Olekɔ l’anteyi kɛ miliyɔ y’anto yepomaná la ekakasano weyɛ má etshitanelo kɛ klima? Ekakasano weyɛka má klima yɛ nyɛtshi edjinge mbalaka yeposaka meteyi, ndjɛka má ndonga djetshikitanyi. Mpompo yɛ nkekete yetawɔ, typhons, cyclones, edjinge tornades ndjakalaka ekakasano wɛ nkekete efula, ndjɔmbɔmba, dola, amvula yɛ nkekete, kana mfunge yetshitaka nkete. Mvula k’ekekete nkoka ndjata looko, edjinge lompopo l’ekekete nkoka mposɛ iyɛ yetshitaka nkete. Osambo wɔ mvula, djangasa dj’efula, la mpopo yɛ nkekete lá eleko kɛ ntshitshi k’efula nkoka lonkina mposɛ mbalaka yɛ nkekete.

 Lá todjena efula telá looko, ekakasano weyɛka má etshitanelo k’efula kɛ klima wetaleke ngo ndeka edjinge wenanghema winá enkfumɔ. Rapport wimá Fédération internationale des Sociétés de la Croix-Rouge et du Croissant-Rouge nyɛnyɛka djɛ lofulo lɔ “efula k’anto wapomana la ekakasano weyɛka má nkete djetongamisá lotafule ngo mfula. Winá wɔ dola, mpopo yɛ nkekete edjinge djangasa yotafule, lowiko l’anto la l‘anyama ndjingelaka lá mbalaka. Djɛkondeke, ɔnɔyi l’ɔnɔnyi miliyɔ y’anto la y’anyama ntshikaka ndjena djɛwɔ ko nsɛkɔka tá djena nkina.”

 Winá wɔ akambo wasɔ onanghemawɔ, anto wangɛnake ndjolo ape ngo lá demba toko koko edjinge lá yimba. Iwɔ nkoka ntshutshɛ́ nkete djɛwɔ, amvulu yɛwɔ, la mvunsɛ boto djɛwɔ kana tolongo tɔwɔ.

 Ntsha ombopomana l’ekakasano weyɛ má etshitanelo kɛ klima, Bible nkoka nkokotshɛ́ djɛ nkfulumeyɛ. Bible ntɔpɛyɛka lokembo, nkongi edjinge alako wa wɔlɔ, wakotshɛ́ anto efula wambopomaná la ekakasano weyɛka má etshitanelo kɛ klima. (Ɔrɔma 15:4) Bible mpɛyɛka edjinge nsakiso yɛ djonyi efula lá weepó w’anto efula oyawopolakawɔ, ndjɔmbɔmba: Lamo Ndjambe otshikande akambo wa nghɔnɛ nanghema? Oyɛwɔ nde dilanyɛ djɛ Ndjambe?

 Bible ndakanyɛka ante Ndjambe apalekɔ ikɔkɔ yɛ ndjolo y’anto. Ketoshikikɛ ante: ‘Ndjambe apakoke mpembama l’akambo wa nyɛtshi edjinge nde apahembe kaanga onto.’ (Djakɔbɔ 1:13) Kɛsɔ nyɛnyɛka ente ape nde ndeke loposɛ ekakasano weyɛ má etshitanelo kɛ klima, w’ɛnyɛ anto ndjolo lɔɔko kɛnɛ.

 Bible alekɔ la wamba w’ɛnyɛ djɛ lá mbamba imɔtshi Ndjambe akambaka la nkete djɛ nkfulu djɛ ndatonge djɛ mpɛyɛ anto wa nyɛtshi dilanyɛ. Koko akambo wakɔ watshikitana la ekakasano weyɛ lɔɔko kɛnɛ má klima, weyɛka l’isasimoyɛ ipa landjewoyɛ anto edjinge wekomelaka anto ankfumɔ, ayale anto wa wɔlɔ kana wa pɔlɔ. Koko, wamba wa Bible nyɛnyɛka djɛ Ndjambe namaka winá enkfumɔ anto wapalekɔ la lowo, ndjewoyɛka anto lá ntondo kɛ nde nangha nkambo, edjinge nsakisolaka donga djonanghande nkambo djɛkɔ. Djɔmbɔmba, Ndjambe asipisoyɛka lamo ndayale la djɛ ntɔngɛ Mvula k’elola l’etsho wɛ Noe, ewoyɛka anto lá ntondo kɛ nangha nkambo djɛkɔ, edjinge awikɛka Noe nya nkfumbo kɛnde.—Ewangelo 6:13; 2 Pɛtɛlɔ 2:5.

