Mashoko ekuti “muSamariya akanaka” anowanzoshandiswa kutsanangura mumwe munhu anoita zvinhu zvinobatsira vamwe vanenge vachitambura. Mashoko aya akabva panyaya yakataurwa naJesu achida kuratidza kuti muvakidzani akanaka anobatsira vamwe pasinei nekwavanobva kana rudzi rwavo.

Zviri munyaya ino

•  Nyaya “yemuSamariya akanaka” inotaura nezvei?

•  Nei Jesu akataura nyaya iyi?

•  Ndechipi chidzidzo chiri munyaya iyi?

•  VaSamariya vaiva vanaani?

•  Nyaya “yemuSamariya akanaka” yakatonyatsoitika here?

Nyaya yacho yakataurwa naJesu yakamira seizvi: Mumwe murume wechiJudha aibva kuJerusarema achienda kuJeriko. Ari munzira, akasangana nematsotsi akamubira, akamurova, akasiya amuita kafiramberi.

Mumwe mupristi wechiJudha nemumwe mutungamiriri wechitendero chechiJudha vakapfuura nepaiva nemurume uyu, asi havana kumubatsira kunyange zvazvo vaiva verudzi rumwe chete naye.

Pava paya, pakazopfuura mumwe murume muSamariya. (Ruka 10:33; 17:16-18) MuSamariya uyu akamunzwira tsitsi, achibva asunga maronda ake. Akabva amutora akaenda naye kuimba yevanenge vari parwendo. Akaita usiku hwese ainaye. Zuva rakatevera, akasiya apa muchengeti weimba yevanenge vari parwendo mari, achibva amuudza kuti asare achichengeta murume uyu. Akamuudzawo kuti kana akashandisa mari inopfuura yaakanga amupa, aizouya achimubhadhara.—Ruka 10:30-35.

Jesu akataura nyaya iyi kune mumwe murume aifunga kuti vanhu verudzi rwake nechitendero chake chete ndivo vavakidzani wake. Jesu aida kudzidzisa murume uyu chidzidzo chinokosha chekuti anzwisise kuti “muvakidzani” haasi muJudha chete, asiwo vamwe vanhu vasiri vaJudha. (Ruka 10:36, 37) Nyaya iyi yakanyorwa muBhaibheri kuti ibatsire munhu wese anoda kufadza Mwari.—2 Timoti 3:16, 17.

Nyaya iyi inodzidzisa kuti muvakidzani akanaka anonzwira vamwe tsitsi uye anozviratidza nezvaanoita. Anobatsira vanhu vanenge vachitambura pasinei nekwavanobva kana rudzi rwavo. Muvakidzani wechokwadi anoitira vamwe zvaanoda kuti vamuitirewo.—Mateu 7:12.

VaSamariya vaigara kuchamhembe kweJudhiya. Vaisanganisira vana vevaJudha vakanga vakaroorana nevamwe vanhu vasiri vaJudha.

Pakazosvika nguva yaJesu, vaSamariya vakanga vatova nechitendero chavo chakazvimiririra. Vaibvuma mabhuku mashanu ekutanga eMagwaro echiHebheru asi mamwe ese vaisaabvuma.

Mumazuva aJesu, vaJudha vakawanda vaitairisira pasi vaSamariya uye vaisatomboda kudyidzana navo. (Johani 4:9) Vamwe vaJudha vaishandisa shoko rekuti “muSamariya” seshoko rekutuka.—Johani 8:48.

Magwaro haatauri kuti nyaya yemuSamariya iyi yakanyatsoitika. Asi paaidzidzisa, Jesu aiwanzotaura nezvezvinhu kana kuti nzvimbo dzaizivikanwa nevanhu kuitira kuti vanyatsokwanisa kunzwisisa zvaaitaura.

Zvakawanda zviri munyaya iyi, zvinhu zvinotozivikanwa. Semuenzaniso:

• Kubva muJerusarema kuenda kuJeriko, pane makiromita 20 uye munhu paanenge achifamba munzira iyi, anenge achidzika materu. Nyaya iyi inonyatsotaura zvechokwadi kuti munhu paaifamba achienda kuJeriko “anenge achidzika achibva kuJerusarema.”—Ruka 10:30.

• Vapristi nevatungamiriri vechitendero chechiJudha vaigara muJeriko, vaigara vachifamba nenzira iyi vachienda kuJerusarema.

• Matsotsi aiwanzohwandira vanhu munzira iyi kuti avabire, kunyanya vaya vainge vachifamba vari vega.