020

Mapurisa akabudisa Vardan mujeri asi akanzi asabva pamba. Vardan akaendesa nyaya kuhofisi yemuchuchisi achinyunyuta nezvekurohwa zvisiri pamutemo kwaakanga aitwa
16 February 2022

Nyaya yacho inotanga kutongwa mudare

Nhoroondo Yeupenyu

Vitaliy Komarov

Akaberekwa: 1976 (Moscow)

Upenyu Hwake: Aiva mumwe wevakuru vakuru vepanhepfenyuro yeTV neredhiyo iri muMoscow inonzi Russian Television and Radio Broadcasting Network. Anofarira zvekuchengeta nyuchi

Akachata naYelena muna 1999. Kuzadziswa kweuprofita huri muBhaibheri kwakaita kuti abvume kuti Bhaibheri nderechokwadi. Akabhabhatidzwa muna 2003

Zvaakataura

Zvidzidzo zvipi zvamawana kubva pamiedzo iyi yamuri kusangana nayo?

Nguva pfupi ndisati ndasungwa, ndakadzokorora kuona vhidhiyo inonzi Young People Ask—What Will I Do With My Life? Ndakanyanya kunakidzwa nezvakataurwa nehama iya yechikuru. Yakati payaiva mumusasa wevasungwa yakadzidza kuti munhu haadi zvinhu zvakawanda kuti ararame. Yaingoda ndiro nesipunu chete kuti idye irarame. Ndakanyatsoona kuti izvozvo ndezvechokwadi pazuva rechipiri ndavharirwa. Ndakaswera ndiri mudare uye ndakatozodzoka kwandainge ndakavhariwa na9:00 dzemanheru, nguva yekudya yatopfuura. Mumwe wandainge ndakavharirwa naye akandipa kapu yake kuti ndikumbire magadhi mvura inopisa yekubikisa tii. Ndakabva ndangoyeuka zvandakanga ndaona muvhidhiyo. Panguva iyoyo, chainyanya kukosha ikapu yetii, kwete mota kana foni, zvinhu zvandaimbofunga kuti handikwanisi kurarama ndisina.

Sergey Shatalov

Akaberekwa: 1969 (Stavropol, Stavropol Territory)

Upenyu Hwake: Paaiyaruka, aifarira kutamba chess, table tennis, nevolleyball. Akambopinda muchiuto uye ari imomo, akakuvara achibva aremara. Anoita basa rekutakura tsamba nezvimwewo zvinhu achizviendesa kunzvimbo dzakasiyana-siyana

Iye nemudzimai wake Yelena vakachata muna 1995 uye vakabhabhatidzwawo gore iroro rava kunopera

Zvaakataura

Chii chinoita kuti muve nechivimbo chekuti Jehovha achakubatsirai kutsungirira miedzo iyi?

Ndine chivimbo chakazara chekuti Jehovha Mwari ari kunzwa hama nehanzvadzi dziri pasi rese padziri kundinyengeterera. Ndinodaro nekuti ndizvo zvinotaurwa neBhaibheri uye ndiri kunzwa ndiine mufaro nerugare mumwoyo mangu.

Chii chamakanyengeterera, uye izvozvo zvakakubatsirai sei?

Ndinogara ndichinyengetera kuna Mwari ndichikumbira kuti andipe ushingi sehweshumba. Izvozvo zvinoita kuti ndisatya munhu kana zvimwe zvinhu zvakaipa zvingaitika kwandiri. Ndinonyengetererawo hama dzangu dziri mumajeri nemhuri dzavo uyewo vaya vasiri mumajeri asi vari kusangana nezvinhu zvakaoma zvinogona kuita kuti vashushikane mupfungwa.

Tinokurudzirwa patinoona kuti Jehovha ari kuramba achiswedera pedyo nehama dzedu nemhuri dzavo nemhaka yekuti vari kuramba vachiswedera pedyo naye.—Jakobho 4:8.

NHAU DZAKABUDISWA