Ntateyɛ má Ngɔndɔ k’esambele 2022, wamboyaka anto efula l’asase lá wopo wɔ nkamɔ l’andja w’otondo:

•   “Nyɔyi k’onto ɔmɔtshi w’ose pɔlitikɛ w’ewama efula lá Japon [ancien Premier ministre Shinzo Abe] ketshikitsheka owila edjinge kepeyeka andja w’otondo yenyi, ladjikɛnde l’owila wɔ Japon ovungusano wɔ wopo wɔsɔ wopananghemaka ntondo edjinge wangoyalake l’ɛlɛmbɛ wɛ wolo efula l’akambo walendana l’osombelo w’eta.”—Ngɔndɔ k’esambele 10, 2022, jurnalɛ The Japan Times.

•   “Ase owila wɔ Danemark w’okaka yɛnyi efula winá wɔ mpame kɛmɔtshi ndayake anto asato lá botikɛ mɔtshi dj’ekekete lá ngando kɛ Copenhague.”—Ngɔndɔ k’esambele 4, 2022, Agence Reuters.

•   “Lá Afrique du Sud: Mpame kɛmɔtshi ayakaka anto 15 lá edjena kɛ yɔnɔka wana lá Soweto.”—Ngɔndɔ k’esambele 10, 2022, jurnalɛ The Guardian.

•   “Anto ndekana 220 wavɔka lá États-Unis lá lofu 04 Ngɔndɔ k’esambele, lá winá wɔ fɛtɛ k’owila.”—Ngɔndɔ k’esambele 5, 2022, CBS News.

 Akambo wa lopango wa nghɔnɛ wangoshila etsho wɛkɔnge? Kɛkɔnge kɛ Bible otepelande?

 Bible ntepelaka ante owikasonde ‘l’etsho w’ekomo,’ winá w’anto onanghawɔ akambo la lonkonda, la lopango, edjinge wanangha akambo etengo anyama. (2 Timɔte 3:1, 3) Akambo wa lopango wa nghɔsɔ watshinda anto djɛ ndjala la wɔma. (Luka 21:11) Koko, Bible atolaka winá wɔ akambo wa lopango yongoshiya edjinge ante, ‘anto wami wangintasɛ l’edjena kɛ vu dj’efula, lá djena djɛ nyintasɛ djɛ lotoyi ntshitshi edjinge lá todjena tɔ mpomola tɔ vu.’ (Izaya 32:18) Wopo wɔkɔnge wayi wa lopango yongoshila?

 Ndjambe angoyaka anto wa nyɛtshi edjinge angotshita mpeko djɛwɔ nkfumɔ.

•   ‘Anto wa nyɛtshi wangima má looko.’—Woongo 2:22.

•   ‘[Ndjambe] amboshiyɛ ambandji tii t’ekomo kɛ looko. Ambɔkɔmɔla ota edjinge ambɔwɛngɛ nkɔnga; nde ambotshumba pusupusu y’angala l’iyɛ.’—Yeembo 46:9.

 Ndjambe angolakanyɛ anto dj’iwɔ nyintasɛ vu l’anto ankina, lá lɛdji lɔsɔ ndeke wayi wa lopango wapangoyala lonkina.

•   ‘Iwɔ wapangonanghelana kaanga nyɛtshi kana ntshita onkókó wɔmi w’ekina w’otondo, ladjikɛnde looko longolola nsɔsɔlɔ la balo djɛ Yehova etengo washi yololaka lá ndjale.’—Izaya 11:9.

•   Winá wɔsɔ, Ndjambe alakanyɛ anto wa l’andja w’otondo ante watshike akambo wa lopango edjinge watshule eta wɛwɔ ‘mpeko djɛ ntshima looko la akɔnga wawɔ tɔsɔlɔ tɔ nkɔlɔnga alɛmbɔlɛmbɔ.’—Mika 4:3.

 Djɛ ndjewa akambo efula lá nkambo djɛ alaka wa Bible watepela ante anto wangintasɛ lá looko la wapangoala la wɔma, wala djamba “Affranchis de la peur : est-ce possible?”

 Djɛ ndjewa akambo ankina efula lá kɛnɛ kɛ wayi wa lopango yongoshila, wala djamba “Enfin la paix sur la terre!”