 Djɛ ndjewa wopo wɔkɔnge ewaso ente mbalaka yeyɛ má nkete djetongamisá yepalekɔ dilanyɛ djɛ Ndjambe, lenda djamba djelekɔ l’ɔtɛ wɔ djoyi ante: “Les catastrophes naturelles : qu’en dit la Bible?”

 Bible nyɛnyɛka ante Yehova a Ndjambe ndakiyanyɛka lá nkambo dj’anto la ndawilaká l’edjena kɛwɔ. Lenda avɛrse wanɛ watɔpɛyɛka lokembo.

•   Izaya 63:9: ‘Lá ndjolo yɛwɔ inkfumɔ nde [Ndjambe] ɛnaki ndjolo.’ (nwt-Li)

   Kɛnɛ kɛ nkambo djɛsɔ osakisolawɔ: Yehova ndjokaka paa winá w’ɛnande anto w’ɛna ndjolo.

•   1 Pɛtɛlɔ 5:7: ‘Nde ndakiyanyɛka lá nkambo djɛnyo.’

   Kɛnɛ kɛ nkambo djɛsɔ osakisolawɔ: Yehova angoyakiyanyɛke lombombe ngo lá wɔlɔ wɔko.

 Yehova angotokotshɛ́ke ladjikɛnde nde ndakiyanyɛka lá nkambo djɛso la ndawilaka l’edjena kɛso. Nde ntokembɛka má lotshimbo lɔ alako wemá Bible la má daka djolakande ante, l’etsho ekakasano weyɛka má etshitanelo kɛ klima wepangoyala lonkina.—2 Kɔrɛtɔ 1:3, 4.

 Bible nyɛnyɛka djɛ Yehova ambolaká ante, ‘angɔtɔpɛyɛ etsho weyaye edjinge nkongi.’ (Jɛrɛmi 29:11) Nde nkombolaka djɛ anto nsasanga la lowiko lá paradiso kelá looko, lá anto yopangotoyala lonkina la wɔma w‘ekakasano weyɛ má etshitanelo kɛ klima.—Ewangelo 1:28; 2:15; Izaya 32:18.

 Ndjambe anghonangha nkambo djɛsɔ má lotshimbo l’Onkfumi wɔnde, wolekɔ́ lowandji lel’olongo lɔngɔlɔndjɛma me Yeso. (Mateo 6:10) Yeso alekɔ la balo edjinge la nkfulu kɛ nshimba mbalaka yeyɛ má etshitanelo a kɛ klima. Winá wɔ Yeso ndayalaka lanɛ lá looko, nde ɛnyɛka ante alekɔ la nkfulu kɛ nshimba mpopo kana ambalaka yeposaka má klima. (Marko 4:37-41) Nde angɔlɔndjɛ la balo edjinge yimba, angolakanyɛ anto wopo wɔ nama washi, ekonda, kana lohoyi dj’ipa ntshitana. (Izaya 11:2) Lá ɛlɔndjɛlɔ kɛ Yeso, klima kepangoyakala anto ambalaka lonkina.

 Okoka ndawopola ente: ‘Winá wɔkɔnge Yeso ndongokamba la wolo wɔnde djɛ nama klima?’ Djɛ mba nsakiso la woopó wɔsɔ, lenda djamba djelekɔ́ l’ɔtɛ wɔ djoyi ante: “Quand le royaume de Dieu dirigera-t-il la terre?”

