Bhaibheri Rine Mashoko Angandinyaradza Here?
Mhinduro yeBhaibheri
Ehe. (VaRoma 15:4) Ona mienzaniso yemavhesi emuBhaibheri akanyaradza vakawanda vari kusangana nematambudziko uye vari kushushikana.
Zviri munyaya ino
Kutambura
Pisarema 23:4: “Kunyange ndichifamba mumupata werima gobvu, hapana chandinotya, nekuti imi muneni.”
Zvazvinoreva: Kana ukanyengetera kuna Mwari uye ukabvuma kutungamirirwa neshoko rake Bhaibheri, uchava neushingi paunosangana nematambudziko.
VaFiripi 4:13: “Ndine simba rekuita zvinhu zvese nekuti pane anondipa simba.”
Zvazvinoreva: Mwari anogona kukupa simba rekuti ukunde chero dambudziko ripi zvaro.
Kufirwa nemunhu waunoda
Muparidzi 9:10: ‘KuGuva hakuna basa rinoitwa kana kuronga zvekuita kana ruzivo kana uchenjeri.’
Zvazvinoreva: Vakafa havasi kutambura uye havakwanisi kutikuvadza. Havana kana chavanoziva.
Mabasa 24:15: “Kuchava nekumuka.”
Zvazvinoreva: Mwari anogona kuita kuti hama neshamwari dzedu dzakafa dzirarame zvakare.
Kunyanya kuzvipa mhosva
Pisarema 86:5: “Nekuti makanaka uye makagadzirira kukanganwira, haiwa Jehovha; a rudo rwenyu rusingachinji kune vese vanodana kwamuri rwakakura.”
Zvazvinoreva: Mwari anoregerera vaya vanonyatsopfidza zvepachokwadi pazvikanganiso zvavakaita uye vakatsunga kusazvidzokorora zvakare.
Pisarema 103:12: “Sekuva kure kwakaita kumabvazuva kubva kumavirira, saizvozvowo akaisa zvitadzo zvedu kure nesu.”
Zvazvinoreva: Mwari paanotiregerera, anobva aisa zvivi zvedu kure kwatisingambokwanisi kufungidzira. Haarambi achingotiyeuchidza nezvazvo kuti atipomere mhosva kana kutiranga.
Kusuruvara
Pisarema 31:7: “Makaona kutambudzika kwangu; munoziva zvinondinetsa mumwoyo mangu.”
Zvazvinoreva: Mwari anonyatsoziva matambudziko ese auri kusangana nawo. Anonyatsonzwisisa manzwiro ako kunyange kana vamwe vanhu vakasakunzwisisa.
Pisarema 34:18: “Jehovha ari pedyo nevaya vakaora mwoyo; anoponesa vaya vakasuruvara.”
Zvazvinoreva: Mwari anovimbisa kukutsigira paunenge wakasuruvara. Anogona kukupa simba rekutsungirira marwadzo ako.
Urwere
Pisarema 41:3: “Jehovha achamutsigira paanenge achirwara ari pamubhedha wake.”
Zvazvinoreva: Mwari anogona kukubatsira paunenge uchirwara zvakanyanya. Achaita kuti ugadzikane mupfungwa, uve nesimba, utsungirire uye uve neuchenjeri hwekuita zvisarudzo zvakanaka.
Isaya 33:24: “Hakuna mugari wemo achati: ‘Ndiri kurwara.’”
Zvazvinoreva: Mwari anovimbisa kuti kuchava nenguva yekuti vanhu vese vanenge vava neutano hwakanaka.
Kuzvidya mwoyo
Pisarema 94:19: “Pandakawandirwa nezvaindidya mwoyo, makandinyaradza uye makandizorodza.”
Zvazvinoreva: Kana tikanyengetera kuna Mwari patinenge tichizvidya mwoyo, anogona kutibatsira kuti tirambe takadzikama.
1 Petro 5:7: ‘Kandai zvese zvinokudyai mwoyo paari, nekuti iye ane hanya nemi.’
Zvazvinoreva: Mwari ane hanya nekutambura kwedu. Anotikumbira kuti tinyengetere kwaari tichimuudza zvese zvinotinetsa.
Hondo
Pisarema 46:9: “Ari kugumisa hondo munyika yese.”
Zvazvinoreva: Pasina nguva, Umambo hwaMwari huchagumisa hondo dzese.
Pisarema 37:11, 29: “Vanyoro vachagara nhaka yenyika, uye vachafara zvikuru vaine rugare rwakawanda. . . . Vakarurama vachagara nhaka yenyika, uye vachagara mairi nekusingaperi.”
Zvazvinoreva: Vanhu vakanaka vachava nerugare panyika nekusingaperi.
Kunetseka nezveramangwana
Jeremiya 29:11: “‘Ndinonyatsoziva pfungwa dzandiri kukufungirai,’ ndizvo zvinotaurwa naJehovha, ‘pfungwa dzerugare, kwete dzedambudziko, kuti ndikupei ramangwana rakanaka netariro.’”
Zvazvinoreva: Mwari anoudza vanhu vake kuti vanogona kutarisira kuzova neramangwana rakanaka.
Zvakazarurwa 21:4: “Achapukuta misodzi yese pamaziso avo, uye hapazovi nerufu, kana kuchema kana kuridza mhere kana kurwadziwa. Zvinhu zvekutanga zvapfuura.”
Zvazvinoreva: Mwari anovimbisa kuti achagumisa zvinhu zvakaipa zvese zvauri kuona zvichiitika mazuva ano.
a Jehovha ndiro zita raMwari. (Pisarema 83:18) Ona nyaya inoti “Jehovha Ndiani?”
Zvimwe Zvaunogona Kufarira
NHARIREYOMURINDI
Kuziva Kuti Mwari Anokuda Kunogona Kukubatsira
Bhaibheri rinotibatsira kuti tive nekutenda mune zvinovimbiswa naMwari.
MIBVUNZO YEBHAIBHERI INOPINDURWA
Ndingawanepi Tariro?
Pane chinhu chinogona kuita kuti uvandudze upenyu hwako iye zvino uye wova netariro yeramangwana.
DZIMWE NYAYA
Kunyaradza Vakafirwa
Patinofirwa, tinogona kunzwa sekuti hapana munhu anonzwisisa marwadzo edu. Asi Mwari anotinzwisisa uye anogona kutibatsira.
NHARIREYOMURINDI
Paunonzwa Sekuti Hauchagoni Kutsungirira
Chiripo chekuraramira pasinei nematambudziko edu.
ESSENTIAL BIBLE TEACHINGS
Nei Mwari Achibvumira Kutambura?
Vanhu vakawanda vanobvunza kuti nei nyika yakazara kuvengana uye kutambura. Bhaibheri rinopa mhinduro inogutsa uye inonyaradza.
ZVINODZIDZISWA NEBHAIBHERI
Imboedza Kuita Kosi yeBhaibheri
Dzidza Bhaibheri uchibatsirwa nemumwe munhu.