7 JULY 2022
RUSSIA

Yevgeniy Zinich Anoramba Akavimbika Sezvakaitwa Nevabereki Vake Uye Nambuya Nasekuru Vake

PLAY

Musi wa27 June 2022, dare reOktyabrskiy District Court of Krasnoyarsk rakatongera hama Yevgeniy Zinich makore 6 ekugara mujeri. Yevgeniy akabva atoendeswa kujeri.

Zvinhu Zvakaitika

11 December 2020

Imba yaYevgeniy yakasechwa
21 January 2021

Yevgeniy anopomerwa mhosva
19 October 2021

Anonzi ane mhosva yekuronga mabasa esangano rinopandukira hurumende
20 October 2021

Anorambidzwa kuita nzendo
14 December 2021

Nyaya yake inopinda mudare

Nhoroondo Yeupenyu

Yevgeniy Zinich

Akaberekwa: 1966 (Nazarovo, Krasnoyarsk Territory)

Upenyu Hwake: Vabereki vake uye mbuya nasekuru vake vakatambudzwa nemhaka yezvavaitenda panguva yeSoviet Union

Akabhabhatidzwa semumwe weZvapupu zvaJehovha muna 1982. Akachata naMariya muna 1988, uye vane mwana musikana. Mariya akashaya Yevgeniy asati apiwa mutongo

Zvaakataura

Vabereki venyu, vemudzimai wenyu uyewo mbuya nasekuru venyu vakatambudzirwa zvavaitenda. Mienzaniso yavo yakakubatsira sei?

Kare ikako, Zvapupu zvaigara zvichitambudzwa. Ndakadzidza zvakawanda pane zvavaiita pavaitambudzwa. Vaisambotsamwa kana kuchengetera chigumbu vanhu vaivatambudza. Vaiziva kuti sevaKristu vechokwadi, vaifanira kutarisira kutambudzwa. Pandinofunga nezvevabereki vangu, ndinoona kuti kutenda kwavo kwaibva pakuti vainyatsonzwisisa chokwadi uye vaiva neushamwari hwepedyo naMwari. Ndinoyeuka kuti ndichiri mudiki ndaiona baba vangu vakapfugama vachinyengetera.

Ndizvo zvaiitwawo nevabereki vemudzimai wangu, Mariya. Vairarama maererano nechokwadi chiri muBhaibheri. Vakabatsira Mariya kuti ave nekutenda kwakasimba, agare achiverenga uye kudzidza Bhaibheri, uye kuti ave nehanya nehama nehanzvadzi muungano. Kunyange paairwara uye achirapwa akaramba aine chido chekubatsira vamwe kuti vave nekutenda kwakasimba. Aigara achindiyeuchidza nezvevanhu vaida kukurudzirwa.

Chii chiri kukubatsirai kutsungirira mamiriro ezvinhu aya akaoma?

Chido changu chekuramba ndichishandiswa naJehovha uye ndichibatsira hama nehanzvadzi dzangu ndicho chiri kundibatsira. Ndakaedza kubatsira hama dziri mumajeri dzandaikwanisa. Zvaifadza kuona Jehovha achindishandisa kubatsira hama idzodzo, uye zvakaitawo kuti ndinzwe kuti ndine zvandinogona kuitira vamwe. Zvakandidzidzisawo kuti Jehovha anobatsira sei mumwe nemumwe wedu.

Mutsa uye rupo zvandakaratidzwa nehama nehanzvadzi zvakaita kuti ndinyatsoona kuti Jehovha anondida uye anondifarira. Ndinokoshesa chaizvo zvandakaitirwa nehama nehanzvadzi dzangu kunyanya mumwedzi yapfuura sezvo ndiri kurwadziwa chaizvo nekurasikirwa kwandakaitwa nemudzimai wangu, Mariya.

Tine chokwadi chekuti Jehovha acharamba achida uye achinyaradza Yevgeniy paari kuedza kutevedzera ushingi uye kutsungirira zvakaratidzwa nevemumhuri make panguva dzakaoma.—Pisarema 86:17.

NHAU DZAKABUDISWA