 Alako wapɛyɛ Bible nkoka nkokotshɛ́ lá ntondo kɛ mbalaka yeyɛka má etshitanelo k’efula kɛ klima nanghema, winá w’onanghemawɔ la m’ɔkɔngɔ wɔ nanghema.

•   Lá ntondo kɛ mbalaka: Yalɔngɔsɔla djɛ ndɔsa akano lankeke lankeke.

   Kɛnɛ kɛ Bible otepelande: ‘Kanga okoso angɛnake mbalaka, ko nde angoyawisake, koko kanga enkesa angokindjɛke ngo ntshɔ, ko angopomanake la eposelo wɛ pɔlɔ.’—Woongo 22:3.

   Kɛnɛ kɛ nkambo djɛsɔ osakisolawɔ: Tangelaká mbalaka lá ntondo djɛ wɛ ndjewa ndota lankeke lankeke edjinge nama nkfumbo kɛko.

   Akambo wananghemisá: “Lofu lɔmɔtshi tohandaka má iyɛ yem’okonda, ladjikɛnde toyalɔngɔsɔlaka lá nkambo djɛkɔ. Tayalaki la ampata yɛso yɛ nkete djɛsalɔngɔsɔla lá nkambo dj’ambalaka. Tayalaki la ekanga wɛso. Tayalaki la ntshendja djɛso. Anto watodjingaki watewaki kɛ nangha, edjinge watakokaki nkanela wɔlɔ lonkina. Koko iso tayalaki la nkete nkfumɔ djɛ sayalaka la djɛkɔ djonyi, ndekɔ la djedjɛ lombombe lá nkambo djesɔ!”—Tamara, Californie, États-Unis.

•   Lá winá wɔ mbalaka: Ilá yimba l‘akambo waleka djonyi.

   Kɛnɛ kɛ Bible otepelande: ‘Kaanga ntsha onto alekɔ la nkete efula, lowiko lɔnde lopaye má nkete djelekɔ́ lande.’—Luka 12:15.

   Kɛnɛ kɛ nkambo djɛsɔ osakisolawɔ: Lowiko lolekɔ djonyi lombombe ndeka nkete djelá demba.

   Akambo wananghemisá: “Winá wɔ lompopo lɔ wolo l’etawɔ Typhon Lawin b yatshite mvulu kɛso, ntewaki lonkina kɔɔ kɛnɛ kɛ makoke nangha. Koko nkambo mɔ djɛ mananghe nde ndɔmba Yehova Ndjambe l’oloko ɔmɔ. Ko ndjɛka ndɛna ente isatshutshɛ ngo nkete djelá demba toko, koko ape mbiko yɛso.”—Leslie, Philippines.

•   M’ɔkɔngɔ wɔ mbalaka: Kanela akambo wa lɔɔko, koko ape wa lomi.

   Kɛnɛ kɛ Bible otepelande: ‘Nyotshike ndakiyanyɛ lá nkambo djɛ lomi, ladjikɛnde lomi angoyala l’ekakasano wɛnde.’—Mateo 6:34.

   Kɛnɛ kɛ nkambo djɛsɔ osakisolawɔ: Toyakiyanyɛke amboleka lá kɛnɛ kelendana l’akambo wa lomi.

   Akambo wananghemisá: “M’ɔkɔngɔ wɔ lompopo lɔ wolo l’etawɔ Irma mpeta, totshikaka mvulu kɛso kelolisá la washi, ndjalaka ladjɛ ndɔsa akano efula ndeka ntondo edjinge ndakiyanyɛka efula. Mpembaka nkilika dako djemá Bible dj’ipa ndakiyanyɛ lá nkambo djɛ lofu lɔ lomi. Má okotshɔ wɔ Yehova, nkfulumeyɛka akambo efula wa motakanela.”—Sally, Florida, États-Unis.

 Djɛ ndjewa akambo ankina wa nangha, lenda djamba djelekɔ́ l’ɔtɛ wɔ djoyi ante: “Catastrophes : des mesures qui sauve des vies.”