Terɔrismɛ kengoshila lofu lɔmɔtshi?
M’ɔkɔngɔ wɔ ɔntɔmbɔki ɔmɔtshi nkonanyɛ, wɛ nkoka ndawopola ente: ‘Ndjambe angotilake yimba? Lamo wayi wanghɔnɛ otokomelawɔ? Terɔrismɛ a kengoshiya lofu lɔmɔtshi? Okokami nangha wopo wɔkɔnge la wɔma wolekɔ́ la lemi?’ Bible ntɔpɛyɛka nsakiso yetokitshɛ awale lá weepó enkfumɔ wɛsɔ.
Ndjambe oyawokande ngetemo lá nkambo djɛ terɔrismɛ?
Ndjambe ntonaka wayi wa lopango la terɔrismɛ. (Yeembo 11:5; Woongo 6:16, 17) Edjinge Yeso, kanga lolekɔ ɛnamelo kɛ Ndjambe apangolaka ambeki wande winá wɔ yananghe akambo lá yopo yɛ lopango. (Mateo 26:50-52) Kaanga anto amɔtshi opomelawɔ ikole ambɔ onanghawɔ wayi wa lopangonde má djiina djɛ Ndjambe, nde apawola nanghedji djɛwɔ. Lá nsɔsɔlɔ, nde apoke kaanga ndɔmbɔ yɛwɔ.—Izaya 1:15.
Ndjambe ndakiyanyɛka lá nkambo dj’anto onkfumɔ wɛna ndjolo, ndjila edjinge wanɛ wɛna ndjolo me antɔmbɔki. (Yeembo 31:7; 1 Pɛtɛlɔ 5:7) Bible nyɛnyɛka ante Ndjambe angokomɛ wayi wa lopango.—Izaya 60:18.
Ikɔkɔ y’ekekete yɛ terɔrismɛ
Bible nyɛnyɛka elonga kɛ nsɔsɔlɔ kɛ terɔrismɛ: ‘Onto ndɔndjɛka winande onto ngo djɛ ndɔɔwɛnyɛ ndjolo.’ (Losanghanyɛ 8:9) L’ɔkɔndɔ wɔ wana w’anto, anto walekɔ́ la lowandji wambokambaka la topo tɔ lopango djɛ nyɛnyɛ anto ankina ndjolo. Djɛ nsombɔla lá ndjolo yawɛnyɛwɔ, anto amɔtshi nkambaka la akambo wa terɔrismɛ djɛ ndaseela.—Losanghanyɛ 7:7.
Ekomo kɛ terɔrismɛ
Ndjambe ntolakaka ante angimɛ wɔma la wayi wa lopango edjinge angila vu lá looko. (Izaya 32:18; Mika 4:3, 4) Nde:
Angimɛ ikɔkɔ yɛ terɔrismɛ. Ndjambe angɔhɛnyɛ enkfumi wɛ wana w’anto l’Onkfumi wɔnde wɔngɔlɔndjɛ andja w’otondo. Nkfumi kɛ onkfumi wɔkɔ, Yeso Kristo, angɔsa anto ankfumɔ la ntshina edjinge angimɛ ndjolo la wayi wa lopango. (Yeembo 72:2, 14) Lá winá wɔkɔ, lako onto wongokalɔ nangha wayi terɔrismɛ. Anto ‘wangosasangaka lombombe la vu dj’efula.’—Yeembo 37:10, 11.
Angokomɛ eposelo enkfumɔ wɛ nyɛtshi weyɛ má terɔrismɛ. Ndjambe angɔkɔnɔla anto má eposelo enkfumɔ wɛ nyɛtshi weyɛ má terɔrismɛ, ayale kaanga ampota yelá alemba kana yelá tiimba. (Izaya 65:17; Ndjiso 21:3, 4) Nde alakaka kaanga djɛ nkfundola edjo, dj’iwɔ nkalɔ ndjala la lowiko lá looko longoyala vu.—Djɔanɛ 5:28, 29.
Bible atɔpɛyɛ ndonga djɛ wɔlɔ efula djɛ ndjawola ente Ndjambe anghonangha akambo wasɔ lako ilá. Koko, oyawopola kaanɛ ente, ‘Lamo Ndjambe ndopakomɛká wayi wa terɔrismɛ ilá kɛnɛ?’ Djɛ mba nsakiso, lenda video Lamo Ndjambe otshikande ndjolo nghɔnɛ? (Lá Otetela)
a “Terɔrismɛ” alekɔ okambelo kana nsɛsa djɛ nkamba la wayi wa lopango djɛ ndjokɛ anto wɔma la djɛ nkotshɛ okoma wɔ wayi wa pɔlitikɛ, wa ntolo edjinge w’anto ankfumɔ. Koko, anto nkoka nsamba ndjawola ambɔ enanghedji kɛmɔtshi ketshikitanyi nkoka ndɔsama etengo terɔrismɛ.
