ZVAKANGOITIKA ZVEGA HERE?
Madyiro Anoita Hove Inonzi Manta Ray
Kuti iwane zvekudya, hove inonzi manta ray inofamba yakashama muromo. Mvura yemugungwa, iyo inenge yakasangana nezvainodya inopinda mumuromo mayo yorovera pachinhu chakaita kunge sefa. Zvekudya zvacho zvinobva zvaendeswa pahuro pehove iyi, yobva yazvimedza. Mvura yacho inoramba ichipfuura nepachinhu chakaita kunge sefa, ichibudiswa nemainofema namo. Asi hove iyi inogona kusefa kunyange zvekudya zvidikidiki zvaigona kupfuura nepachinhu chacho chakaita kunge sefa chaiinacho. Mumwe murume anonyora nezvesainzi anonzi Ed Yong akati, “izvi zvinoita sezvinhu zvisingakwanisiki.”
Funga izvi: Chinhu chakaita sesefa chiri pahove inonzi manta ray chine zvakaita kunge zvimabhonzo 5 zvakabhenda. Zvimabhonzo zvacho zvine zvakaita kunge zvimazino zvekamu inokama nemativi maviri. Zvimwe zvimazino zvacho zvinenge zvakatarisa kumberi, zvimwe zvakatarisa kumashure. Zvimazino izvi zvinoita kuti imwe mvura iende nepamusoro pazvo, imwe ichienda nepasi pazvo, ichiita zvekutenderera.
Zvekudya pazvinorovera pazvimazino izvi zvinobva zvasimudzwa zvotakurwa nemvura inenge ichinyanya kumhanya zvopedzisira zvakandirwa pahuro pehove yacho, yobva yazvimedza. Kunyange zvekudya zvidikidiki izvo zvinogona kungopfuura nepakati pezvimazino zvacho, zvinoendeswa pahuro yehove yacho nekuti zvinotakurwa nemvura inenge ichitenderera. Izvi zvinoita kuti hove iyi idye kunyange zvekudya zvidiki zvaigona kungokukurwa nemvura zvichidzokera mugungwa.
Zvimaburi zviri pakati pezvimazino zvechinhu chakaita sesefa chehove inonzi manta ray hazvivharike uye zvimazino zvacho zvinozvichenesa zvega pasinei nekuti hove yacho inenge ichimhanya zvakadii kana kuti mvura yacho inenge iine zvekudya zvakawanda zvakadii.
Vaongorori vanotarisira kushandisa zvavanodzidza kubva pachinhu chakaita kunge sefa chehove inonzi manta ray kuti vakwanise kuchenesa mvura yakasviba uye kuti vabvise tumapurasitiki tudikidiki tusingakwanisi kuoneka nemaziso tunenge twuri mumvura.
Unofungei: Zvakangoitika zvega here kuti hove inonzi manta ray ive nechinhu chakaita kunge sefa chinosefa mvura, hove yacho yowana zvekudya?
Zvimwe Zvaunogona Kufarira
ZVAKANGOITIKA ZVEGA HERE?
Kunamira Kunoita Hove Inonzi Remora—Zvakangoitika Zvega Here?
Chii chinoita kuti hove iyi ikwanise kunamirira pane zvimwe zvisikwa zvemugungwa?
ZVAKANGOITIKA ZVEGA HERE?
Zvakaita Mazino Ehozhwa Inonzi Limpet
Chii chinoita kuti mazino elimpet asimbe kudaro kutopfuura shinda dzedandemutande?
ZVAKANGOITIKA ZVEGA HERE?
Ruoko Runoshamisa rweOctopus
Pavakaongorora ruoko rweoctopus, mainjiniya akabva agadzira ruoko rwerobhoti rwunokwanisa kuita zvakawanda.
ZVAKANGOITIKA ZVEGA HERE?
Pfungwa dzeTsindi Dzekunzvimbo Dzine Chando—Zvakangoitika Zvega Here?
Tarisa uone zvainoita kuti pfungwa dzayo dzirambe dzichishanda zvakanaka.
DZIDZISO DZEBHAIBHERI DZINOKOSHA
Denga Nenyika Zvakasikwa Here?
Vanhu vakawanda havanzwisisi zvinotaurwa neBhaibheri nezvekusikwa uye vanoti hazvisi zvechokwadi. Zvarinotaura ndezvechokwadi here?